Rubavu: Ingo 8 196 zahawe umuriro w’amashanyarazi mu 2018/2019

Yanditswe na Mukwaya Olivier
Kuya 24 Kamena 2019 saa 11:39
Yasuwe :
0 0

Ubuyobozi bw’akarere ka Rubavu butangaza ko ingo 8 196 zimaze guhabwa amashanyarazi mu mihigo y’uyu mwaka wa 2018/2019, byatumye 60% by’abatuye aka karere ubu bafite amashanyarazi.

Intego ni uko mu 2024 buri muturage muri aka karere azaba afite amashanyarazi nk’uko ari icyerecyezo cya leta y’u Rwanda.

Ubwo hafungurwaga ku mugaragaro amashanyarazi azacanira imirenge y’icyaro ariyo; Cyanzarwe, Nyamyumba, Bugeshi, Kanama na Nyakiriba, ubuyobozi bwemeje ko ari umwe mu mihigo akarere kamaze kugeraho ndetse kakarenza.

Umuhigo wavugaga ko mu ngo 7120 zagomba kubona amashanyarazi aturuka ku muyoboro mugari ubu ingo 7174 zamaze kuyagezwaho naho mu ngo 1000 zagombaga guhabwa umuriro w’imirasire y’izuba, ingo 1020 ubu zamaze gucanirwa.

Abaturage bishimiye uyu muhigo kuko ari kimwe mu bikorwa kibakura mu bwigunge kandi kikabateza imbere binyuze mu kwihangira imirimo.

Bizimana Edouard umwe mu bahawe amashanyarazi mu Murenge wa Cyanzarwe, avuga ko ubu basubijwe kuko abana babasha kwiga neza n’abajura bakaba baracitse.

Ati “Mbere wasangaga tujya gushakisha umuriro wa telephone tugakora ibirometero 10 tujya Mahoko. Ikindi kandi n’abajura baracitse kubera amashanyarazi ubu abana barimo kwiga neza kandi babaye abanyamujyi kuko basigaye bareba televiziyo”.

Henshi mu baturage bahabwa amashanyarazi bumva ko ari ugucana no kureba televiziyo, icyakora hari n’abandi batangiye kuyabyaza umusaruro mu bundi buryo birushaho koroshya ubuzima.

Nsengiyumva Enock we yahise atangiza umwuga wo kogosha ubu akaba yaratangiye kwinjiza amafaranga.

Ati “Mbere twajyaga kwiyogoshesha kure dukoresheje amasaha atatu, umuriro waraje nanjye mpita ngira igitekerezo cyo kubyaza uyu muriro akamaro ntangiza aho kogoshera nkaba naratangiye kwiteza imbere’’.

Umuyobozi wa Sosiyete y’igihugu ishinzwe ingufu mu Karere ka Rubavu, Igoma Stephen, avuga ko ingo zose zizaba zabonye amashanyarazi mbere ya 2024.

Ati “Mu karere ka Rubavu uyu mwaka twagombaga gucanira ingo 7120 none twacaniye 7174 naho mu mirasire y’izuba twagombaga gucanira ingo 1000 ariko twarengejeho ubu tumaze gucanira ingo 1022 ubu ingo zose zifite amashanyarazi ni 50 100 mu ngo ibihumbi 88, bivuze ko urebye aho tugeze kuri twebwe mbere ya 2024 tuzaba twararangije gucanira abasigaye’’.

Umuyobozi w’akarere ka Rubavu Habyarimana Gilbert, avuga ko batazategereza 2024 kuko buri mwaka ingo bateguye zizajya zihabwa amashanyarazi bikoroshywa nuko n’ubundi abaturage ba Rubavu batuye mu midugudu.

Umuyobozi w'Akarere ka Rubavu Habyarimana Gilbert afungura ku mugaragaro aya mashanyarazi azacanira imirenge y'icyaro
Nsengiyumva Enock we yahise atangira umwuga wo kogosha ubu akaba yaratangiye kwinjiza amafaranga
Umuturage wo mu Murenge wa Kanama acana itara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza