Rubavu: Imyaka igiye kuba itanu isoko rya Rukoko ritagira abarikoreramo

Yanditswe na Mukwaya olivier
Kuya 12 Nzeri 2017 saa 07:51
Yasuwe :
0 0

Nyuma y’aho hafashwe icyemezo cyo kwimura isoko rya Buhuru ritari ryubakiye rikimurirwa mu Kagari ka Rukoko imyaka igiye kuba itanu isoko rishya ritagira abaricururizamo, kubera abazunguzayi bakorera mu mihanda ijya muri iri soko.

Abakorera mu isoko rya Rukoko ni bakeya ugereranyije n’ubushobozi bwaryo ku buryo batageze ku 10%. Nko mu nzu zo gucururizamo 38 eshanu zonyine ni zo zikorerwamo.

Ntamugabumwe Jerome, ukorera muri iri soko avuga ko bahangayikishijwe cyane no kutabona abakiriya bitewe n’abucuriza hanze y’isoko badasora bakabatwara abakiriya kandi barazanwe n’ubuyobozi bubavanye Buhuru.

Yagize ati “ Tubona ari intege nke z’abayobozi, usanga ibintu bidanditse ahantu hose,nta muntu uzaza kugura hano ibintu abisize hanze kandi binahendutse kubera ko badasora.”

Yakomeje avuga ko bahora babimenyesha ubuyobozi bakizezwa kubavana hanze bose bakazanwa mu isoko ariko ntibabikore bigatuma n’abaje mu isoko bavamo kubera ko baba basize abandi ku mihanda.

Ati “Umucuruzi araza yabura abakiriya akagenda, undi akaza agahanyanyaza byamunanira agasubira muri nsisiro aho yabona abakiriya. Turifuza ko abacuruzi bose baza muri iri soko bose bagatozwa kuba ari ho bahahira aho guhahira mu duce dukikije isoko. ”

Uwamahoro Rebecca ucuruza inyanya avuga ko we yatangiye gucururiza mu isoko rya Buhuru baza kujyanwa muri iri rya kijyambere ariko kuri ubu abo bavanye Buhuru bose basubiye gucururiza mu dusoko turyegereye.

Ati “Nta muturage waza kugurira hano ibyo ashaka biri ku muhanda, kubera kubura abakiriya abo twavanye Buhuru dusigaye turi babiri gusa, abandi bagiye mu dusoko turi hirya no hino kuko ariho hari abakiriya abandi baricara kubera guhomba.”

Umuyobozi w’agateganyo w’Akarere ka Rubavu, Murenzi Janvier avuga ko ikibazo bagihagurukiye kuri ubu bakaba bamaze kuvana umubare munini w’abacuruzi ku muhanda.

Yagize ati “Ubu biragenda bicika kuko si nka mbere abatabyumva neza nabo ubukangurambaga burakomeje kuko gucururiza ahatari isoko ntibyemewe n’amategeko y’ubucuruzi mu Rwanda; turabakangurira bose kuzamuka bagasanga abandi mu isoko.”

Nubwo uyu muyobozi avuga ibi usanga bamwe mu baturage bagana utu dusoko mu masaha y’umugoroba cyane cyane mu kagari ka Byahi ahitwa Buhuru no mu kiziba aho usanga ubucuruzi bukomeye mu masaha y’umugoroba.

Si iri soko ryonyine muri aka Karere rya kijyambere ridakora neza kuko n’iryo mu Murenge wa Rugerero ritarema neza kubera ko abahatuye barema irya Gisenyi n’irya Mahoko abakikije.

Zimwe mu nzu zubatswe mu isoko rya kijyambere rya Rukoko ntizikorerwamo
Bamwe bahitamo gucururiza aho babasha kubona abaguzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza