00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Ibagiro rya Koperative Koadu ryongeye gusubizwa mu cyamunara

Yanditswe na Mukwaya Olivier
Kuya 31 Kanama 2021 saa 08:28
Yasuwe :
0 0

Ibagiro rya Koperative DUKUNDUMURIMO(Koadu) riherereye mu mu mudugudu wa Rutaga akagari ka Rukoko, Umurenge wa Rubavu ryongeye gusubizwa mu cyamunara nyuma y’imyaka ibiri ihagaritswe bitewe n’imvururu ubwo abanyamuryango b’iyi Koperative bitambikaga imodoka yari izanye umuhesha w’inkiko bigatuma iri bagiro ritagurishwa.

Nkuko bigaragara mu itangazo ryashyizweho umukono n’umuhesha w’inkiko Me Niyonkuru Jean Aimée, kuva tariki 26/8/2021 kugeza 2/9/2021 harimo haratezwa cyamunara iri bagiro rifite agaciro ka miliyoni zisaga 580 Frw kugira ngo hishyurwe umwenda iyi koperative ibereyemo King Construction Service Company Ltd(KICOSEKA) nkuko byemejwe n’urukiko rukuru rw’ubucuruzi.

Ku ruhande rwa Koadu ntabwo bemera iyi cyamunara, ahubwo bashinja inkiko zaciye imanza kuba ari ryo pfundo ry’akarengane bahuye nako.

Perezida wa Koperative, Musabyimana Nyarubisi Bertin yavuze ko batemera cyamunara kubera akarengane bakorewe n’inkiko, agatunga urutoki urukiko rukuru rwa Musanze.

Ati’’Cyamunara ntabwo tuyemera kandi tugaragaza akarengane koperative yakorewe. Ntabwo twemera imikirize y’urukiko rukuru rwa Musanze n’ibyo bavuga ngo twigurishirije ntitubyemera. Tuzakomeza kugaragaza akarengane Koperative yakorewe kugeza igihe wenda tuzarenganurwa’’.

‘’Urukiko rwa Rubavu rwahamije ibyaha abayoboraga Koperative ndetse na bariya ba rwiyemezamirimo barimo bashaka kugurisha ibagiro ndetse bose bakatirwa imyaka itandatu ariko byaradutunguye uburyo baje kugirwa abere ku nyandiko mpimbano ndetse urukiko rwemeza ko bakwishyurwa.”

Yakomeje avuga ko nubwo cyamunara yaba uzagura ibagiro atazarihabwa kuko bategereje ko umugenzuzi w’inkiko kubafasha gusubirishamo urubanza ku bw’akarengane.

Mu isomwa mu rukiko rukuru rwa Musanze kuwa 9 Mutarama 2021, rwagize abere ba rwiyemezamirimo bafite kompanyi ya Kicoseka yubatse ibagiro rya Rutagara n’abandi baregwaga muri urwo rubanza.

Iyi cyamunara yagombaga kuba muri 2019 ntibyakunda kuko Koperative yareze ikirego nshinjabyaha ku nyandiko yemezaga umwenda babereyemo Kicoseka bavugaga ko ari impimbano, urubanza rwarangijwe n’urukiko rukuru rwa Musanze rwemeje atari inyandiko mpimbano bityo bigumishaho umwenda usanzwe wa miliyoni 390.

Koadu yagerageje kujurira mu rukiko rw’ubujurire ariko ikirego nticyakirwa bityo inzira z’amategeko ziba zirarangiye.

Koperative KOADU yashinzwe mu 2009, igamije gukora ububazi bw’inka. Mu 2012 ni bwo yatangiye kubaka ibagiro ryagombaga kurangira mu 2015 biza kugaragaramo ibibazo ku buryo mu 2016 ari bwo Ikigo cy’Igihugu gishinzwe Amakoperative (RCA) yahagaritse Komite yayiyoboraga nyuma yo gutahura uburiganya mu masoko yatangwaga mu myubakire y’ibagiro.

Inyubako y'ibagiro rya Rutagara ariyo nyirabayazana w'iki kibazo kimaze iminsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .