Rubavu: Hibutswe Abatutsi biciwe ku Nyundo no mu nkengero zaho

Yanditswe na Mukwaya Olivier
Kuya 9 Mata 2018 saa 06:56
Yasuwe :
3 3

Akarere ka Rubavu kibutse ku nshuro ya 24 Abatutsi baguye kuri Cathedrale Gatolika ya Nyundo no mu mirenge yegereye uwa Nyundo muri Mata 1994, hatangirwa ubuhamya n’ubutumwa bwo kurwanya ingengabitekerezo ya Jenoside.

Muri iki gikorwa cyabaye ku wa 9 Mata 2018, cyabimburiwe n’urugendo rwo kwibuka hanashyinguwe umubiri w’umukecuru Nyiragaharara Yadede, wishwe muri Jenoside, wabonetse mu Murenge wa Kanama, ukaba washyinguwe mu Rwibutso rwa Nyundo.

Kabeja Ernest warokotse Jenoside, yatanze ubuhamya bwumvikanamo uburyo bahizwe bikomeye bakaraswa n’abapolisi n’abajandarume ariko akaza guhungira muri Repubulika Iharanira Demokarasi ya Congo.

Umuyobozi wa Ibuka mu Karere ka Rubavu, Kabanda Innocent, yavuze ko abarokotse Jenoside bahuye n’ingaruka zikomeye ariko nyuma y’imyaka 24 ihagaritswe biyubatse kubera ubuyobozi bwiza.

Yagize ati “Muri iyi myaka 24 abarokotse Jenoside twagize ibibazo bikomeye ariko kubera ko twagize igihugu cyiza n’ubuyobozi bwiza ubu twabaye abagabo bubatse babereye igihugu cyacu bafatanya n’abandi kubaka igihugu.’’

Guverineri w’Intara y’Iburengerazuba, Munyantwari Alphonse, yatangaje ko kwibuka Jenoside yakorewe Abatutsi ari ngombwa kuko byongera guha agaciro abayikorewe, asaba abaturage kugira ubumwe no kwirinda ingengabitekerezo ya Jenoside kuko ari byo byubaka igihugu.

Ati “Icyerecyezo cyo kureka amacakubiri n’ingengabiterezo ya Jenoside tukigire icyacu kubera ko ntabwo ari ikintu wabika ngo ukigumane ngo kizakugirire akamaro; dufatanye kugira ngo ubumwe bwacu tubwubake kuko ni bwo buzaturinda n’igihugu cyacu.’’

Urwibutso rwa Jenoside yakorewe Abatutsi rwa Nyundo ruruhukiyemo imibiri 863 y’abaguye mu Kiliziya no mu mirenge iyikikije.

Umuhango wo kwibuka wabimburiwe n'urugendo rwo Kwibuka
Urugendo rwo kwibuka rwitabiriwe n'abatari bake
Guverineri w'Intara y'Iburengerazuba, Alphonse Munyantwari n'abandi bayobozi bagana ku Rwibutso rwa Nyundo
Muri uyu muhango hanashyinguwe umubiri w'umuntu umwe wabonetse mu Murenge wa Kanama
Cathedrale ya Nyundo yaguyemo Abatutsi 500 muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza