Rubavu: Hari impungenge ko imibiri y’abazize Jenoside iri kwangirika mu rwibutso rwa Kanzenze

Yanditswe na Mukwaya olivier
Kuya 17 Mata 2018 saa 07:41
Yasuwe :
0 0

Abarokotse Jenoside yakorewe abatutsi bo mu Murenge wa Kanzenze mu Karere ka Rubavu bavuga ko imwe mu mibiri iruhukiye mu rwibutso rwa Jenoside rwa Kanzenze yatangiye kwangirika bitewe n’uko amasanduku irimo adafite ubushobozi bwo kuyabika igihe kirekire.

Perezida wa Ibuka mu Murenge wa Kanzenze, Kabirizi Innocent, yavuze ko amasanduku babahaye yatangiye kumungwa.

Yagize ati “Icyo dusaba nk’ubuvugizi ahangaha usanga imibiri iri kugenda yangirika kuko amasanduku yatangiye kuzana imungu, twasabaga ko amasanduku yasimbuzwa andi agezweho muri iki gihe nk’ayo baduhaye umwaka ushize ya ribuyu.’’

Umukozi ku rwibutso rwa Jenoside rwa Kanzenze, Karomba Vincent, yavuze ko iki kibazo gihangayikishije mu kwita ku mibiri iharuhukiye.

Yagize ati "Amasanduku 30 yarangiritse kuko yatangiye kumungwa bigatuma imibiri irimo igira ubukonje bigatuma bisaba guhora umuntu ayikurikirana buri munsi, badufashije baduha amasanduku ya ribuyu kuko yo adasaza vuba. ’’

Umuyobozi w’Akarere ka Rubavu wungirije ushinzwe imibereho myiza y’abaturtage, Uwampayizina M. Grace, yavuze ko iki kibazo cyashyizwe mu bizakemurwa vuba mu ngengo y’imari y’umwaka utaha.

Yagize ati “Ni ikibazo tuzi kandi twatangiye gukoraho kuko tukimara kumenya ko icyo kibazo gihari twahise dufata gahunda yo kugira ngo mu karere hose dukoreshe amasanduku akomeye ya ribuyu kandi mu rwibutso rwa Kanzenze tumaze gukoresha agera kuri 13, n’andi turagenda tureba amasanduku afite ikibazo tugahita tuyikuramo ariko umwaka utaha ndakeka amasanduku abura tuzayakora kugira ngo icyo kibazo kiveho kuko ni ikibazo twashyize mu byihutirwa.’’

Uwibutso rw’abazize Jenoside yakorewe Abatutsi rwa Kanazenze ruruhukiyemo imibiri 8 897 y’abiciwe mu cyahoze ari Komini Mutura na Rwerere mu gihe cya Jenoside yakorewe Abatutsi mu 1994.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza