Rubavu: Guverineri yijeje ko isoko rya Gisenyi rigiye kuboneka nyuma y’imyaka riri mu manza

Yanditswe na Mukwaya olivier
Kuya 12 Kamena 2018 saa 08:14
Yasuwe :
0 0

Ubuyobozi bw’Intara y’Iburengerazuba bwijeje abikorera bo mu Karere ka Rubavu ko ikibazo cyo kutagira isoko rya kijyambere kigiye gukemuka burundu, nyuma y’imanza aka Karere kamazemo iminsi ariko zarangiye kazitsinze.

Iri soko ryatangiye ryatangiye kubakwa n’Akarere mu 2010 maze mu 2014 muri gahunda ya Leta yo kwegurira abikorera ibikorwa binini by’iterambere, kariha rwiyemezamirimo ufite sosiyete ABBA Ltd ariko Inama Njyanama iza kugaragaza ko ryatanzwe mu buryo bunyuranije n’amategeko.

Nyuma y’igihe kitari gito ikibazo kiri mu nkiko, Akarere ka Rubavu kabashije kuritsindira mu Rukiko rw’Ikirenga ndetse gashyikirizwa ibyangombwa byaryo kuwa 7 Gashyantare 2017.

Abikorera bo mu Karere ka Rubavu bakunze kunenga aka Karere kutagira isoko rya kijyambere kandi gafite ibikorwa byinshi ndetse ari n’umwe mu mijyi itandatu yunganira Kigali, byose bikagira ingaruka ku kazi kabo n’iterambere muri rusange.

Mu kiganiro yagiranye n’abikorera mu Karere ka Rubavu mu mpera z’Icyumweru gishize, Guverineri w’Intara y’Iburengerazuba, Munyantwari Alphonse yababwiye ko imanza zarangiye Akarere gatsinze rwiyemezamirimo, igisigaye kikaba ari uburyo bw’amategeko ngo iri soko risubire mu maboko y’Akarere.

Yagize ati:"Iri soko ryagize ibibazo byo kujya mu manza, Akarere ka Rubavu kaburana na Rwiyemezamirimo wavugaga ko yarihawe ari irye. Iby’imanza byafashe inzira ndende kugira ngo umuntu yemere ko atsinzwe, byaratinze ariko icyo twakwishimira ni uko Akarere ariko katsinze urwo rubanza.”

“Ubu ikibazo ni uko ritarajya mu maboko yabo kuko hari inzego z’ubuyobozi zigomba kubyemeza kugirango rijye mu maboko y’akarere maze nako kanyure mu buryo burigeza mu maboko y’abashoramari kandi turashaka ko nk’uko abaturage babyifuza, ryakuzura rigakorerwamo.”

Umuyobozi w’abikorera mu Karere ka Rubavu, Kayumba Nyota Jeannette, avuga ko kuba nta soko bagira kandi hari abacuruzi benshi biteza akajagari.

Yavuze ko bagiye gukomeza kwegeranya ubushobozi kandi bizeye ko bazabigeraho kuko byamaze kwemezwa ko sosiyete y’abikorera yitwa Kivu Investment ariyo izaryubaka, bakaba bageze kure bakusanya amafaranga.

Yakomeje agira ati "Iryo soko rizakemura ibibazo byinshi, abikorera ba Gisenyi barishoboye kandi bafite ubushobozi igihe tuzaba twarihawe tuzaribyaza umusaruro. Ikibazo cy’akajagari mu bacuruzi kizakemuka kuko bazaba babonye aho bakorera hisanzuye."

Igishushanyo mbonera cy’agateganyo kigaragaza ko iri soko rizatwara akayabo gasaga miliyari 7 z’amafaranga y’u Rwanda, rikazaba ryagutse ndetse rifite aho guparika imodoka zirenga 100 mu nyubako yo hasi.

Ibibazo byo kubaka iri soko rya Gisenyi biri mu byatumye uwari umuyobozi w’aka karere Bahame Hassan n’abayoboranaga beguzwa kuwa 27 Werurwe 2015 ndetse we aranafungwa ariko aza kugirwa umwere.

Abikorera b'i Rubavu biteguye kwiyubakira uyu mushinga
Guverineri Munyantwali mu kiganiro n'abikorera b'i Rubavu
Isoko rya Gisenyi rizaba rijyanye n'igihe
Iri soko rizakemura ibibazo abacuruzi bamaranye igihe
Iri soko ryahawe rwiyemezamirimo rimaze gutwara miliyari 1.3 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza