Kwamamaza

Minisitiri Busingye yongeye kwikoma abashinja u Rwanda gufunga abana

Yanditswe kuya 18-10-2016 saa 11:48' na Mukwaya Olivier


Muri Nyakanga uyu mwaka, Umuryango Mpuzamahanga Uharanira Uburenganzira bwa Muntu (Human Rights Watch, HRW) wasohoye raporo ivuga ko hari abagihurira n’ibibazo binyuranye mu bigo by’agateganyo byakirirwamo abakeneye kwitabwaho byihariye (Transit Centers).

Iyo raporo yashyize ahagaragara ku wa Kane tariki 21 Nyakanga, yahawe umutwe uvuga ko “U Rwanda ruri gufunga abakene barwo”, ndetse ko guverinoma ifite umugambi wo guhisha “abantu batifuzwa” barimo abakene nyakujya, abana bo ku mihanda n’abandi kugira ngo hatagira ubabona, ariko Minisitiri w’Ubutabera akaba n’Intumwa Nkuru ya Leta, Johnston Busingye, yavuze ko nta kuri na mba kubirimo.

Ubwo yaganirizaga abana bo mu Kigo Ngororamuco cya Nyabishongo mu Karere ka Rubavu,kuri uyu wa Mbere, Minisitiri Busingye yagarutse kuri iki kibazo.

Yababwiye ko hari imiryango mpuzamahanga yirirwa ishinja u Rwanda kubafata nabi kandi ngo kuba u Rwanda rwarabashyiriyeho ibi bigo ari uko rubakunda.

Ati “Hari ibintu bitatu byashoboraga kubabaho, kuba ku mihanda mukicwa n’ibiyobyabwenge, kubajyana imbere y’ubutabera mugakorerwa dosiye mugafungwa ndetse no kubashyira muri ibi bigo.”

Yavuze ko ubu buryo bwa gatatu ari bwo babonye bubereye abana b’abanyarwanda, kuruta kubajyana mu magereza kandi bakiri bato cyane.

Ati “ Twe turavuga tuti ’gereza ntabwo ari iy’umwana w’imyaka cumi n’ine, cumi n’itanu, cumi n’itandatu, kuki umwana atahabwa andi mahirwe?’”

Minisitiri Busingye avuga ko aba bana bafite agaciro, bityo ngo niyo mpamvu baba bagomba kubasura. Ati “ Kuba twafashe umwanya tukaza, inzego z’umutekano zikaza, ku Karere, ni uko muri ab’agaciro.”

Kuri raporo z’imiryango mpuzamahanga iharanira Uburenganzira bwa muntu ikunze gushyira u Rwanda mu majwi ko rufata nabi aba bana baca mu bigo ngororamuco, Minisitiri Busingye avuga ko nta gaciro bifite kuko baba batageze n’aho abo bana bari ngo barebe uko babayeho.

Ati “Ariya maraporo ntabwo ashingiye ku muntu wafashe inzira ngo aze i Mudende yicare ahangaha, iyo rero utafashe umwanya ngo wumve igihugu impamvu gikora ikintu runaka ntabwo twabatega amatwi.”

Bamwe mu bana baganiriye na IGIHE bemeza ko bari barabaswe n’ibiyobyabwenge ariko ngo kuri ubu bafashe umwanzuro wo kubireka bitewe n’amasomo baboneye muri iki Kigo cya Nyabishongo.

Musa Fiston ukomoka mu Karere ka Rubavu yagize ati “ Bansanze ku muhanda ndi kunywa urumogi, aha mpamaze amezi ane ariko ndumva meze neza maze gukira nindamuka nsubiye mu rugo sinzongera kunywa ibiyobyabwenge.”

Ikigo ngororamuco cya Nyabishongo kimaze gucamo abarenga 3 000, aho muri bo 1,900 bajyanywe i Wawa kwigishwa imyuga.

Busingye yabwiye uru rubyiruko ko kuba u Rwanda rwarabashyiriyeho ibigo ngororamuco ari uko rubakunda.

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 21 Ugushyingo 2016
Copyright © 2009 -2014 - IGIHE Ltd - All Rights Reserved