Rubavu: Bralirwa yifatanyije n’abaturage mu gutera ibiti ibihumbi 20 (Amafoto)

Yanditswe na Mukwaya Olivier
Kuya 10 Ugushyingo 2019 saa 09:20
Yasuwe :
0 0

Abakozi b’uruganda rwa Bralirwa, binyuze mu kinyobwa cya Heineken, bifatanyije n’abaturage mu gutera ibiti ibihumbi 20 ku muhanda wegereye ikiyaga cya Kivu, muri byo 6500 byera imbuto ziribwa naho 13500 ni ibiti by’ubwiza.

Nyuma y’igikorwa cyabaye kuri uyu wa Gatandatu, umuyobozi ushinzwe imirimo rusange n’itumanaho muri Bralirwa, Batamuriza Aline Pascale yavuze ko iyi gahunda yahereye mu Karere ka Rubavu kuko ikinyobwa cya Heineken cyateye inkunga iki gikorwa ariho cyengerwa, bikazakomeza mu gihugu hose.

Ati "Bizahoraho mu kubungabunga ibidukikije, bije byunganira bimwe mu bikorwa dukorera mu karere ka Rubavu no mu gihugu hose, tukazatera ibiti miliyoni esheshatu.’’

Yakomeje avuga ko ibiti batanze bizafasha abaturage kuzamura imirire, ku rundi ruhande bikongera n’ubwiza bw’umujyi wa Rubavu.

Umuyobozi wungirije w’Akarere ka Rubavu ushinzwe imibereho myiza, Ishimwe Pacifique yavuze ko ibi biti bizafasha akarere kurwanya igwingira rigaragara ku bana.

Ati’ "N’ubundi twabishyize mu mihigo y’uyu mwaka ko buri rugo rugomba kuba rufite ibiti bitatu by’imbuto ziribwa, ni nuburyo bwo kubitangiza ku mugaragaro kandi bizakomeza kuko ingemwe zagejejwe mu mirenge, bizadufasha kurwanya igwingira n’imirire mibi kuko mu karere ka Rubavu haracyagaragara abana bafite iki kibazo.’’

Bralirwa isanzwe ifasha akarere ka Rubavu mu bikorwa bitandukanye, kuko muri uyu mwaka yashyikirije ubuyobozi bw’akarere matola 260 zahawe ibitaro bya Gisenyi n’abaturage bahuye n’ibiza ku mugezi wa Sebeya.

Mu murenge wa Nyamyumba ikoreramo ikaba yarahaye ifumbire abaturage 38 000 naho abagera ku 1000 bishyuriwe ubwisungane mu kwivuza.

Abakozi ba Bralirwa batera ibiti
Ibi biti birimo ibyera imbuto ziribwa n'iby'ubwiza
Abaturage banatahanye ibiti bya avoka byo gutera ku ngo zabo
Batamuriza mu gikorwa cyo gutera ibiti ku muhanda wo ku kiyaga cya Kivu i Rubavu
Umuyobozi wa Polisi mu Karere ka Rubavu, SP Muhadari Roger yifatanyije n'abandi
Habayeho ubusabane nyuma yo gutera ibiti
Batamuriza yavuze ko iki gikorwa Bralirwa izagikomeza
Hafashwe ifoto y'urwibutso nyuma y'iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza