Kwamamaza

Rubavu:Abikorera batanze imigabane ku isoko rya kijyambere barataka gukererezwa n’akarere

Yanditswe kuya 9-11-2016 saa 20:11' na Mukwaya Olivier


Nyuma y’aho abikorera ku giti cyabo 18 bo mu Murenge wa Kanama, mu Karere ka Rubavu bishyize hamwe bagamije kubaka isoko rya Kijyambere rya Mahoko, ubu baravuga ko akarere katinze kubaha uburenganzira bwo kubikora bikaba byarabateye igihombo.

Aba bacuruzi bemeza ko ikibazo cyabo kimaze imyaka irenga ibiri kidakemurwa, bituma bavuga ko baguye mu gihombo bitewe n’uko miliyoni 80 bari bamaze gukusanya abitse kuri konti ntacyo akora.

Bavuga ko muri Kanama 2014 bandikiye ubuyobozi bw’Akarere ka Rubavu babusaba ko bakishyira hamwe nk’abikorera bakubaka bundi bushya isoko rya Mahoko mu buryo bwa kijyambere. Kuva icyo gihe ngo akarere kabijeje kuzabaha ibyangombwa byo gutangira imirimo, gusa ngo kugeza ubu nta cyo karababwira.

Umwe muri aba witwa Mathias Sebugunzu, avuga ko uyu mushinga watangiye ubwo Sheikh Bahame Hassan yari akiri Umuyobozi w’Akarere ka Rubavu, ariko ngo abamusimbuye barawutindije bavuga ko bazabyigaho ariko ntibikorwe.

Kimwe na bagenzi be, Sebugunzu yifuza ko bahabwa igisubizo n’akarere niba iri soko bazaryubaka cyangwa se amafaranga yabo bagashaka ikindi bayakoresha.

Ati:”Kuba twaratanze miliyoni zigera kuri 80 zikaba ziryamye ahantu zitari kunguka ni igihombo, tuba twaratangiye kubaka binageze kure, twandikiye akarere inshuro nyinshi ariko ntibadusubiza ndetse twagiranye ibiganiro byinshi ariko turacyategereje,hari bamwe gutegereza byarambiye bifuza kuyasubizwa bakajya gushora mu isoko rya kijyambere rya Musanze. Turasaba ko twakurwa mu gihirahiro niba baduha igisubizo bigakorwa vuba cyangwa bakadusubiza ayacu.”

Ubuyobozi bw’akarere ka Rubavu bwemeza ko bwaganiriye n’abikorera bashaka kubaka iri soko, bemeranya ko akarere kagomba kubigiramo uruhare, bityo ngo hategerejwe icyemezo cy’ Inama Njyanama y’akarere ngo ibyemeze. Busaba aba bantu kwihangana kugeza mu mpera z’uyu mwaka.

Murenzi Janvier, Umuyobozi w’Akarere ka Rubavu wungirije ushinzwe ubukungu n’iterambere agira ati:”Nibihangane ikibazo turakizi kandi kigomba kwigwaho na Njyanama kugira ngo twirinde gukora ibintu bitanyuze mu mucyo, kuba byaratinze hari ibyo bagombaga gutunganya, icya mbere batangiye ari koperative itagira ubuzima gatozi, twakoze ingendoshuri tugamije kureba aho byakozwe ndetse bagombaga gukora umushinga babigaragariza ibigo by’imari.”

Iri soko rya Kijyambere byari biteganyijwe ko rizuzura ritwaye arenga miliyari na miliyoni magana abiri y’amafaranga y’u Rwanda (1.200.000.000 frw), harimo uruhare rw’abikorera n’akarere kari gutanga ikibanza (ahari iryo soko) ndetse hakiyambazwa ibigo by’imari bibaha inguzanyo.

Abikorera bari kubaka iri soko bundi bushya baravuga ko bahombejwe n'akarere ka Rubavu
Kubaka iri soko byari kuzatwara miliyari irenga y'abikorera ku giti cyabo none akarere kabigendamo buhoro

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved