Rubavu: Agatsiko kitwaza imihoro n’amacumu kajujubije abaturage

Yanditswe na Ishimwe Israel
Kuya 20 Nyakanga 2016 saa 11:19
Yasuwe :
0 0

Mu karere ka Rubavu hadutse agatsiko k’abajura bitwaza amacumu n’imihoro bamaze iminsi batera abaturage bakabatemagura ndetse bakanabasahura imitungo yabo.

Agatsiko k’abajura bitwaje amacumu n’imihoro kateye abaturage bo mu kagari ka Mbugangari mu murenge wa Gisenyi ku itariki ya 7 Nyakanga 2016 batemagura abantu batatu gashaka kubambura amafaranga.

Mutaguma Anthère, umwe mu bambuwe, avuga ko yategewe mu nzira avuye gucuruza mu kabari bamukekaho amafaranga,baramutemagura ndetse arakomereka bikomeye.

Yahise ajyanwa mu bitaro bya Gisenyi aza guhita yoherezwa gukurikiranwa mu bitarobya Kaminuza bya Kigali, CHUK aho arwariye kugeza ubu.

Mu rukerera rwo kuya 17 Nyakanga ahagana saa kumi, abajura bateye kuri Sitasiyo ya Essence yitwa OM bahasanga umuntu utanga Essence(pompiste) witwa Dushimimana André wari waraye ku kazi bamutwara amafaranga yose yari yacuruje .

Binakekwa ako gatsiko ari nako kibye Betting yo mu mujyi wa Gisenyi kagasahura amafaranga yari ahari.

Umwe mu baturage baganiriye na IGIHE yatangaje ko ibikorwa by’ubujura n’ubugizi bwa nabi bikomeje kwiyongera bitewe n’uko ingamba zifatwa n’inzego zibanze zidashyirwa mu bikorwa.

Isaac Masabo yagize ati “Ikibazo nuko hafatwa ingamba z’umutekano ariko gushyirwa mu bikorwa bikaba ikibazo. Umudugudu ugomba gushyiraho ingamba z’umutekano wawo; umuyobozi w’Umudugudu cyangwa komite yawo ibona itabyubahiriza izo ngamba bakwegura.”

Umunyamabanga Nshingwabikorwa w’umurenge wa Gisenyi, Mugisha Honoré yatangarije IGIHE ko aka gatsiko kataramenyekana kakomeje kubajujubya, ariko ko bafashe ingamba zo kurushaho gukaza umutekano.

Ati “Utu dutsiko tutaramenyekana turatujujubije, baraza bitwaje amacumu n’imihoro ubabonye nta kundi aho kuhasiga ubuzima ahitamo gutanga ibyo afite ngo arengere ubuzima bwe. Tugomba gufata ingamba zo gukora amarondo buri munsi. Turasaba abaturage bose gushyira amatara ku ngo zabo mu rwego rwo kwicungira umutekano.”

Mugisha yasabye abaturage gutangira ku gihe amakuru batunga agatoki abantu baje vuba mu duce batuyemo usanga batazwi.

Yagize ati “Ikibazo nuko tubwirwa ko aho bateye abaturage batagira umutima wo gutabara, umuntu aratewe aratabaje abuze umutabara, ni ikibazo turabasaba kwisubiraho.”

Inama yaguye y’umutekano yahuje ubuyobozi bw’umurenge wa Gisenyi ndetse n’izindi nzego z’umutekano yateranye kuri uyu wa Kabiri yafatiwemo imyanzuro yo gushyira mu bikorwa ingamba ziba zafashwe ndetse no kurushaho kwicungira umutekano.

Mutaguma watemwe n'abagizi ba nabi arwariye mu bitaro bya CHUK
Abajura bitwaje amacumu n'imihoro bibye umukozi wa Sitasiyo ya Essence iri mu mujyi wa Gisenyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza