Kwamamaza

Rubavu: Abayobozi b’ibigo basabwe guha agaciro ibaruramari ry’umwuga

Yanditswe kuya 11-10-2016 saa 11:19' na Mukwaya Olivier


Ibigo bya leta, ibyigenga n’ibindi byose bikenera ababaruramari, birasabwa guha agaciro ibaruramari ry’umwuga mu rwego rwo kurushaho guteza imbere igihugu hacungwa neza umutungo wacyo.

Ubuyobozi bw’Ikigo gishinzwe guteza imbere umwuga w’ibaruramari mu Rwanda (iCPAR), ku nshuro ya gatanu bwateguye inama ihuza abanyamuryango b’iki kigo, ibigo bya Leta n’ibyigenga hagamijwe gutanga ubufasha muri byo, mu mwuga w’ibaruramari no kwita ku iterambere ry’ubukungu bw’igihugu, inama yabereye mu karere ka Rubavu.

John Munga, Umunyamabanga Mukuru wa iCPAR mu Rwanda, avuga ko gutegura inama ngaruka mwaka bigenda bitanga umusaruro mu bijyanye n’uburyo ibikorwa bibyara inyungu biri kugenda bizamuka, akemeza ko ibiganiro bibahuza n’abafite aho bahuriye n’imari bizatuma buri umwe agaragaza icyakorwa mu gukura no kugera ku ntego kw’ibigo byabo, bityo bikazagira impinduka ku bukungu bw’igihugu.

Yagize ati ”Bisigaye bikunda kuvugwa ngo imari yacunzwe nabi, umugenzuzi w’imari ya leta agahora anenga abacunze nabi umutungo. Mu myaka itanu ishize, twari ku rwego ruri hasi cyane ariko gucunga imari bigenda bizamuka nubwo ibibazo bitabura akenshi bitewe n’amasoko yatanzwe nabi ariko ababaruramari nibaharanira kuba abanyamwuga n’abakoresha bakabigira ibyabo, bizarushaho kuba byiza.”

Akomeza avuga ko ikigamijwe kuganirwaho harimo amahirwe yo gushora imari mu gihugu, kurwanya ruswa, uburyo bwo kubyaza umusaruro amahirwe ahari no guhangana n’ingaruka zitandukanye zishobora kugaragara, uburyo ishoramari mpuzamahanga riri kugenda mu Rwanda n’ibindi.

Caleb Rwamuganza, Umunyamabanga Uhoraho muri Minisiteri y’Imari n’Igenamigambi, yavuze ko leta iri gushyira imbaraga mu guhugura no kwishyurira abakozi ba leta bose babyifuza amasomo y’umwuga w’ibaruramari (CPA na CAT) ndetse akanakangurira abayobozi batandukanye guha agaciro ababaruranari b’abanyamwuga.

Ati ”Ibyo bitugaragarira mu musaruro mwiza batanga mu kazi bakora ka buri munsi, kuri iyo mpamvu hakaba hari icyizere ko mu myaka mike iri imbere ibigo bya Leta n’iby’abikorera bizaba bifite ababaruramari b’umwuga bahagije. Tunasaba abatarabitangira kubishyira mu bikorwa kugira ngo hajye habaho gucunga imari neza bikorwa n’ababigize umwuga bizadufasha mu iterambere."

Kuva mu mwaka wa 2012, ababaruramari bamaze gutsinda ibizamini by’ibaruramari, bagera kuri 400. Gusa ngo ibi bizamini bizakomeza gukorwa mu rwego rwo gukuraho burundu ababaruramari batabizobereye.

Ababaruramari basabwe gukora mu buryo bw’umwuga imirimo bashinzwe bubahiriza amahame abagenga, bihesha ishema kandi banarihesha igihugu cyabo, bagamije gushyira mu bikorwa intego z’imbaturabukungu ya kabiri, EDPRS 2.

Iyi nama yitabiriwe n’abayobozi batandukanye baturutse mu bigo bya Leta n’iby’abikorera, abanyamuryango ba iCPAR, abanyamabanga b’ibigo, abashinzwe ingengo y’imari mu bigo bya Leta, impuguke ziturutse mu bihugu bitandukanye n’abandi.

Ababaruramari basabwe gukora kinyamwuga mu rwego rwo guteza imbere igihugu
Caleb Rwamuganza, Umunyamabanga Uhoraho muri Minisiteri y’Imari n’Igenamigambi, asaba abayobozi b'ibigo guha agaciro umwuga w'ibaruramari
Abitabiriye iyi nama mu ifoto rusange

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 6 Ugushyingo 2016
Copyright © 2009 -2014 - IGIHE Ltd - All Rights Reserved