Rubavu: Abayobozi 15 batawe muri yombi bakekwaho ruswa

Yanditswe na Mukwaya Olivier
Kuya 6 Ukuboza 2018 saa 09:08
Yasuwe :
0 0

Abayobozi 15 bo ku nzego zitandukanye mu Karere ka Rubavu, batawe muri yombi mu iperereza ku byaha bya ruswa, nyuma y’uko imwe mu mirenge y’aka karere ishyizwe mu majwi n’umuryango urwanya ruswa n’akarengane, Transparency International Rwanda.

Ubushakashatsi uyu muryango washyize ahagaragara kuri ruswa mu mpera z’ukwezi gushize, bwakorewe mu turere dutandatu hagendewe ku bitekerezo by’abaturage, bwagaragaje ko Akarere ka Rubavu n’aka Kayonza turi imbere mu kugira ruswa nyinshi.

Nyuma y’uko Umurenge wa Kanama ukomeje kuza imbere mu kunugwanugwamo ruswa muri Rubavu, kuri uyu wa Gatatu ubuyobozi bw’akarere bwakoranye inama n’abaturage b’uwo murenge, basaba abaturage kwandika abo baziho ruswa kugirango bakurikirannwe.

Mu bagaragajwe harimo abakozi b’akarere bakorera mu murenge wa Kanama no mu tugari tuwugize, DASSO, Abunzi, abayobozi b’ibigo by’amashuri n’abajyanama b’ubuzima.

Abayobozi 15 bavuzwe n’abantu benshi bari muri iyo nama bahise bashyikirizwa Urwego rw’Igihugu rushinzwe Ubugenzacyaha, RIB, aho ubu bafungiye kuri sitasiyo ya Gisenyi.

Mu bafunzwe harimo umuyobozi ushinzwe amashyamba mu murenge wa Kanama, Umunyamabanga Nshingwabikorwa w’Akagari ka Kamuhoza n’umukozi ushinzwe imyubakire muri uwo murenge.

Umuyobozi w’Akarere ka Rubavu Habyarimana Gilbert yavuze abavuzweho ruswa bagomba gukurikirannwa.

Ati “Muri uyu murenge twasanze hari ibintu bifitanye isano na ruswa ku bayobozi bamwe na bamwe kandi hari abagiye bavugwa inshuro nyinshi kandi hari n’abagaragayeho ibimenyetso, akemera ko hari uwamutumye.”

“Niyo mpamvu twavuze ko bakurikiranwa kuko ntabwo dushobora kwihanganira umuyobozi uwo ariwe wese, umukozi wagaragaraho ruswa. Ni urugamba twatangiye kuva aho bigaragariye ko muri uyu murenge bimeze kuriya na Rubavu tukaba turi kuri ruriya rwego kandi no mu mirenge yose tuzahagera.”

Mu cyegeranyo giheruka cya Transparency International Rwanda cyakorewe mu turere dutandatu, Umurenge wa Kanama waje ku isonga ku nshuro ya gatatu yikurikiranya n’amanota 35% mu kuvugwamo ruswa.

Ku mwanya wa kabiri haje Nyakiriba n’amanota 27% naho ku mwanya wa gatatu haza umurenge wa Nyundo n’amanota 25%.

Iyo raporo yagaragaje ko ruswa mu karere ka Rubavu ingana na 17.80% mu gihe mu gihugu cyose ari 20.39%. Ikunze gutangwa 65% ni amafaranga,10% ni ruswa ishingiye ku gitsina; 8% itangwa inyujijwe ku wndi muntu naho 10% igatangwa yitwa ikarita ya telefoni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza