Rubavu: Abaturage basenyewe n’imvura barashinja akarere kubatererana

Yanditswe na Ishimwe Israel
Kuya 6 Ukwakira 2016 saa 05:00
Yasuwe : XX
0

Abaturage bo mu Tugari twa Nengo na Bugoyi mu Murenge wa Gisenyi bararira ayo kwarika nyuma y’aho umuyoboro usohora amazi mu Mujyi usenywe n’imvura, akinjira mu nzu zabo akabangiriza.

Bamwe mu basenyewe bavuga ko iki kiza cy’imvura idasanzwe yaguye mu Mujyi wa Rubavu ku gicamunsi cyo kuwa Kabiri cyatewe ahanini n’imyubakire y’urukuta rukikije uyu muyoboro rwasondetswe ubwo Abashinwa bubakaga umuhanda.

Ikibazo cy’imyubakire yawo cyagejejwe mu buyobozi bw’akarere ndetse abaturage bagaragaza ko bishobora kubashyira mu kaga.

Umwe muri bo yagize ati “Hashize igihe kinini twirirwa twirukanka ku biro by’Akarere tubamenyesha ibibazo dushobora kuzahura nabyo kubera uyu muyoboro w’amazi wubatse nabi, ntibadusubize. Twanditse n’amabaruwa menshi barayakira baranadusinyira ariko baricecekeye.”

Akomeza agira ati “None baje ari uko urukuta rwabatwaye amafaranga menshi rutwawe n’amazi, twarababwiye ngo ni gute mwubaka umuyoboro unyuramo amazi menshi ntimushyireho inkingi ntibatwumva, ibaze kubona amazi yose yo mu Mujyi yinjira mu nzu z’abaturage twarengewe kandi n’ibyacu byose byangiritse.”

Uwimana Yuliyana we ashinja ubuyobozi bw’Akarere ka Rubavu gutanga amasoko yo kubaka umuhanda ntibashyireho imiyoboro ishoboye gutwara amazi cyane ko hari n’ahari imihanda ya kaburimbo idafite imiyoboro isohora amazi kandi iri ahatuwe.

Yagize ati “ Umuyoboro wamaze kuzura urasenyuka, amazi yinjiye mu ngo zacu ibintu byose birasandara nahombye byose ntacyo nararuye. Iki kibazo twakivuze kuva kera ariko hari n’ikosa ryakozwe ba rwiyemezamirimo bubaka uyu muyoboro mugari kuva kera byagaragaraga ko amazi ayoboye nabi none ibintu byose byarangiritse, ubuyobozi bukomeje kuturangarana.”

Umuyobozi w’Akarere ka Rubavu, Sinamenye Jérémie avuga ko iki kibazo giteye impungenge ariko icyibanze n’ukwihutira gutabara abaturage.

Yagize ati “Iyo ikibazo nk’iki kibaye tugomba gutabara abaturage,turabasaba kugaragaza uruhare rwabo bafata neza ibikorwa remezo bakuramo imyanda yatuma amazi atagenda, ikindi tubasaba ni ugufata amazi ava ku nzu zabo ibi bizadufasha guhangana n’ibi biza.”

Kuva ibihe by’imvura byatangira muri uyu mwaka, ubuyobozi bw’Akarere ka Rubavu bwatangaje ko ari bwo bwa mbere yangije ibintu byinshi mu Mujyi wa Gisenyi rwagati.

Umuyoboro utwara amazi yose yo mu Mujyi wa Gisenyi wasenyutse amazi yose asandara mu ngo z'abaturage
Abaturage bareba urukuta rwasenyutse
Amazi yari yuzuye ahantu hose, mu nzu utabona aho ukandagiza ikirenge
Amazi yinjiye mu nzu z'abaturage yangiza ibintu byinshi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza