Rubavu: Abaturage barahumurizwa ku kuba inkengero z’ikiyaga cya Kivu zahinduye ibara

Yanditswe na Kanamugire Emmanuel
Kuya 30 Kanama 2016 saa 09:58
Yasuwe :
0 0

Inkengero z’ikiyaga cya Kivu ziri kugaragaza ibimenyetso by’impinduka aho amazi yahindutse icyatsi kibisi, bikaba byateye ubwoba bamwe.

Bamwe mu baturage twahasanze badutangarije ko byabatunguye kuko byaherukaga kuba mu kwezi kwa Kane ariko bikaba byaragaragaraga hagati mu kiyaga naho kuri ubu bikaba byaje ku nkengero.

Bamwe mu baturage twasanze baje koga bari bafite impungenge z’izi mpinduka bavuga ko batazi icyo zihatse.

Umwe yagize ati”Twabonye ibara ry’amazi y’Ikivu ryahindutse mu gihe byaherukaga kubaho mu mezi ane ashize niyo mpamvu twirinze kogera kure kuko tutazi icyo bihatse.”

Dr Dushime Dryck, umushakashatsi mu bijyanye n’ibiza,akaba n’umuyobozi wa Croix Rouge ishami rya Rubavu, yavuze ko ntawe bikwiye gutera ubwoba kuba ikiyaga cya Kivu cyahinduye ibara kikaba icyatsi kibisi.

Yagize ati “Impinduka nk’izi zirasanzwe, abaturage ntibakwiye kugira ubwoba. Ikiyaga gishobora gufata amabara (ubururu, icyatsi, ikigina) bitewe n’igihe ibyatsi biri mu mazi.Ufashe ariya mazi ukayashyira mu gikombe wasanga yo atahindutse ahubwo asa uko asanzwe. Bihaho ko amazi ahindura ibara.”

Kuri bamwe mu batuye akarere ka Rubavu batekerezaga ko kuba ikiyaga cya Kivu cyahinduye isura hari aho byaba bihurira n’iruka ry’ikirunga cya Nyiragongo uyu mushakashatsi yavuze ko ntaho bihuriye.

Ati “Iyo dupima iruka ry’ibirunga tugendera ku bintu byinshi birimo gupima ubushyuhe, dukoresha ibyogajuru dupima imitingito kuko burya isano iri hagati y’imitingito n’ibirunga ni nk’isano iri hagati y’igi n’inkoko, ariko kuba rwose amazi y’ikivu yahinduye ibara ntaho bihuriye n’iruka ry’ibirunga, biriya bisanzwe bibaho.”

Yakomeje avuga ko iyo amazi arimo ibimera byinshi afata ibara ry’icyatsi kandi amazi nk’aya yongera umusaruro w’amafi naho iyo ari mu gihe cy’izuba ayo mafi ashobora gupfa kuko aba arimo oxygen nkeya. Iyo amazi afite ibara ry’ikigina haba harimo ibintu biyahindura, aha twavuga amazi yegereye ibishanga n’amashyamba”.

Inkengero z'ikiyaga cya Kivu zahindutse icyatsi kibisi
Bamwe mu bamenyereye koga mu Kivu bari batinye kwinjiramo imbere bakeka ko byabagiraho ingaruka
Kugeza ku nkengero z'umujyi wa Goma, ikiyaga cya Kivu cyahinduye ibara

Olivier@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza