Kwamamaza

Rubavu: Abasigajwe inyuma n’amateka bisenyeragaho inzu bagiye gusubizwa

Yanditswe kuya 25-11-2016 saa 12:43' na Mukwaya Olivier


Bamwe mu basigajwe inyuma n’amateka batuye mu mudugudu wa ‘Vision’, akagari ka Busigariye mu murenge wa Cyanzarwe, bagiye guhabwa amasambu yo guhingaho ngo bashobore kurwanya inzara bavuga ko ari yo yatumaga bisenyera.

Iyo ugeze muri uyu mudugudu wubakiwe abatishoboye basigajwe inyuma n’amateka uhasanga inzu zimeze nk’ibiraro by’amatungo kubera ko imbaho zo ku mpande bazikuyemo bakazigurisha, ndetse n’inkuta z’imbere bakazisenya.

Mwitende Nkerabigwi, umwe mu batujwe muri uyu mudugudu yavuze ko kutabona ibiribwa ari byo bituma basenya inzu zabo maze imbaho bakazigurisha ngo babone amaramuko.

Ati “Inzu twarazubakiwe ariko iyo inzara itwishe dukuraho urubaho rumwe wajya kurugurisha bakagura ibiceri ukaguramo ibijumba, waza ugafataho n’urundi ugacanisha; nta kundi twabigenza kuko ntaho dufite ho gukura ibyo kurya.”

Bavuga ko badafite amasambu yo guhinga ndetse na gahunda zigenerwa abatishboye ntizibagereho nk’uko babyijejwe ubwo bakurwaga mu ishyamba rya Gishwati mu karere ka Nyabihu.

Mukankusi Mariyana yagize ati “Nta hantu dufite ho guhinga,nta hantu tugira ho gukura inkwi zo gucana kuko nta mashyamba tugira; ubwo rero ni ugushakisha byakwanga inzu dufite tugakuraho akabaho kamwe mu gihe twabonye ibyo kurya.”

Umuyobozi w’akarere ka Rubavu wungirije ushinzwe imibereho myiza y’abaturage, Uwampayizina Marie Grace yavuze ko gucana imbaho zigize inzu bubakiwe ari umuco mubi udakwiriye umunyarwanda ariko ko bagiye kubegera babaganirize, barebe ko imyumvire yabo yahinduka na ho ku bijyanye n’imibereho ngo bagiye kubaha amasambu ari hafi aho kugira ngo babashe guhinga.

Yagize ati “Ikibazo bafite ni icy’imyumvire ikiri hasi. Bisaba kubegera tukabaganiriza tureba ko bahinduka, ikindi tugiye kureba uburyo ibyo abatishoboye bagenerwa babihabwa, gahunda za VUP zibagereho kandi tugiye kubaha imirima yo guhinga kugira ngo babashe kwitunga.”

Aba basigajwe inyuma n’amateka bari baturiye ishyamba rya Gishwati nyuma baza utuzwa i Rubavu mu murenge wa Cyanzarwe. Usibye inzu nta butaka bari barahawe bwo guhingamo.

Bamwe muri aba baturage barisenyera

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved