Rubavu: Abamotari bariye karungu basabwe kongera gutanga imisanzu yo kwishyura banki

Yanditswe na Mukwaya Olivier
Kuya 18 Kamena 2018 saa 08:02
Yasuwe :
0 0

Abamotari bo mu Karere ka Rubavu baramukiye mu gisa n’imyigaragambyo yo kwamagana ubuyobozi bwabo, babushinja ko buri kubaka amafaranga yo kwishyura ideni rya banki kandi ayo batanze mbere ubuyobozi bwarayarigishije.

Imbarutso y’ubwo burakari yatewe n’amafaranga 1000 asabwa buri mumotari ku kwezi kugira ngo bishyure ideni babereyemo banki, kubera miliyoni 30 Frw yabagurije ubwo bajyaga kugura inzu yo gukodesha.

Iyo nguzanyo yafashwe muri Nyakanga 2016 igomba kwishyurwa mu myaka itanu kugeza muri Nyakanga 2021.

Abo bamotari bavuga ko bari basanganywe miliyoni 17 Frw kuri konti, bagurizwa izindi miliyoni 30 Frw ziba miliyoni 47, barangije bagura inzu ya miliyoni 52 Frw mu buryo batabashije gusobanura aho andi yongeweho yaturutse.

Abamotari baganiriye na IGIHE bavuga ko guhera icyo gihe buri umwe yatangaga amafaranga 500 Frw buri cyumweru yo kwishyura iyo nguzanyo ku buryo bari bamaze gutanga nibura ibihumbi 55 Frw buri umwe.

Mu mwaka ushize bavuga ko bababwiye guhagarika ayo mafaranga kuko ideni ryarangiye ariko ubuyobozi buhindutse, abashya bongera kubasaba umusanzu wa 1000 Frw wo kwishyura rya deni bari bazi ko ryishyuwe kera.

Igenzura ryakozwe ngo ryerekanye ko aba bamotari bafitiye banki ideni rya miliyoni 28.8 Frw kandi nta handi agomba kuva hatari mu misanzu abamotari bagomba gutanga.

Intero n’inkikirizo ku bamotari i Rubavu ni ukugaragaza ko batiyumvisha uburyo basabwa kongera gutanga amafaranga, batazi irengero ry’ayo bari barakusanyije.

Umwe mu bamotari baganiriye na IGIHE utifuje ko amazina ye atangazwa, yavuze ko mbere batangaga 500 Frw buri cyumweru nyuma bakaza kubasaba kuyahagarika, ahubwo bagatanga 300 Frw y’ingobokamushinga.

Yakomeje agira ati “Twari tuzi ko byarangiye none baragarutse batwatse amafaranga y’inzu n’amafaranga bayikodesha ntituzi aho ajya, hari abayanyereje ntiturabona umuntu wafunzwe ngo yarayanyereje.”

Umuyobozi w’abamotari muri aka karere, Safari Phillipe, yavuze ko bishoboka ko uku kwivumbagatanya kwihishwe inyuma n’abari abayobozi bashinjwa kunyereza iyi misanzu, ku buryo bashaka ko abamotari banga gutanga imisanzu, banki ikagurisha iyo nzu maze nabo ntihazagire ubarebaho.

Yagize ati "Nanjye ndi umumotari ariko nasanze harimo impapuro mpimbano kuko nanjye nasanze hari inyemezabwishyu zanjye nishyuriyeho zitari mu mashini. Kuba dusaba abamotari kwishyura ni ukugira ngo banki itazaduca amande naho abagumura abamotari ni abahoze ku buyobozi bifuza ko inzu yabura ubwishyu ikagurishwa ntibakurikiranwe."

Umuyobozi wungirije w’Impuzamashyirahamwe y’abamotari mu Karere ka Rubavu, Kabanda Innocent, we yashimangiye ko icyo bashyize imbere ari ukurangiza ideni rya banki, nyuma bakazakurikirana abakekwaho ko banyereje imisanzu y’abamotari.

Yagize ati “Birazwi ko amafaranga yatanzwe ariko urareba ugasanga ntabwo yagezeyo yose kuko ubugenzuzi bwa RCA bugaragaza ko habuze miliyoni 12 Frw kandi ideni rya banki riracyarimo.”

Impuzamashyirahamwe y’abamotari yavuze ko bagomba kwishyura iryo deni, hanyuma bagasaba igenzura ry’ikigo gishinzwe amakoperative kuko bigagara ko ayanyerejwe arenga miliyoni 12Frw. Nibirangira nibwo abayanyereje ayo mafaranga bazakurikiranwa mu mategeko ariko banki yo yishyuwe.

Abamotari b'i Rubavu babyutse basaba ubuyobozi kubagaragariza aho amafaranga yabo yagiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza