Kwamamaza

RRA yashyize hanze urutonde rwa sosiyete 25 zitanga inyemezabuguzi za baringa

Yanditswe kuya 8-09-2016 saa 12:00' na Mukaneza M.Ange


Ikigo cy’Igihugu gishinzwe Imisoro n’Amahoro,RRA cyashyize ahagaragara ibigo 25 bikekwaho gutanga inyemezabuguzi za baringa ku bandi bacuruzi hagamijwe kunyereza imisoro ku nyongeragaciro(TVA).

Ikigo cy’Igihugu gishinzwe Imisoro n’Amahoro,RRA cyashyize ahagaragara ibigo 25 bikekwaho gutanga inyemezabuguzi za baringa ku bandi bacuruzi hagamijwe kunyereza imisoro ku nyongeragaciro(TVA).

Izi sosiyete zatangaga inyemezabuguzi za EBM zigaragaza ko zacuruje ikintu runaka kandi nyamara nta gicuruzwa na kimwe zigeze zitanga, wajya kureba ugasanga ntizigeze zinagaragaza TVA zakiriye.

Mu kiganiro n’abanyamakuru kuri uyu wa 8 Nzeri 2016, ubuyobozi bwa RRA bwavuze ko aba ari abantu 25 bashinze ibigo by’ubucuruzi, biyandikisha mu rwego rw’imisoro ndetse banahabwa utumashini twa EBM dukoreshwa mu gutanga inyemezabuguzi.

Komiseri Wungirije wa RRA, Bizimana Ruganintwari Pascal yavuze ko bigenda bigaragara ko hari abacuruzi benshi bakorana n’izi sosiyete hagamijwe guhimba inyemezabwishyu za EBM kugira ngo bazashobore kunyereza umusoro wa TVA.

Ati” Kubera ko dufite uburyo bw’ikoranabuhanga uyu munsi, tuba dukurikirana umunsi ku wundi kugira ngo turebe ibikorwa byabo n’abantu bakorana na bo, turasanga rero bisa nk’aho ari ibintu bimaze kuba icyorezo.”

Yakomeje avuga ko uru rutonde barushyize hanze kugira ngo abantu bose baziko bakoranye n’izi sosiyete ntibazatinyuke kuza kuri RRA gusaba kuba basubizwa TVA ndetse n’abari babifite muri gahunda babireke kuko bamaze gutahurwa.

Komiseri w’imisoro y’imbere mu gihugu, Kayigi Aimable, yavuze ko kugeza ubu imibare igaragaza ko izi sosiyete uko ari 25 zatanze inyemezabuguzi zifite agaciro ka miliyari 38 z’amafaranga y’u Rwanda, ni ukuvuga ibicuruzwa bavuga ko bacuruje, umusoro wa TVA wagakwiye gutangwa kuri aya mafaranga akaba ari miliyari 6.8.

Yakomeje avuga ko nk’uko bigaragara muri ‘Système’ ya RRA, abacuruzi bahawe izi nyemezabuguzi bavuga ko baguriye muri izi Sosiyete ari 700.

Muri aba, abagera kuri 230 kimwe n’izi sosiyete batangiye gukorerwa dosiye kugira ngo bakurikiranwe n’inzego z’ubutabera, ndetse banahagarikirwa ibyangomba bitandukanye birimo ibibemerera gupiganirwa amasoko cyangwa kuba bajya kurangura mu mahanga.

Kugira ngo RRA ibashe kuvumbura ko izi sosiyete zitanga inyemezabuguzi za baringa kandi nta cyo bacuruje, ni uko yagiye ibona hari abantu bavuga ko baguze ibintu runaka ariko yasubira inyuma igasanga aho bemeza ko babiguze ntibigeze bamenyekanisha umusoro.

Abacuruzi bajya gucurisha inyemezabuguzi muri izi sosiyete ni aba bagamije kugaragaza ko TVA batanze barangura yahwaniyemo n’iyo bakiriye bacuruza, cyangwa se bakavuga ko yabaye nke kugira ngo RRA ibishyure.

Kugeza ubu mu Rwanda habarirwa abasora banditse kuri TVA, 17230, muri bo 13867 akaba ari bo batanga inyemezabuguzi bakoresheje imashini za EBM.

RRA isaba abanyarwanda bose muri rusange kwirinda kunyereza imisoro cyangwa guhishira abayinyereza kuko ari ibikorwa by’iterambere ry’igihugu biba bisubira inyuma.
Kanda hano usome urutonde rwa sosiyete zitanga inyemezabuguzi za baringa

Bizimana Ruganintwari Pascal, Komiseri wungirije wa RRA
Bamwe mu banyamakuru bari bitabiriye ikiganiro na RRA

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved