RRA yakebuye abakwepa imisoro n’abahora bagaragaza ko bari mu cyiciro cyo hasi cy’abasora

Yanditswe na Akayezu Jean de Dieu
Kuya 30 Ukwakira 2019 saa 09:28
Yasuwe :
0 0

Ikigo cy’Igihugu gishinzwe Imisoro n’Amahoro, RRA [Rwanda Revenue Authority], gitangaza ko hari abantu bake batarumva akamaro k’imisoro na bamwe mu bafite ibigo bahora bashakisha impamvu bagamije kuguma mu cyiciro cyo hasi cy’abasora.

Imisoro n’amahoro ikusanywa mu gihugu, ni imwe mu nkingi ya mwamba yo kugabanya gutegereza inkunga n’inguzanyo z’amahanga ahubwo igihugu kikimakaza umuco wo kwigira.

Minisiteri y’Imari n’Igenamigambi itangaza ko mu mwaka w’ingengo y’imari wa 2019/20, amafaranga ateganya kwinjira azava imbere mu gihugu akomoka ku misoro n’amahoro angana na 54.2% by’ingengo y’imari yose.

Komiseri Mukuru wa RRA, Bizimana Ruganintwali Pascal, aherutse kuvuga ko gahunda y’igihugu ari uko abanyarwanda bose bakora ibikorwa by’ubucuruzi bibyara inyungu bagomba kujya batanga umusoro.

Hari bamwe mu bafite ibigo binini bagisyeta ibirenge mu bijyanye no kumenyekanisha imisoro bagamije gukwepa imisoro, bagambiriye kwigumira mu cyiciro cya mbere cy’abasora cyangwa kutayitanga.

Ubusanzwe RRA yashyizeho uburyo bwo gukoresha ikoranabuhanga mu kumenyekanisha umusoro bakoresheje telefone igendanwa, nk’uburyo bworoshye bwo gufasha abasora no kubarinda kujya gutonda imirongo kuri iki kigo.

Ikindi kandi RRA kandi yashyizeho ni uburyo bushya bwa EBM bwo gutanga inyemezabuguzi no kumenyekanisha imisoro hakoreshejwe ikoranabuhanga rya internet kuri mudasobwa buzwi nka Electronic Billing Machine Version II. Iri koranabuhanga rigamije koroshya imikorere y’ ubucuruzi ku bishyura imisoro n’amahoro.

Bizimana avuga ko usanga hari abacuruzi badakoresha inyemezabuguzi bagamije kutagaragaza neza imigendekere y’ubucuruzi bwabo ari nabo usanga akenshi baguma mu cyiciro cy’abasora bato.

Ati “Kugeza ubu abanditse mu bitabo by’imosoro barayitanga. Ikibazo dufite ni abantu bari mu bucuruzi batazamuka ngo bajye mu cyiciro cy’abasora banini, ugasanga umuntu ahora ashaka kugaragaza ko ari mu basora bato ariko wareba imikorere y’ikigo cye ugasanga yagakwiye kuzamuka ngo ajye mu basora banini.”

“Haracyarimo abacuruzi bamwe bakihisha kuko ntabwo twabashaka kubageraho bose icyarimwe ariko tuzifashisha ikoranabuhanga kugira ngo tubazamure mu byiciro dukurikije uko bacuruje. Ikibazo kiracyari imyumvire ariko nitunoza imikorere n’ubukangurambaga bizadufasha kubashyira mu byiciro bibakwiriye.”

Ibihano byaragabanyijwe

RRA itangaza ko kuri ubu ibihano ku bantu bakererewe kumenyekanisha cyangwa kwishyura imisoro byagabanyijwe aho wishyura 20% y’umusoro wagombaga kwishyurwa, iyo igihe ntarengwa kirenzeho iminsi itari hejuru ya 30.

Mu gihe warengejeho iminsi iri hagati ya 31 na 60 wishyura 40% ndetse waba warengeje iminsi 60 ukishyura 60%.

Uwamenyekanishije umusoro mu gihe giteganywa n’amategeko ariko ntiyishyure mu gihe gisabwa, yishyura ihazabu ingana na 10% iyo yishyuye mu minsi itarenze 30, 20% mu gihe yishyuye hagati ya 31-60, na 30% iyo yishyuye mu gihe kirenze iminsi 60.

Ibi bikaba bisimbura ibyari bisanzweho, aho uwakererwaga n’umunsi umwe gusa yahitaga acibwa ibihano bingana na 60% hatitawe ku minsi yakererewe.

Igihe cyo kwemererwa kwishyura mu byiciro cyarongerewe, kibasha kugera ku mezi 24 ku musoreshwa ubisabye, aho kuba amezi 12 gusa.

Ubwo yari mu biganiro byo gutangiza ibikorwa byahariwe kwizihiza umunsi wo gushimira abasora, Bizimana yavuze ko uku kugabanya ibihano bitazatiza umurindi bamwe bashaka gukwepa imisoro.

Ati “Koroshya ibihano biri mu ntego zacu kuko ubundi twumva ko nta n’ibihano bikwiye kubaho. Gusora ni inshingano nta muntu wagakwiye guhanirwa kutuzuza inshingano nk’umuntu ukunda igihugu.”

“Kugabanya ibihano ni byiza kuko hari benshi twavanaga ku isoko bigatuma ubucuruzi bwe buhagarara, dufite icyizere ko kugabanya ibihano bizatuma benshi bagaruka ku isoko. Ikindi kugabanya ibihano twabisabwe n’abasora.”

U Rwanda ruritegura kwizihiza ku nshuro ya 17 umunsi mukuru wo gushimira abasore ufite insanganyamatsiko igira iti “Dusore neza, twubake u Rwanda twifuza”. Umunsi nyir’izina uzaba tariki ya 22 Ugushyingo 2019.

Komiseri Mukuru wa RRA, Bizimana Ruganintwali Pascal, yavuze ko bakomeje kwigisha abantu impamvu bagomba gutanga imisoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza