RRA yabwiye Abadepite ko itakirebana ay’ingwe n’uturere mu by’imisoro

Yanditswe na Ishimwe Israel
Kuya 5 Ukwakira 2016 saa 04:47
Yasuwe : XX
0

Umuyobozi w’Ikigo cy’Imisoro n’Amahoro (RRA), Richard Tusabe yabwiye Abadepite ko imibanire y’icyo kigo n’uturere ari nta makemwa n’ubwo byabanje kugorana kuva aho icyo kigo giherewe inshingano zo gukusanya imisoro zari zifitwe n’abakozi b’akarere.

Abayobozi b’Uturere babanjirije RRA kunyura imbere y’Abadepite bagize Komisiyo ishinzwe gukurikirana imikoreshereze y’imari n’umutungo wa Leta(PAC) ngo batange ibisobanuro ku makosa yagaragaye muri raporo y’Umugenzuzi mukuru w’imari ya Leta mu mwaka wa 2014/2015, bagiye bagaragaza ko ikinyuranyo hagati y’imisoro yakiriwe n’iyari iteganyijwe cyaturutse ku buryo bushya bwo kwishyuza imisoro.

Akarere ka Kicukiro gaheruka gutanga ibisobanuro, kagaragayeho kuba karateganyaga kwinjiza miliyoni zisaga 600 kakinjiza miliyoni 88 zonyine. Umuyobozi wako, Dr.Nyirahabimana Jeanne yasobanuye ko byatewe n’imirimo RRA yagombaga kubanza gukora.

Ubwo RRA yari imaze gusobanura ku bitaragenze neza ahanini bishingiye ku micungire y’abakozi no kunoza uburyo bw’imisoreshereze, Depite Nkusi Juvenal, Umuyobozi wa PAC yagize ati “Mubanye mute n’uturere mu misoro?”

Mu gusubiza, Komiseri Mukuru w’Ikigo cy’Imisoro n’Amahoro, Richard Tusabe yavuze ko babanye neza kugeza ubu n’ubwo byabanje kugorana kubera ikibazo cy’imyumvire, aho hari abibwiraga ko icyo kigo kije kubambura inshingano zo kwakira amafaranga y’imisoro.

Komiseri Tusabe yagize ati “Mu misoro navuga ko tubanye neza, aho dufatiye izi nshingano tugiye kumara hafi imyaka itatu, mu by’ukuri habanje inzibacyuho itoroshye, bishingiye ku myumvire yo kuvuga ngo abantu baje kudutwara inshingano, kandi atari na ko bimeze.”

Inkunga y’abayobozi bakuru bagenda basura utwo turere barimo na Minisitiri w’Ubutegetsi bw’Igihugu, yatumye imyumvire igenda ihinduka, bakumva ko ayo mafaranga yose aba ajya mu isanduku ya Leta.

Ikindi cyemeza imibanire myiza ya RRA n’uturere ni uko hafi ya twose twamaze gusinya amasezerano y’ubufatanye n’iki kigo uretse Kicukiro na Gasabo na two twiteguye gusinya bidatinze.

Icyakora nta byera ngo de, mu mibanire ya RRA n’uturere haracyarimo utubazo ahanini dushingiye ku mafaranga icyo kigo gikata ku misoro kiba cyakiriye, aho bamwe bavuga ko 10% ari menshi, ariko na byo ngo birimo kuvugutirwa umuti.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE