RIB yakiriye ibirego birenga 1800 byo gusambanya abana mu mezi icyenda ya 2018

Yanditswe na Akayezu Jean de Dieu
Kuya 11 Ukwakira 2018 saa 08:21
Yasuwe :
0 0

Urwego rw’Igihugu rushinzwe Ubugenzacyaha, RIB, rwatangaje ko kuva muri Mutarama uyu mwaka rumaze kwakira ibirego 1830 by’abana batarageza imyaka y’ubukure bashyingirwa n’abasambanyijwe.
Byatangajwe mu kiganiro n’abanyamakuru kuri uyu wa 11 Ukwakira, mu gihe u Rwanda rwifatanyaga n’Isi kwizihiza Umunsi Mpuzamahanga wahariwe umwana w’umukobwa.
Imibare yerekana ko kuva mu 2015, ibirego by’abana bashyingirwa n’abasambanywa bigenda byiyongera kuko muri uwo mwaka ubugenzacyaha bwakiriye ibigera ku (...)

Urwego rw’Igihugu rushinzwe Ubugenzacyaha, RIB, rwatangaje ko kuva muri Mutarama uyu mwaka rumaze kwakira ibirego 1830 by’abana batarageza imyaka y’ubukure bashyingirwa n’abasambanyijwe.

Byatangajwe mu kiganiro n’abanyamakuru kuri uyu wa 11 Ukwakira, mu gihe u Rwanda rwifatanyaga n’Isi kwizihiza Umunsi Mpuzamahanga wahariwe umwana w’umukobwa.

Imibare yerekana ko kuva mu 2015, ibirego by’abana bashyingirwa n’abasambanywa bigenda byiyongera kuko muri uwo mwaka ubugenzacyaha bwakiriye ibigera ku 1505, mu 2016 bwakira ibirego 1577 naho mu 2017 bwakira 2135.

Umunyamabanga Mukuru wa RIB, Col. Ruhunga Jeannot yavuze ko kuva mu ntangiriro z’uyu mwaka bamaze kwakira ibirego 1830.

Yagize ati “Ariko byumvikane ko iyi mibare ahanini ni iy’abana bashyingirwa batarageza imyaka, noneho uko abantu bamanutse bakajya gukangurira abantu kuri ibi byaha bagatanga ibirego ugasanga abantu bagiye bashyingiranwa bidaciye mu mategeko.”

“Uko imibare izamuka ahanini biraterwa n’uko hari abantu babibona ko bitemewe bagatanga amakuru. Imibare igenda izamuka twe tubifata nk’aho ari uburyo bwo gutangira kwanga iki cyaha."

Gusa yavuze ko aho bigeze n’imyumvire ikaba yarateye imbere, icyifuzo ari uko iyi mibare igabanyuka kuko n’amategeko yashyizweho azatuma abantu bacika ku gusambanya abana bato.

Minisiteri y’Uburinganire n’Iterambere ry’Umuryango ivuga ko mu 2016, abana b’abakobwa bari hagati y’imyaka 16-19 bagera ku 17 500 batewe inda zitateguwe ndetse binabagiraho ingaruka zitandukanye zirimo no kuva mu ishuri.

Minisitiri w’Uburinganire n’Iterambere ry’Umuryango, Nyirasafari Esperance, yavuze ko abanyarwanda mu ngeri zose bakwiye gufatanya mu rugamba rwo guhashya abatera inda abangavu.

Ingingo ya 133 y’igitabo cy’amategeko ahana y’u Rwanda ivuga ko uhamijwe icyaha cyo gusambanya umwana ahanishwa igifungo kitari munsi y’imyaka 20 ariko kitarenze imyaka 25.

Iyo gusambanya umwana byakorewe ku mwana uri munsi y’imyaka 14, igihano kiba igifungo cya burundu kidashobora kugabanywa kubera impamvu nyoroshyacyaha

Iyo gusambanya umwana ufite cyangwa urengeje imyaka 14 byamuteye indwara idakira cyangwa ubumuga, igihano kiba igifungo cya burundu.

Muri uyu mwaka hamaze kwakirwa ibirego 1830 byo gusambanya abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza