RGB yasabiye DASSO kongererwa ubushobozi ngo yishimirwe nka polisi n’igisirikare

Yanditswe na Jean Pierre Tuyisenge
Kuya 5 Mata 2018 saa 10:02
Yasuwe :
0 0

Urwego rw’Igihugu rw’Imiyoborere (RGB) rwatangaje ko rwasanze Urwego rwunganira uturere mu gucunga umutekano, DASSO, rukwiye amahugurwa no kongererwa ubushobozi kugira ngo abaturage barusheho kurwibonamo nk’izindi nzego z’umutekano.

Muri raporo igaragaza uko abaturage babona imiyoborere n’imitangire ya serivisi mu nzego zibegereye, Citizen Report Card ya 2017, yagaragaje ko bafitiye icyizere cyinshi Ingabo z’u Rwanda ku kigero cya 99.1%, Polisi y’Igihugu (98.1%) naho DASSO ni kuri 84.7%.

Kuri uyu wa 5 Mata 2018, Komisiyo y’Ububanyi n’Amahanga Ubutwererane n’Umutekano mu Nteko Ishinga Amategeko , Umutwe wa Sena yagiranye inama na RGB mu gikorwa cyo kumenya no kugenzura iyubahirizwa ry’itegeko n° 26/2013 ryo ku wa 10/05/2013 rishyiraho Dasso rikanagena inshingano, imiterere n’imikorere byarwo.

Umukuru wa RGB, Prof. Shyaka Anastase, yabwiye abasenateri ko nyuma yo kubona ko uru rwego rutishimiwe cyane nk’izindi, usanga baba batarahawe amahugurwa ahagije nk’ay’abapolisi cyangwa abasirikare.

Yagize ati “Mu Ishusho y’uko abaturage babona imiyoborere n’imitangire ya serivisi mu nzego zibegereye, twajyaga dusaba ko inzego z’umutekano zaha Dasso amahugurwa, zikabongerera ubushobozi kugira ngo nayo ishobore kuzigwa mu ntege kuko biragaragara ko hari aho zibasiga, yongererwe ubushobozi, ihabwe amahugurwa.”

Prof. Shyaka avuga ko muri rusange urwego rwa DASSO rwateye intambwe ugereranyije n’urwa Local Defense rutarenze amanota 60 % mu kwishimirwa.

RGB ivuga ko mu Mujyi wa Kigali ariho gusa DASSO ihabwa amanota make kuko ari hagati ya 40% na 60%, ahanini bitewe no kuba ari ho hakunze kugaragara ibibazo byinshi birimo guhangana n’abazunguzayi, abacuruza ku dutaro, abasabiriza, abajura benshi n’ibindi.

Senateri Uyisenga Charles yasabye RGB ko ubutaha mu gukora raporo, yazajya ibaza n’izindi nzego uko zibona DASSO kugira ngo hagaragare uko ifatwa.

Yagize ati “Izi mbonerahamwe dufite zirerekana uko abaturage bafata urwego rwa Dasso, muzajye mubaza na ba bandi ishinzwe kunganira, baba abayobozi b’akarere niba uko abaturage bayibona ariko nako nabo bayibona, cyangwa polisi n’ingabo uko babona urwo rwego.”

Perezida wa Komisiyo y’Ububanyi n’Amahanga Ubutwererane n’Umutekano mu Nteko Ishinga Amategeko, Umutwe wa Sena, Senateri Rugema Michel, yavuze ko bazanajya muri polisi no mu turere kugira ngo barebe niba DASSO ikora neza inshingano yashyiriweho.

Perezida wa Komisiyo y’Ububanyi n’Amahanga Ubutwererane n’Umutekano mu Nteko Ishinga Amategeko, Umutwe wa Sena, Senateri Rugema Michel
Umukuru wa RGB, Prof. Shyaka Anastase muri Sena asobanura ku mikorere ya DASSO
Abasenateri bateze amtwi RGB yasabiye DASSO kongererwa ubushobozi
Senateri Uyisenga Charles
Perezida wa Komisiyo y’Ububanyi n’Amahanga Ubutwererane n’Umutekano mu Nteko Ishinga Amategeko, Umutwe wa Sena, Senateri Rugema Michel aganira n'Umukuru wa RGB, Prof. Shyaka Anastase

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza