RGB yagaragaje icyuho ku ruhare rw’abaturage mu bibakorerwa

Yanditswe na Jean Pierre Tuyisenge
Kuya 5 Mata 2018 saa 11:49
Yasuwe :
0 0

Urwego rw’Igihugu rw’Imiyoborere (RGB) rwatangaje ko rwasanze hari aho abaturage badahabwa umwanya mu bikorwa, bafashwe nk’abadafite ubumenyi.

RGB ivuga ko kuva mu 2009, Leta y’u Rwanda yashyizeho gahunda yo kuzamura uruhare rw’umuturage mu bimukorerwa, habanza kurebwa ishusho y’uko abaturage babona ibikorwa, icya kabiri hashyirwaho ikarita ngenzuramikorere (abaturage bandikaho ibyo bakeneye gukorerwa bakayigeza ku babayobora).

Ku wa 3 Mata 2018, RGB yagiranye ibiganiro n’Imiryango itari iya Leta ifasha abaturage kugira uruhare mu bibakorerwa iterwa inkunga na NPA (Norwegian People’s Aid) ibinyujije mu mushinga wa PPIMA (Public Policy Information, Monitoring and Advocacy), hagamijwe kureba aho abaturage bageze bagira uruhare mu bibakorerwa.

Muri ibyo biganiro, Umukuru wa RGB, Prof. Shyaka Anastase, yavuze ko kugeza ubu hari abaturage batagira uruhare mu bibakorerwa abayobozi bitwaje ko ari iby’abize cyane.

Yagize ati “Iyo abantu bavuga ngo uruhare rw’abaturage mu bibakorerwa mu birebana na politiki y’igihugu cyabo, icyerekezo kijyamo, kwishakamo ibisubizo aho batuye, iyo ubabajije bijya hejuru cyane, haba ari mu matora no kwishimira uburyo batoye, haba mu nteko z’abaturage no kwishimira uburyo bishakamo ibisubizo, haba ari mu muganda, hose bijya hejuru cyane.”

Yakomeje ati “Ariko hari urundi ruhare rw’abaturage mu bibakorerwa rukiri hasi. Ibi dukunze kuvuga ngo ni ibintu by’abahanga, aha bavuga igenamigambi, hari abibwira ko abaturage batabizi cyangwa ntibabahe umwanya uhagije, ariko igikenewe ni ukureba ngo iryo genamigambi uraribwira ute umuturage ku buryo nawe arigiramo uruhare.”

Avuga ko kuba byashyirwa mu buryo bw’imibare cyangwa mu mbonerahamwe zikomeye umuturage atashobora atari cyo kibazo ahubwo ari imyumvire, ati “Hari abibwira ngo ibi bintu birimo ubwenge bwinshi ntabwo abaturage babishobora ibyo nibyo bikwiriye guhinduka.”

Umuturage wo mu Karere ka Nyaruguru, Muhimpundu Anonciata, , yavuze ko ubu basigaye bafite uruhare runini mu bibakorerwa ariko agasaba ko abayobozi ba RGB bakwiye kujya bamanuka bagasanga abaturage.

Yagize ati “Ikarita ngenzuramikorere yatumye abaturage bafunguka nta we udasobanukiwe icyo ingengo y’imari imumariye, gusa turasaba ko RGB yashyira imbaraga mu bikorwa by’abaturage nayo ikaza hafi yabo ikajya ikurikirana ibigera ku baturage n’ibibakorerwa.”

Ubushakashatsi bwashyizwe ahagaragara n’Umushinga wa PPIMA mu 2017, bwagaragaje ko iyo karita yagiye igira akamaro gakomeye kuko abaturage bagaragaje ibibazo 665 kuva muri Mutarama kugeza muri Kamena, muri byo 154 bingana na 23% byarakemutse mu gihe ibigera kuri 214 (32%) byari mu nzira zo gukemuka, ibindi 297 (45%) byari bitarakorwaho.

Nubwo hari aho uruhare rw’abaturage mu bibakorerwa rukiri hasi, RGB ivuga ko hari aho bimaze gutera intambwe nko mu bijyanye no gutanga ibitekerezo bya politiki biri ku kigero cya 90%, mu kwishakamo ibisubizo bikaba biri kuri 85%.

Umukuru wa RGB, Prof. Shyaka Anastase

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza