RGB igiye kumurika ibipimo bishya by’imiyoborere mu Rwanda

Yanditswe na Akayezu Jean de Dieu
Kuya 29 Ukwakira 2019 saa 05:56
Yasuwe :
0 0

Urwego rw’Igihugu rw’Imiyobore, RGB, rugiye gutangaza ku nshuro ya gatandatu ibipimo bishya by’imiyoborere mu Rwanda bizwi mu rurimi rw’Icyongereza nka ‘Rwanda Governance Scorecard (RGS)’.

Ni icyegeranyo cy’ibipimo by’imiyoborere mu Rwanda gikorwa na RGB buri mwaka hagamijwe kugaragaza ishusho y’uko imiyoborere ihagaze mu gihugu mu byiciro bitandukanye no kugaragaza ingamba mu gushyiraho politiki mu nzego zitandukanye z’igihugu.

Biteganyijwe ko ku wa Kane tariki 31 Ukwakira 2019, aribwo hazatangazwa ibi bipimo mu gikorwa kizitabirwa n’abayobozi batandukanye mu nzego za Leta, abafatanyabikorwa mu iterambere ry’igihugu, abashakashatsi n’impuguke, abahagarariye imiryango ya sosiyete sivile n’abanyamadini, abikorera ndetse n’itangazamakuru.

Igipimo cy’Imiyoborere mu Rwanda kigizwe n’inkingi zirimo Iyubahirizwa ry’amategeko, Uburenganzira mu bya politiki n’ubwisanzure bw’abaturage, imiyoborere abaturage bagizemo uruhare kandi idaheza.

Hari kandi umutekano, kuzamura imibereho myiza y’abaturage, kurwanya ruswa no gukorera mu mucyo, ireme ry’imitangire ya serivisi, imiyoborere mu bukungu n’ubucuruzi. Izi nkingi zigizwe n’ibipimo 36 n’udupimo 130.

Mu bipimo byabanje, inkingi y’umutekano niyo yagiye iza ku isonga mu gihe iy’ireme ry’imitangire ya serivisi yo yakomeje kuza inyuma y’izindi. Naho inkingi y’iyubahirizwa ry’amategeko niyo yagiye igaragaza kuzamuka cyane kurusha izindi nkingi mu myaka ishize.

Igipimo cy’imiyoborere mu Rwanda gikorwa hifashishijwe amakuru atandukanye harimo atangwa n’ibyegeranyo mpuzamahanga n’amakuru ashingiye ku bipimo byo mu gihugu imbere.

Avuga kuri ubu bushakashatsi buzashyirwa ahagaragara, Umukuru w’Urwego rw’Igihugu rw’Imiyoborere, Dr Usta Kaitesi, yavuze ko ubu bushakashatsi bugaragaza ibipimo by’imiyoborere mu Rwanda ari ingirakamaro cyane kuko bufasha igihugu kugendera ku mahitamo yacyo yo kwigenzura mu miyoborere.

Yakomeje agira ati “Iki gipimo gitanga ku buryo buhoraho isura nyayo igaragaza uko igihugu kigenda kigera ku ntego cyihaye, haba muri Gahunda y’imyaka 7 ya NST1 ndetse n’izindi ntego zo kwihutisha impinduka mu iterambere igihugu cyihaye.”

Igipimo cy’Imiyoborere mu Rwanda cyasotse ku nshuro ya mbere mu mwaka wa 2010. Ibigaragzwa n’iki gipimo byagiye bifasha mu gushyiraho poliki n’ingamba zigamije kwimakaza imiyoborere myiza ndetse no kwihutisha iterambere.

Umukuru w’Urwego rw’Igihugu rw’Imiyoborere Dr Usta Kaitesi, yavuze ko ubu bushakashatsi bugaragaza ibipimo by’imiyoborere mu Rwanda ari ingirakamaro cyane kuko bufasha igihugu kugendera ku mahitamo yacyo yo kwigenzura mu miyoborere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza