Rev. Dr Antoine Rutayisire yatabarije abashakanye bakomeje gutandukana ubutitsa

Yanditswe na Habimana James
Kuya 2 Nyakanga 2019 saa 11:18
Yasuwe :
0 0

Umuyobozi wa Paruwasi ya Remera mu Itorero Angilikani, Rev Past Dr Antoine Rutayisire, yavuze ko ikibazo cy’abashakanye nyuma bagasaba gatanya gihangayikishije bitewe n’uburyo gikomeje kwiyongera.

Kugeza mu Ugushyingo 2018, hari hamaze gucibwa imanza za gatanya 1311, ni ubwikubwe bw’inshuro 19 ugereranyije n’umwaka wa 2017.Imibare igaragaza ko mu 2016 ingo zatandukanye zari 21, mu 2017 ziba 69.

Ubwiyongere bw’abatandukana barashakanye si ikibazo ku Rwanda gusa kuko kinagera ku Isi yose.

Rev. Dr Antoine Rutayisire yabitangaje ubwo abagabo bo mu Itorero Angilikani bizihizaga imyaka 11 bamaze bibumbiye hamwe mu muryango Father’s Union, ku wa 30 Kamena 2019.

Dr Rutayisire yagaragaje ko ingo nyinshi zikomeje gutandukana kubera kwifuza imitungo n’ubukire.

Yagize ati “Ku Isi yose imiryango ikomeje gutandukana, abantu bakomeje kugira amafaranga, kwiga ariko iyo miryango ikomeje gutandukana.”

Rev. Dr Antoine Rutayisire yabivuze mu gihe imibare itangwa n’inkiko, igaragaza ko gatanya zizamuka ubutitsa.

Iyi mibare igaragaza ko gatanya zatanzwe n’inkiko zikubye inshuro 62 bingana na 6,200% mu myaka itatu ishize.

Ati “Iyi mibare ni babandi baba baragiye mu nkiko, abandi babana mu buryo bubi mu ngo zabo ni benshi ku rusha aba.”

The New Times yanditse ko ubwo Rev Rutayisire yagarukaga ku cyanditswe cyo muri Zaburi 127, yasabye abantu kubaka imiryango yabo bashingiye ku kuri, urukundo, kubaha Imana no kubahana.

Father’s Union ihuza abagabo bubatse ukaba ugamije gushyira imbere ubukirisitu mu miryango, washinzwe muri iri torero mu 2008; uhuje abagabo 300 muri Angilikani ya Remera gusa.

Rutayisire yavuze ko uyu muryango utegura abantu kubaka ingo zabo hashingiwe kuri gahunda y’Imana, ingo zihimbaza Imana n’abantu bejejwe.

Yagize ati “Uyu muryango ugamije kubaka ingo aho hari ibintu bitatu bigomba kuhabera, aho Imana yubahirwa, aho umugabo n’umugore bahora bishimye kandi umwe agatuma mugenzi we yishima, aho babonera umugisha n’amahoro, hakaba kandi ahantu aho abana babo bafite ubuzima kandi babayeho neza mu bwenge, mu mibereho isanzwe no mu mwuka.”

Umuyobozi wa Father’s Union, Kazubwenge James, yavuze ko ibikomeje gutuma ingo zitandukana harimo amakimbirane yo mu miryango, ibi bikaba bigira ingaruka ku mibereho y’umuryango muri rusange.

Yagize ati “Umuntu wubaha Imana ntakora icyaha, iyo uri muri uyu muryango uba ufite intego, ukunda umugore wawe kandi ukita ku muryango ku buryo urugo ruhora rushyize hamwe.”

“Uyu munsi abashakanye baratandukana kubera ko bamwe bashyira imbere ibintu mu gihe barimo guteretana, iyo ibyo bintu bigabanutse nyuma yo gushakana niho usanga habayeho bamwe batandukana.”

Mugiraneza Jean d’Amour na Mukanyandwi Angélique bamaranye imyaka irindwi aho bafitanye abana babiri, mu buhamya bwabo bavuga ko bungukiye byinshi muri uyu muryango.

Mukanyandwi yavuze ko bo badafite gahunda yo gutandukana kuko bubakiye urukundo rwabo kuri Yesu.

Paruwase ya St. Peter i Remera kandi yanahaye ikaze abanyamuryango bashya 31 binjiye muri Father’s Union, umuryango watangijwe mu 2008, ukaza no gutangizwa ahandi mu gihugu.

Rev Dr Antoine Rutayisire avuga ko gatanya z'ingo muri iyi minsi zihangayikishije cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza