Kwamamaza

REG yijeje Abadepite igabanuka ry’igiciro cy’amashanyarazi

Yanditswe kuya 30-09-2016 saa 17:11' na Philbert Hagengimana


Mu kumva ibisobanuro ku makosa yagaragajwe n’Umugenzuzi mukuru w’imari ya Leta mu yahoze ari EWSA, REG nka kimwe mu bigo biyikomokaho, yijeje Abadepite igabanuka ry’igiciro cy’amashanyarazi, kongera ingano y’aboneka biciye mu gucunga neza ayo igihugu kibona.

Iterambere mu bukungu, rijyana n’ubwiyongere bw’abakenera amashanyarazi, dore ko intego y’u Rwanda mu myaka iri imbere ari ugucanira buri munyarwanda wese, byaba na ngombwa bagasagurira n’abaturanyi bo mu bindi bihugu.

Hashingiwe ku gaciro k’ifaranga ry’u Rwanda no ku mirimo ikorwa ngo Abanyarwanda babone amashanyarazi, byatumye muri Kanama 2015, igiciro cyayo cyiyongera aho ubaze muri kilowati, imwe yavanwe ku mafaranga 126 igashyirwa ku 182, aho tugenekereje icyo gihe yari ahwanye n’amadolari ya Amerika 0,24.

Hari ibyiringiro by’igabanuka ry’igiciro cy’amashanyarazi

Ubwo Komisiyo y’Inteko Ishinga Amategeko, Umutwe w’Abadepite, ishinzwe gukurikirana icungwa n’ikoreshwa ry’imari n’umutungo wa Leta (PAC) yakiraga icyahoze ari EWSA ngo hasobanurwe amakosa yagaragaye muri raporo y’Umugenzuzi mukuru w’imari ya Leta, ni bwo hatangajwe ibyiringiro by’igabanuka ry’igiciro cy’amashanyarazi.

Ubwo umwe mu badepite bagize PAC yabazaga igikorwa kugirango hagabanuke igiciro cy’amashanyarazi cyinubirwa n’abaturage, Umuyobozi mu kigo cy’igihugu cy’ingufu uyobora ishami ryo kongera ingufu (EDCL) Kamanzi Emmanuel yatangaje ko hari gahunda yo kuba byagabanutse bitarenze umwaka utaha.

Ati “Ntabwo ari umwaka utaha gusa kuko n’amashanyarazi tugurisha uyu munsi yaragabanutse, igiciro tugenderaho cyaragabanutse ku rwego rw’inganda no ku rwego rw’umuturage wa nyuma. Igituma duteganya ko azagabanuka, nta kindi ni uko twagabanyije amafaranga yagendaga ku bakozi (amafaranga ya operations), ku buryo byagabanyije ku giciro umuturage yishyuraga.”

Yakomeje avuga ko hari n’imishinga myinshi ibyara amashanyarazi ubu yamaze kurangira, ati “Hari imishinga myinshi yarangiye iduha umuriro uhendutse, bigatuma igiciro twacuruzagaho umuriro kigabanuka.”

Icyakora, Kamanzi ngo ntiyahita atangaza uko igiciro cy’amashanyarazi kizaba gihagaze, kuko ibyo biri mu bubasha n’inshingano z’ikigo cy’igihugu gishinzwe imirimo imwe n’umwe ifiteiye igihugu akamaro (RURA), ariko ikizwi ni uko nta gihindutse ibyo biciro bishya byatangirana na Mutarama 2017.

Ibiciro by’amashanyarazi biheruka gushyirwaho, byari byazamuwe ku muturage usanzwe, ariko byagabanyijwe ku rwego rw’inganda, ndetse ibyari byashyizweho byari hejuru ugereranyije n’ikiguzi cyo mu karere ka Afurika y’Iburasirazuba.

Mu Rwanda Kilowati imwe yari yashyizwe ku madolari 0,24 mu gihe ahandi ari 0,12, gusa ngo bikaba byari byanatewe n’agaciro k’ifaranga ry’u Rwanda uko ryari rihagaze icyo gihe.

Kamanzi anavuga ko iryo gabanuka ry’igiciro cy’amashanyarazi hakiri gusuzumwa uburyo ryajyanishwa n’ibyiciro by’ubudehe, ku buryo abakene n’abifite batajya bagurira umuriro ku biciro bimwe.

Umuriro uhari ntungana n’ucuruzwa

Kamanzi akomeza avuga ko ikinyuranyo hagati y’umuriro uboneka ndetse n’ucuruzwa, gituruka ku bafatabuguzi bakoresha amashanyarazi, aho abakenera umuriro mwinshi nk’inganda bakiri bake ugereranyijwe n’abakiliya bakenewe.

Ati “Icyo kibazo kijyanye no kuba abafatabuguzi bacu badakoresha umuriro uko uhari, bigatuma habaho ikinyuranyo hagati y’umuriro dufite n’uwo bagura.”

Aha ni ho Umuyobozi wa EDCL yahereye asaba ko abareshya abashoramari, bagerageza no kwibanda ku bakenera amashanyarazi menshi, ati “Ni byo nakomeje kuvuga ko inzego zose, Minisiteri y’Inganda, RDB n’abandi bareshya abashoramari, batangira kujya bareba uburyo hanashorwa imari mu nganda zikoresha amashanyarazi menshi.”

Eng. Mugiraneza Jean Bosco, Umuyobozi wa REG

Kugeza ubu ngo abakoresha umuriro mwinshi ni abaturage n’amatara rusange, ariko hakwiye no kurebwa n’ibijyanye n’inganda zikoresha amashanyarazi kugira ngo EDCL yirinde gukorera mu gihombo.

Uburangare mu kwimura abantu bushobora guhombya REG agera muri miliyari 3
Ubwo Abadepite babazaga ku mwenda wa miliyari 13 umugenzuzi mukuru w’imari ya Leta yagaragaje ko abafatabuguzi bari babereyemo EWSA, Ubuyobozi bwa REG bwagaragaje ko hishyujwemo miliyari ziyingayinga 9, ariko hakaba n’izindi miliyari zisaga 3 bitizewe neza ko zizishyurwa.

Kamanzi avuga ko impamvu batizeye kuzazishyuza, ari uko abazibabereyemo umwenda kugeza ubu batazwi aho baherereye, aho yatanze urugero rw’ibigo byahozeho ariko byaseswa ugasanga ntihishyujwe umwenda babereyemo ikigo gishinzwe amazi n’ingufu.

Ibyo kandi ngo byiyongeraho abaturage ku giti cyabo bimuwe mu manegeka cyangwa bimuwe ku nyungu rusange, ariko ugasanga abakozi b’ikigo cyari gishinzwe amazi n’amashanyarazi baraje batwaye ibikoresho byabo ariko ntibishyuze umwenda abo baturage bari bakibereyemo.

Gusa ngo ntihabayeho guterera iyo, ahubwo hagenda hashakishwa amakuru, ku buryo uzajya abonerwa amakuru azajya yishyuzwa, akanaboneraho guhamagarira ubunyangamugayo abarebwa n’icyo kibazo bakibwiriza kuza kwishyura.

Ibindi byagarutsweho n’Abadepite bagize PAC ni amafaranga y’u Rwanda agera kuri miliyoni 908 zishyuwe REG zikamara iminsi isaga 558 ataragera kuri konti kandi ubusanzwe byari gufata iminsi itatu gusa, aho kuba hafi imyaka ibiri.

Hari n’ibihombo bigera kuri 23% by’amashanyarazi, ibibazo by’abaturage badahabwa ingurane zabo bagera ku 3200 n’imishinga imwe n’imwe yadindiye harimo iya Biogaz n’iyo gukwirakwiza ingufu zikomoka ku mirasire y’izuba.

Aha Eng.Mugiraneza Jean Bosco, Umuyobozi wa REG yavuze ko ayo mashanyarazi abura bitewe n’uko ingomero zimwe z’amashanyarazi zagiye zibarirwa ko zikora amasaha yose kandi hari izikora amasaha ane cyangwa atandatu ku munsi gusa.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved