REG yaguye gitumo uwibaga umuriro anatunze mubazi mu buryo butemewe

Yanditswe na Iradukunda Serge
Kuya 16 Nyakanga 2019 saa 08:02
Yasuwe :
0 0

Ikigo cy’Igihugu gishinzwe Ingufu (REG), cyatahuye umugabo wo mu Murenge wa Gatsata, wakoreshaga amashanyarazi ayibye ndetse anatunze mubazi (cash power) mu buryo bunyuranyije n’amategeko.

Abakozi ba REG ubwo bari mu igenzura basanze uyu mugabo usanzwe akora imirimo yo gusudira yakoreshaga umuriro utabanje kunyura muri mubazi yifashishije agasinga yacometseho ku ruhande.

Umuyobozi wa REG ishami rya Jabana, Habimana Marcel, yatangaje ko uyu mugabo yibaga umuriro ariko akanyuzamo akanawugura kugira ngo ajijishe.

Ati “Mwabonye ko basobanuye ko hari umuriro bagiye bagura ariko umuriro baguze ni uw’amafaranga make cyane ashoboka yo kugira ngo nibura berekane ko bagura, mu by’ukuri ntabwo umuriro w’amafaranga 500 wasudira ibyuma bakora.”

Habimana yongeyeho ko uretse icyaha cyo kwiba umuriro uyu mugabo yakoze n’amakosa kugira ngo abone mubazi atunze kuko yayiguze n’umuturage mugenzi we.

Ati “Mu byo twagerageje kumubaza twarebye dusanga iyo cash power nayo itamwanditseho, yanditse mu mazina yundi muntu bivugwa ko bayiguze.”

Uyu mugabo ushinjwa kwiba umuriro yavuze ko yemera ko umuriro wibwe ariko nta ruhare yabigizemo kuko nawe yamenye aya makuru ari uko abakozi ba REG bamuhamagaye.

Ati “Nahageze ndareba nsanga koko nibyo, ni agasinga karambitseho koko kariho ndabyemera ariko ako gasinga ntabwo ari njye wagashyizeho sinzi n’igihe kagiriyeho”

Umuyobozi wa REG ishami rya Jabana yibukije ko ikigo akorera aricyo cyonyine gifite ububasha bwo gutanga mubazi anasaba abaturage kwirinda kugwa mu makosa nk’aya ndetse bakihutira gutanga amakuru y’ahakorerwa ubu bujura.

Amategeko agena ko umuntu winjira muri mubazi mu buryo butemewe, ukoresha uburyo butemewe mu gufata, gukurura, kuyobya, gutuma hafatwa, havanwa ku muyoboro w’umuriro w’amashanyarazi cyangwa ukoresha umuriro w’amashanyarazi yahawe mu buryo bw’uburiganya cyangwa butemewe n’amategeko, aba akoze icyaha.

Iyo abihamijwe n’urukiko, ahanishwa igifungo kitari munsi y’amezi atandatu ariko kitarengeje umwaka n’ihazabu y’amafaranga y’u Rwanda atari munsi ya miliyoni imwe ariko atarenze miliyoni eshanu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza