Abasirikare 101 birukanwe kubera imyitwarire mibi

Yanditswe na Ishimwe Israel
Kuya 12 Ugushyingo 2016 saa 10:27
Yasuwe :
0 0

Inama y’Abaminisitiri yateranye kuwa Gatanu, tariki ya 11 Ugushyingo 2016 yemeje amateka yirukana abasirikare 101 kubera amakosa y’imyitwarire bakoze.

Aba basirikare birukanwe hagendewe ku itegeko Nº 38/2015 ryo kuwa 30/07/2015 rigena igabanya ry’umubare w’abagize Ingabo z’u Rwanda, kubakura ku murimo, kubasubiza mu buzima busanzwe no kubirukana.

Ingingo yaryo ya 7 iteganya ko ugize Ingabo z’u Rwanda ashobora kwirukanwa kubera imyitwarire mibi ikabije, ibi bikemezwa n’umuyobozi ubifitiye ububasha.

Kuri ba Ofisiye, kwirukanwa bikorwa n’iteka rya Perezida wa Repubulika, naho kuri ba Ofisiye bato n’abasirikare bato bigakorwa n’Iteka rya Minisitiri w’Ingabo z’Igihugu dore ko ari nayo Minisiteri bagirana amasezerano mu gihe binjiye mu gisirikare.

Umuvugizi w’Ingabo z’u Rwanda, Lt Col. René Ngendahimana yatangaje ko mu birukanwe harimo ba Ofisiye bagera kuri 21, naho abandi basigaye bakaba ari abasirikare bato, baranzwe n’imyitwarire mibi ikabije.

Yagize ati “Igisirikare cy’u Rwanda kigira imyitwarire kigomba kugenderaho, iyo rero udashoboye kuyikurikiza hari amategeko yashyizweho akurikizwa kugira ngo ube wahanwa kuko igisirikare kitihanganira imyitwarire mibi.”

Mu mwaka ushize wa 2015,abasirikare bato 33 bo muri RDF birukanwe kubera imyitwarire mibi n’ibindi bitajyanye n’amahame ngengamyitwarire y’igisirikare cy’u Rwanda.

Umuvugizi w’Ingabo z’u Rwanda, Lt Col. René Ngendahimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza