RDF yamaganye umusirikare ushinjwa gukubita umwana agapfa

Yanditswe na Kanamugire Emmanuel
Kuya 7 Nzeri 2016 saa 04:44
Yasuwe :
0 0

Ubuyobozi bw’Ingabo z’u Rwanda bwamaganye igikorwa cy’umwe mu basirikare bazo wahohoteye umuhungu witwa Mbarushimana Théogène, amushinja kwiba mu modoka ye, akamukubita kugeza ashizemo umwuka.

Ibi byabereye mu Mudugudu w’Ubumwe, Akagari ka Rubirizi ho mu Murenge wa Kanombe mu ijoro ryo ku Cyumweru tariki ya 4 Nzeri, ubwo Maj. Dr Aimable Rugomwa usanzwe ari n’umuganga mu Bitaro Bikuru bya Gisirikare bya Kanombe yakubitaga uyu mwana bikamuviramo urupfu.

Kuri uyu wa Gatatu ingabo z’u Rwanda zasuye umuryango w’umwana wishwe hagamijwe kuwufata mu mugongo.

Umuvugizi w’Ingabo z’u Rwanda, Lt Col. René Ngendahimana yabwiye itangazamakuru ko bamagana iki gikorwa mu buryo bukomeye.

Yagize ati "RDF iramagana iki gikorwa ndengakamere.Inshingano yacu ni ukurinda, si ukwica.Mu nshingano zacu, mu muco wacu, kwica abantu ntibibamo ahubwo dushinzwe kubarinda, dushinzwe ubuzima bwabo, ni na yo mpamvu bikimara kuba hahise hatangira iperereza maze abakekwaho ibyaha barafatwa."

Lt Col René Ngendahimana kandi yavuze ko ibyo Maj.Dr Aimable Rugomwa na mukuru we bakoze ari amahano by’umwihariko muri RDF bikaba ari na yo mpamvu bagiye gufata mu mugongo umuryango wabuze umwana kugira ngo bawugaragarize ko bifatanyije na wo muri ibi byago.

Yagize ati "RDF yagushije ishyano kuko umwe muri twe, Maj Dr Aimable Rugomwa afatanyije na mukuru we babanaga bishe umwana, icyo gikorwa cyaratubabaje bityo bikaba byari inshingano kuri twebwe kuza gufata mu mugongo uyu muryango kugira ngo tuwugaragarize ko turi kumwe muri ibi bihe byo gupfusha umusore w’imyaka 18 wari ukiri umunyeshuri, wari ugifite imbere harehare, wari kuzafasha umuryango we, wari kuzifasha, ni ibintu bikomeye. Ni ibyago bikomeye."

Gahutu Jean Pierre Se wabo w’uyu mwana akaba ari na we wamureraga, yavuze ko bababajwe n’urupfu rw’umwana wabo, ariko agasaba ko ubutabera buboneye bwahabwa umuryango we.

Yagize ati "Icyifuzo cy’umuryango ni uko ubutabera bwakorwa umuryango ugahabwa ubutabera kuko wiciwe umwana w’umujyambere, nta wuzamuzura ariko nibura ubutabera bukorwe kandi twizeye ko ubutabera bukorwa nk’uko inzego z’u Rwanda zisanzwe zirengera umuturage wese."

Uyu mugabo kandi yavuze ko bishimiye cyane kuba ingabo z’u Rwanda (RDF) zabafashe mu mugongo mu bihe by’akababaro barimo, kuko ngo n’ubusanzwe biri mu muco wa kinyarwanda.

Maj Dr Aimable Rugomwa na mukuru we babanaga bakekwaho urupfu rw’uyu mwana, batawe muri yombi n’inzego za gisirikare mu gihe iperereza rigikomeje kugira ngo bazashyikirizwe inzego z’ubutabera ngo baburanishwe ku byaha bakurikiranweho.

Umurambo wa Mbarushimana wagiye gushyingurwa mu Karere ka Gicumbi ari na ho uyu muhungu yakomokaga kuko yabaga kwa Se wabo mu mujyi wa Kigali.

Abasirikare ba RDF ubwo bari bagiye gufata mu mugongo umuryango w'umwana wishwe
Gahutu yashyikirijwe inkunga yagenewe na RDF
Gahutu wareraga uyu mwana yasabye ko umuryango wahabwa ubutabera
Umuvugizi w'Ingabo z'u Rwanda, René Ngendahimana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza