RDC: Kiliziya Gatolika yahagaritse kwitabira ibiganiro by’amahoro

Yanditswe na Philbert Girinema
Kuya 21 Nzeri 2016 saa 08:59
Yasuwe :
0 0

Kubera urupfu rw’abantu 17 baguye mu bushyamirane hagati y’abapolisi n’abatavuga rumwe na leta muri Repubulika Iharanira Demokarasi ya Congo, Kiliziya Gatolika yatangaje ko yafashe umwanzuro wo kuba ihagaritse kwitabira ibiganiro by’amahoro.

Itangazo ryashyizwe ahagaragara n’Inama Nkuru y’Abepisikopi muri RDC (Cenco) ku wa Kabiri rivuga ko ku bwo guha icyubahiro abishwe, bikwiye ko baba bahagaritse kwitabira ibiganiro by’amahoro kugira ngo babunamire.

Iri tangazo rikomeza rivuga ko Cenco yababajwe n’ibyabaye kandi yamagana ubugizi bwa nabi aho bwaba buturutse hose ndetse isaba ko hakorwa iperereza, ababigizemo uruhare bakamenyekana.

Umuyobozi w’Inama Nkuru y’Abepisikopi muri RDC, Padiri Donatien Nshole Babula yabwiye Jeune Afrique ko bakurikije uko ibintu byifashe mu gihugu, imyanzuro y’ibi biganiro idashobora kunyura abaturage bose.

Yakomeje avuga ko Abepisikopi bakozwe ku mutima n’amaraso yamenetse kugira ngo Itegeko Nshinga ryubahirizwe, akaba ari ikimenyetso ko bakwiye gushyira imbaraga mu guharanira ko amashyaka yose yakwitabira ibiganiro.

Cenco yifuza ko hasobanurwa neza ko Perezida Joseph Kabila uyobora RDC, atazagaragara mu bakandida bazitabira amatora agomba gutegurwa mu minsi ya vuba.

Ku wa Mbere nibwo abantu 17 barimo abapolisi batatu baguye mu bushyamirane hagati y’inzego z’umutekano n’abatavuga rumwe n’ubutegetsi bari mu myigaragambyo basaba ko ingangabihe y’amatora iteganywa n’Itegeko Nshinga yubahirizwa. Abatavuga rumwe na leta bo bavuga ko abapfuye basaga 50.

Cenco yavuze ko abamaze kugwa mu mvururu bakwiye kunamirwa

angel@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza