Kwamamaza

RBC yasobanuye bigoranye ibibazo byagaragajwe n’umugenzuzi w’Imari ya Leta

Yanditswe kuya 26-09-2016 saa 11:37' na Philbert Hagengimana


Ikigo cy’Igihugu cy’Ubuzima mu Rwanda, RBC, kitabye Komisiyo y’Imikoreshereze y’imari n’Umutungo bya Leta, PAC, kugira ngo gitange ibisobanuro ku makosa yagaragajwe na raporo y’umugenzuzi mukuru w’imari ya Leta mu mwaka wa 2014-2015.

Ubwo kuri uyu wa mbere tariki 26 Nzeri 2016 bamwe mu bayobozi b’iki kigo barimo Umuyobozi wacyo Prof. Condo Jeanine, James Kamanzi, umuyobozi wungirije w’iki kigo na Usta Kayitesi, umuyobozi w’inama y’ubutegetsi ya RBC basobanuriraga abadepite bagize iyi Komisiyo iby’amakosa yagaragajwe na raporo y’umugenzuzi mukuru w’imari ya Leta.

Ibibazo byagaragajwe n’Umugenzuzi w’imari ya Leta bikubiye mu byiciro bitatu: Imiyoborere, Imikoranire n’imicungire y’imari.

Ibibazo by’imiyoborere

Mu gusobanura ikibazo cy’imiyoborere, Usta Kaitesi, Umuyobozi wungirije w’inama y’ubutegetsi ya RBC yasobanuriye PAC ko icyo kigo cyashinzwe ku itariki 7 Werurwe 2011, aho hakomatanyijwe ibigo 14 by’ubuzima.

Kuba iryo komatanya ryarabaye hagati mu mwaka w’ingengo y’imari, kandi ibyo bigo ugasanga biteye mu buryo butoroha guhita bihuzwa mu gihe gito, ngo byateye imbogamizi.

Imikoranire

Mu gusobanura ikibazo cy’imikoranire, James Kamanzi, Umuyobozi wungirije wa RBC yagaragaje ko byaturutse ahanini ku kuba Inama y’Ubutegetsi yarashyizweho nyuma y’ikomatanywa ry’ibyo bigo, aho yashyizweho ku wa 8 Ugushyingo 2011, hakaba hari hasigaye amezi atageze kuri ane ngo inzibacyuho y’umwaka umwe yari yahawe irangire.

Ibyo kandi byabaye mu gihe RBC nta n’umuyobozi yari yabona kuko uwo ifite ubu yamuhawe muri Gashyantare uyu mwaka.

Icungamutungo

Ikibazo cy’imicungire y’umutungo muri RBC ni cyo cyatinzweho cyane, aho byagoranye kugira ngo PAC yumve kandi inyurwe n’ibisobanuro by’ubuyobozi bw’icyo kigo kuri iyi ngingo.

Ubuyobozi bwa RBC bwasobanuye ko ikibazo cyo kuba hari amafaranga ataragaragarijwe impapuro zisobanura uko yakoreshejwe n’icyo yakoreshejwe, ngo byatewe n’uko bari barabyerekanye mu igenzura rya Global Fund, Umugenzuzi w’imari ya Leta aje asanga ntibiri mu byo bateguye kwerekana, kuko bibwiraga ko ubwo byerekanywe mu igenzura rya mbere, bitazasabwa mu rindi genzura rya kabiri.

Aha ni ho Umuyobozi wa PAC, Depite Nkusi Juvenal yahereye abaza RBC ati “Ko Umugenzuzi w’imari ya Leta ataza atunguranye ahubwo akabanza kubandikira mu byumweru bitatu mbere y’uko aza, kandi akaza akahamara amezi atatu, kuki mutamweretse izo mpapuro? …Ahubwo se mumwima izo mpapuro ngo muzereke nde?”

Umugenzuzi w’imari ya Leta muri raporo ye y’umwaka wa 204/2015, yagaragaje ko amafaranga y’u Rwanda 3,652,086,795 yakoreshejwe ariko yasaba impapuro ziyasobanura ntazihabwe, ibyo Abadepite batandukanye bagereranyije no kunyereza umutungo wa Leta (Embezzlement).

RBC yasobanuye ko 70% muri yo, ahwanye na 1,794,261,604 ari ayahawe Ikigo cy’imisoro n’amahoro (RRA), ahwanye na 15% y’umusoro ku nyungu mu mafaranga yishyuwe mu masoko RBC yahaye ibigo byo mu mahanga.

Muri izo miliyari zisaga 3,5 yabijije icyuya RBC mu gusobanura uburyo yakoreshejwe ariko hakaba hatagaragazwa inyandiko ziyasobanura, PAC yatinze kumva ibisobanuro by’icyo kigo kuri 30% by’ayo mafaranga, cyavugaga ko ari ayishyuwe ibindi bigo bya Leta nka polisi yishyuwe 139,061,322 kugira ngo itware Imbabura z’abajyanama b’ubuzima.

Andi mafaranga Umugenzuzi w’imari ya Leta yagaragaje nk’ataragaragarijwe impapuro ziyasobanura, ni 702,637,768 RBC isobanura ko ari ayahawe ikigo MPPD cyahoze ari CAMERWA, yishyurwa Serivisi zo kugura, kubika no gukwirakwiza imiti mu bagenerwabikorwa bayo.

PAC kandi yatinze ku mafaranga y’u Rwanda 536,561,694 RBC itagaragarije inyandiko zigaragaza icyo yakoreshejwe, abayobozi b’icyo kigo bagasobanura ko ari ayakoreshejwe mu bikorwa bitandukanye mu bitaro. Aha hatanzwe ingero z’amahugurwa agamije kunoza serivisi zo kurwanya Virusi itera SIDA, gupima abana ibiro n’ibindi.

Kuri aya mafaranga, Ubuyobozi bwa RBC bwavuze ko hari ibyo Umugenzuzi w’imari ya Leta yabonye n’ibyo atabonye, birimo raporo z’uburyo ayo mafaranga yakoreshejwe, aho yajyanywe, ibyo bikaba byaratewe n’uko abayahabwa baba batararangiza kuyakoresha cyangwa bataratanga raporo y’uburyo yakoreshejwe.

Andi mafaranga PAC yatinzweho ni 479,564,407, Ubuyobozi bwa RBC bwasobanuye ko yishyuwe imiti icyo kigo cyagemuriwe n’ibigo bitandukanye nka HETERO LABS, HASS Scientific, PHARMA Lab n’ibindi.

Mu bindi bibazo byakunze kugarukwaho cyane n’Abagize PAC harimo icy’ubusaze bw’imiti, ahagaragajwe ko bitari bikwiye ko bitera igihombo Leta kandi hari abakozi babishinzwe banabihemberwa.

RBC yasobanuye ko icyo kibazo cyatewe ahanini no kuba hari iyo bazana bagasanga itujuje ubuziranenge, bityo ntiyakirwe ahubwo ikaguma mu bubiko ahantu ikarinda ihasazira, maze Umugenzuzi w’imari ya Leta akayibara mu mutungo w’icyo kigo.

Umuyobozi wa MPPD, Celsa Gaju yasobanuriye PAC ko hari n’imiti usanga iza ku mpamvu z’indwara runaka, zikageza igihe zigacika cyangwa ugasanga zagabanyije ubukana, bityo iyo miti ikaba itagikoreshejwe.

Yanatanze urugero rw’imiti isaza bitewe n’uko iba yaguzwe hateganywa umubare w’abarwayi runaka bashobora kuyivurishwa mu gihe runaka, ariko ugasanga uwo mubare ntugezeho na bwo ntikoreshwe.

Icyuho cyagaragajwe n’Umugenzuzi w’imari ya Leta, harimo n’icyaturutse ku makosa n’ibindi byaha ku bari abakozi muri icyo kigo, ariko Ubuyobozi bwagaragarije PAC ko bakurikiranywe mu buryo bw’akazi abandi bagashyikirizwa Inkiko, bamwe bakaba barabiryojwe abandi bakagirwa abere.

RBC yemeye amakosa yakoze cyane ku bijyanye n’ibaruramari, ivuga ko kuri ubu yabikosoye ndetse ngo ikaba yaranongerewe abakozi babikora.

Obadiah Biraro(iburyo),Umugenzuzi Mukuru w'Imari ya Leta
James Kamanzi, Umuyobozi wungirije wa RBC na Prof. Condo Jeanine, Umuyobozi Mukuru
Depite Nkusi Juvenal, Umuyobozi wa Komisiyo y’Imikoreshereze y’imari n’Umutungo bya Leta, PAC
Prof. Condo Jeanine(uwa mbere iburyo), Umuyobozi Mukuru wa RBC

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved