Kwamamaza

Raporo y’Umuvunyi yagaragaje uburiganya bugikorwa muri gahunda zagenewe abatishoboye

Yanditswe kuya 10-11-2016 saa 09:38' na IGIHE


Raporo y’ibikorwa by’urwego rw’Umuvunyi ya 2015/2016 igaragaza ko hakiri ikoreshwa nabi ry’inkunga iba yagenewe abatishoboye binyuze muri gahunda zitandukanye zirimo Girinka na VUP.

Iyo raporo yagaragarijwe abagize Inteko Ishinga Amategeko mu cyumweru gishize, yerekanye ko habayeho ikoreshwa nabi ry’amafaranga n’izindi nkunga zigenewe abatishoboye, aho ababishinzwe bayanyereje bayashyira mu mifuka yabo cyangwa mu matsinda ya baringa.

Iri koreshwa nabi ry’inkunga leta itanga muri porogaramu zigenewe abatishoboye, ryagaragaye muri gahunda ya Girinka, VUP (Vision Umurenge Program) n’Ubudehe.

Igenzura ryakozwe mu turere twa Rubavu, Nyagatare, Gatsibo, Gicumbi, Ngorerero, Muhanga, Nyarugenge, Karongi na Rusizi, ryerekanye ko ziriya gahunda kimwe no gutanga ifumbire byakoreshejwe nabi bituma zitagera ku bo zigenewe.

Nko mu karere ka Rubavu gusa, miliyoni zirenga 63,2 zagenewe abaturage muri gahunda ya VUP n’Ubudehe zaranyerejwe. Mu murenge wa Nyakiliba umwe mu yigize ako karere, miliyoni 19,939,848 zahawe abantu ku giti cyabo batazikwiriye mu gihe izigera kuri 14,660,000 zagurijwe amatsinda ya baringa, mu Murenge wa Rubavu izigera kuri 13,179,000 zaburiwe irengero.

The East African dukesha iyi nkuru yanditse ko Umuvunyi Mukuru Aloysie Cyanzayire, yavuze ko VUP yashowemo miliyoni 24.7 muri Gatsibo, muri Ngororero hashorwamo miliyoni 8.3 na Rusizi miliyoni 8.8 ariko zose zigakoreshwa nabi.

Cyanzayire yakomeje avuga ko amafaranga y’inkunga y’abatishoboye hari aho abayobozi b’inzego z’ibanze bayakoresheje mu bindi bikorwa kugira ngo babashe kwesa imihigo bahize.

Raporo y’umuvunyi kandi yagaragaje ko hari aho abayobozi mu nzego z’ibanze bakora uburiganya muri gahunda zagenewe abakene nka Girinka ntizigere ku bo zigenewe.

Aya makosa agaragara kandi no mu gutanga ifumbire muri gahunda ya ‘Nkunganire’ bikorwa na Minisiteri y’Ubuhinzi. Umuvunyi yagaragaje ko hari aho basanze umuturage wari wandikiwe ibilo 300 baramuhaye ibilo 1 300.

Abadepite batanze ibitekerezo bagarutse ku buryo bukoreshwa mu gukurikirana no kugaruza umutungo wa leta uba watikiriye mu mikoreshereze mibi ya gahunda zigenewe abatishoboye.

Depite Mporanyi yagize ati “Kuki dufite ayo mamiliyari yatikiriye muri VUP na Girinka mu myaka irenga 10 ariko ababigizemo uruhare ntibagezwe mu nkiko ngo agaruzwe?”

Umuvunyi Mukuru Cyanzayire yasubije abadepite ko ibyaha byinshi byakozwe muri izi gahunda bitari mu bubasha bwe ahubwo byabazwa inzego bireba.

Ati “Twasangiye amakuru y’ibyo twabonye na Polisi kugira ngo ikore iperereza mu gihugu cyose, ababigizemo uruhare bagaruze uwo mutungo.”

Iyo raporo igaragaza ko urwego rw’Umuvunyi rwakiriye kandi rugakurikirana amadosiye 89 aregwamo abantu 30 bakekwaho ruswa. Muri ayo madosiye agera kuri 43 yaburiwe ibimenyetso, 17 yoherezwa muri polisi naho andi 29 ntarafatwaho umwanzuro.

Umuvunyi Mukuru, Aloysie Cyanzayire

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved