00:00:00 IGIHE NETWORK KN KINYARWANDA EN ENGLISH FR FRANCAIS

RALGA ni kamara? Abadepite bibaza ku buriganya bugaragara mu mitangire y’akazi mu nzego z’ibanze

Yanditswe na Kanamugire Emmanuel
Kuya 3 Ugushyingo 2021 saa 04:28
Yasuwe :
0 0

Inteko Ishinga Amategeko, Umutwe w’Abadepite, yibajije ku mikorere y’Ishyirahamwe ry’Uturere n’Umujyi wa Kigali (RALGA), rifite mu nshingano gukoresha ibizamini by’akazi muri izi nzego ku bw’uburiganya mu mitangire y’akazi bukomeza kuzigaragaramo aho bamwe bashyirwa mu myanya batabikwiye abandi bakavutswa amahirwe ari bo batsinze ibizamini.

Kuri uyu wa Kabiri, tariki ya 2 Ugushyingo, ni bwo Minisitiri w’Ubutegetsi bw’Igihugu, yitabye Abadepite ngo atange ibisobanuro kuri ibyo bibazo, byagaragajwe na Komisiyo y’imibereho myiza mu Nteko Ishinga Amategeko mu isesengura yakoze kuri raporo ya Komisiyo y’Abakozi ba leta.

Ibibazo bijyanye no gushaka no gushyira mu myanya abakozi mu buryo butubahirije amategeko byagiye bigaruka mu myaka ya 2017/2018; 2018/2019 na 2019/2020.

Mu makosa yagaragajwe harimo kuba hari abakandida bahawe ibizamini by’akazi mbere y’uko bikoreshwa, byabaye mu Karere ka Kicukiro.

Mu Karere ka Kayonza habayeho gushyira abakozi mu myanya itaratangazwa. Hari abahawe akazi batagaragara ku rutonde rw’abakoze ibizamini ndetse habayeho guhindura amanota ku bakandida, ababonye make arongerwa.

Urugero ni urw’umukandida wari wagize amanota 6/50 mu kizamini cyanditse ariko arahindurwa ahabwa 35/50 ndetse ahabwa akazi atarakoze ikizamini cy’ikiganiro.

Mu Karere ka Rwamagana habayeho kongerera abakandida amanota bigatuma uwagombaga kuba uwa kane agirwa uwa mbere. Imikorere nk’iyi kandi yanabaye mu Karere ka Nyamagabe aho umukandida yagabanyirijwe amanota bituma adakora ikizamini cy’ikiganiro.

Mu Karere ka Karongi ni ho habayeho gushyira mu myanya abakozi mu buryo butubahirije amategeko ndetse amakaye bakoreyeho ibizamini RALGA irayatwika mu gihe yagombaga guherekeza urutonde rw’abavugwa ko batsinze nk’uko biteganywa n’itegeko.

Ubwo yatangaga ibisobanuro kuri aya makosa, Minisitiri w’Ubutegetsi bw’Igihugu, Gatabazi Jean Marie Vianney, yavuze ko hagiye hafatwa ingamba mu kuyakosora no guhana ababigizemo uruhare.

Ku buriganya bwabaye mu Karere ka Kayonza aho abakozi bane bongerewe amanota, Minisitiri Gatabazi yavuze ko abakozi babiri batigeze bashyirwa mu myanaya naho abandi babiri baje kwirukanwa.

Ababigizemo uruhare birukanwe ku kazi barimo uwari umuyobozi ushinzwe abakozi n’Umunyamabanga Nshingwabikorwa w’Akarere ndetse n’abakozi ba LARGA na bo barirukanwa naho mu Karere ka Karongi hafashwe umwanzuro wo gusesa ibizamini bikazongera gutangwa bundi bushya nk’uko Minisitiri Gatabazi yabisobanuye.

Yakomeje agira ati “Umurongo dufite, duharanira ko gushaka abakozi no kubashyira mu myanya byakorwa mu buryo buha amahirwe buri wese. Aho bitagenze neza natwe ntabwo bidushimisha na gato. Turi gufatanya kugira ngo hafatwe ingamba zose zatuma ibizamini bitangwa mu buryo butambura umuntu uburenganzira bwe. Minaloc izakomeza kugirana ibiganiro n’inzego z’ibanze izitoza kwirinda amakosa no guhana abagaragaraho uburiganya.”

Minisitiri Gatabazi yavuze ko mu gukemura ikibazo cy’uburiganya mu mitangire y’akazi hanakozwe amavugurura hashyirwaho uburyo bwo gutanga ibizamini hakoreshejewe ikoranabuhnaga ku buryo umukandida azajya akora ikizamini agataha amaze kubona amanota yagize.

Ati “Urugero dufite ni urw’ibizamini biherutse gukorwa hashakwa abarimu basaga ibihumbi 10. Abasaga ibihumbi 53 bakoze ibizamini barara bamenye ibisubizo, ibyo bikaba byarafashije Mineduc kubona abakozi mu gihe cyihuse.”

Ese RALGA ni kamara?

Abadepite bavuze ko uburiganya mu mitangire y’akazi ari ikibazo gikomereye sosiyete nyarwanda kuko byatumye biba nk’ihame ko akazi gahabwa umuntu ufite mwenewabo ukomeye.

Umwe muri bo yagize ati “Iyo turema icyo kintu mu rubyiruko rw’ubu ni ikintu kibi gikomeye cyane aho abana badashobora kugira icyizere mu bizamini kuko ugitsinda ari ushyigikiwe n’umuntu runaka. Nkumva abantu bakwiye guhanwa by’intangarugero kugira ngo dukureho iyi sura mbi mu rubyiruko bajye bajya gukora ibizamini hatsinde ukwiriye gutsinda.”

Depite Bizimana Minani, yavuze ko iki kibazo gifitanye isano n’uturere dutsindwa imihigo kuko tuba twahawe abakozi badashoboye, abazwa niba RALGA ari kamara mu gihe imikorere yayo ivugwamo amarangamutima.

Ati “RALGA yakunze gukemangwa cyane ko igira amarangamutima kandi urwishe ya nka ruracyayirimo; na n’ubu iracyatungwa agatoki. Ndashaka kubaza Minisitiri niba RALGA ari kamara mu gukoresha ibizamini mu turere. Ese yasabye imbabazi ? Muri iyi minsi isura yayo imeze ite?”

Minisitiri Gatabazi yasubije ati “Ntabwo twavuze ko RALGA ari kamara, icyo tubizeza ni ugukomeza gushyiramo imbaraga kugira ngo bikorwe nk’uko bikwiriye kandi na RALGA sinzi ko izishimira kubazwa buri kanya amakosa aba yakozwe. Na bo baba bakwiye kumenya ko bagomba kugira ibyo bakosora.”

Ubushakashatsi Komisiyo y’Abakozi ba leta yakoze mu 2015/2016, bwagaragaje ko Abanyarwanda bishimira imitangire y’akazi mu nzego za Leta bari 70,9%. Mu bagaragaje ko batishimiye uko akazi gatangwa harimo abavugaga ko imitangirwe y’akazi ibamo ruswa n’ikimenyane.

Ni mu gihe imibare y’abashomeri ikomeza kwiyongera aho ingaruka za Covid-19 zatumye igipimo cy’ubushomeri gitumbagira.

Ubushakashatsi bwakozwe n’Ikigo cy’igihugu cy’ibarurishamibare, NISR, bwerekana ko kubera ingaruka za Covid-19 ubushomeri bwavuye kuri 16% muri Kanama 2020 bugera kuri 20.3% mu Ugushyingo 2020.

Minisitiri w'Ubutegetsi bw'Igihugu, Gatabazi Jean Marie Vianney, atanga ibisobanuro mu Nteko Ishinga Amategeko,Umutwe w'Abadepite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .