Kwamamaza

RAB yasabiye imbabazi amakosa 35 yagaragajwe n’Umugenzuzi w’Imari ya Leta

Yanditswe kuya 27-09-2016 saa 12:39' na Niyonsenga Schadrack


Ikigo cy’Igihugu gishinzwe Ubuhinzi n’Ubworozi mu Rwanda (RAB) cyemereye Abadepite bagize Komisiyo ishinzwe gukurikirana imikoresherezwe y’umutungo wa Leta (PAC) ko habayeho uburangare mu bugenzuzi bw’imari cyahawe gukoresha, ndetse kinayasabira imbabazi.

Muri rusange Raporo y’Umugenzuzi w’Imari ya Leta y’umwaka wa 2014/2015, igaragagaza ko yasanzemo ibibazo 35 akaba ari na byo abagize iki kigo bagiye gutangaho ibisobanuro mu Nteko Ishinga Amategeko kuri uyu wa 27 Nzeri 2016.

Ibibazo by’ingutu byagaragaye nk’ibyatwaye amafaranga muri RAB, bikubiye muri gahunda ya nkunganire y’iki kigo, itangwa ry’inyongeramusaruro ritagenze neza, itangwa ry’imbuto nziza ku bahinzi ryakunze kugaragaramo ibibazo, ndetse n’ibijyanye no gutera intanga amatungo.

Agaruka ku makosa yagaragajwe muri gahunda ya nkunganire, Umuyobozi Mukuru wa RAB, Dr Gahakwa Daphrose yagize ati “Ntibyakozwe neza, ni na yo mpamvu guverinoma yahisemo kwaka RAB iyi gahunda, tugenda dukosora uko amakosa agenda aboneka byose kugira ngo ubuzima bw’abaturage bugende neza.”

Depite Kankera Marie Josée yemeje ko ubu burangare RAB iri gusabira imbabazi buturuka ku mikoranire mibi y’amashami atandukanye y’iki kigo.

Yagize ati “ Harimo imikoranire mibi mu mashami y’iki kigo, nta buryo bugaragara mutwereka mukoranamo, usanga buri shami rikora ibyo ryishakiye, ibi ni na byo bituma RAB muhora mu gukemura ibibazo bigatuma muticara ngo mutekereze icyateza imbere ubuhinzi muri rusange. Muri iki gihe cy’ikoranabuhanga mwakagombye kuba mufite uburyo (Software) buhuriza hamwe amashami yose y’iki kigo cyane cyane mu icungamutungo.”

Raporo y’Umugenzuzi w’Imari ya leta yagaragaje ko RAB kuri ubu ibereyemo umwenda wa miliyoni 114 ibindi bigo bitandukanye. Umuyobozi mukuru wa RAB yavuze ko iki kigo cyagize uburangare bwo kutandika uyu mwenda n’impamvu yawo, ibintu yanasabiye imbabazi abadepite.

Icyakora RAB ngo yabashije gukurikirana mu nkiko umukozi wanyereje miliyoni 15 z’iki kigo mu Ntara y’Amajyepfo.Ati “Twaramufashe, yakurikiranywe mu nkiko kandi yaratsinzwe.”

RAB yatanze amasoko agera ku icyenda mu buryo butateguwe, aho umukozi ushinzwe itangwa ry’amasoko muri RAB yavuze ko ayo masoko aba aje atunguranye kandi akenewe bigatuma iki kigo kiyatanga mu buryo butunguranye, byatumye Abadepite batiyumvisha uko hagira ikintu gitungura ikigo kinini nka RAB kigatanga amasoko yatwaye amafaranga arenga miliyoni 800.

Aha RAB yatanze urugero ku isoko ryatanzwe mu gutegura imurikagurisha ry’ubuhinzi ku Mulindi, amwe muri aya masoko ngo ntiyanageze ku ntego nk’uko byari byitezwe.

Umukozi ushinzwe gutanga amasoko muri RAB yabashije kwibuka amasoko abiri muri icyenda yose yatanzwe.

Muri iri bazwa ry’ikigo cy’Igihugu gishinzwe Ubuhinzi n’Ubworozi, hanagarutswe ku bibazo by’ibikoresho by’iki kigo nk’inzu ziherereye ahantu henshi zigaragaza gusaza ariko zikaba zidasanwa. Aha Umuyobozi wa RAB yemeje ko muri uyu mwaka bitewe n’ingengo y’imari yari nto hasanwe inzu ebyiri gusa.

Umugenzuzi w’Imari ya leta yahamije ko ibibazo byose bigenda biboneka mu bigo bya leta biterwa ahanini n’abakozi bashinzwe ubujyanama mu by’umutungo (Financial Advisers) badakora neza, ngo hari kandi ikibazo cy’abayobozi bagisinya batazi ibyo basinyiye.

RAB ikoresha ingengo y’imari ya leta ingana na miliyari 16 ku mwaka, aya akaba ari yo mafaranga Umugenzuzi w’Imari ya Leta akurikirana muri iki kigo.

Dr Gahakwa Daphrose (hagati) yavuze ko muri RAB hari byinshi bitakozwe neza
Depite Karenzi Théoneste, Visi Perezida wa PAC kimwe na bagenzi be ntibumva ukuntu RAB itungurwa n'amasoko

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved