RAB yaburiye aborozi ku miti y’uburondwe ihumanye iri gucuruzwa mu Rwanda

Yanditswe na Evariste Nsengimana
Kuya 9 Nyakanga 2018 saa 03:19
Yasuwe :
0 0

Ubugenzuzi bumaze igihe bukorwa n’Ikigo cy’Igihugu gishinzwe Iterambere ry’Ubuhinzi n’Ubworozi (RAB) n’Urwego rw’Igihugu rw’Ubugenzacyaha (RIB) muri farumasi z’imiti y’amatungo mu Rwanda, ryagaragaje ko hari imiti y’amatungo y’imyiganano n’ibujijwe mu gihugu iri ku isoko, harimo n’iyo abacuruzi babeshya ko yica uburondwe.

Farumasi 18 muri 52 zo mu Turere icyenda tw’igihugu ryakorewemo mu cyumweru gishize, zasanzwemo ubwoko butandatu bw’imiti yinjijwe mu gihugu mu buryo bwa magendu, iyarengeje igihe n’itandukanye n’amazina yanditse ku byo ipfunyitsemo ifite agaciro k’asaga miliyoni 24 Frw.

Mu kiganiro ubuyobozi bwa RAB na RIB bwagiranye n’itangazamakuru kuri uyu wa Mbere, bwatangaje ko Farumasi enye zirimo eshatu zo mu mujyi wa Kigali zari zifite imiti myinshi ihumanye, n’izindi ba nyirazo banze gutanga amakuru zahise zifungwa, n’abantu batatu babigizemo uruhare batabwa muri yombi.

Umuyobozi w’ishami rishinzwe ubugenzuzi bw’abavuzi b’amatungo muri RAB, Dr. Rukundo Jean Claude, yavuze ko mu Rwanda hamaze igihe hapfa amatungo, yicwa n’indwara ebyiri zirimo iya ‘Rift Valley Fever’ n’iziterwa n’uburondwe kandi ko muri iyo miti harimo iyo abacuruzi babeshya ko ibuvura.

Yagize ati “Imwe mu miti twafashe hano, ni iyo bavuga ko yari igenewe kwica uburondwe ariko uyu munsi iyo uyirebye usanga ataricyo cyari kirimo. Mu yandi magambo habayemo kwigana cyangwa forode, umuntu akagurisha imiti runaka, ugamije kwica uburondwe ariko uwuguze ntubwice”.

Yavuze ko mu Rwanda uburondwe burwanywa hakoreshejwe uburyo bwo gufuhera umuti wabugenewe mu buryo buhoraho byibuze kabiri mu cyumweru, ariko atariko biri gukoreshwa.

Ati “Igihari ni uko abaturage bagomba gushishoza, bakamenya gutandukanya iyi miti. Icya kabiri ni ukubaza ahantu hose bayibonye cyangwa bakamenyesha mu gihe cyose babonye iyi miti kugira ngo inzego za Leta zikomeze kuyivana ku isoko.”

Dr Rukundo yasobanuye ko mu Rwanda hasanzwe hakoreshwa imiti ibiri yo kurwanya uburondwe harimo uwitwa ‘Cypermrtrine n’uwitwa Amitraz’, gusa ngo hari uduce byagiye bigaragara ko Amitraz itaburwanya neza ku buryo iri kugenda isimbuzwa indi yitwa Permapy+, ikorerwa mu Rwanda mu bireti.

Umuyobozi Mukuru ushinzwe ubutasi muri RIB, Peter Karake, yaburiye abakora ubucuruzi bw’ibitemewe birimo ibishobora gushyira mu kaga ubuzima bw’abantu cyangwa amatungo, ko ibihano bikarishye bibateganyirijwe kandi ko kubashakishisha bizakomeza.

Igitabo cy’amategeko ahana y’u Rwanda giteganiriza igifungo cy’amezi kuva kuri atandatu kugera kuri abiri cyangwa amande y’amafaranga y’u Rwanda kuva kuri miliyoni imwe kugera kuri eshanu, ku muntu wese ugurishije cyangwa utanga ibintu by’ibyiganano cyangwa ibitujuje ubuziranenge.

Umuyobozi mukuru ushinzwe ubutasi muri RIB, Peter Karake
Umuyobozi w’ishami rishinzwe ubugenzuzi bw’abavuzi b’amatungo muri RAB, Dr. Rukundo Jean Claude (iburyo)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza