Kwamamaza

RAB igiye gutangiza umushinga ugamije gukura urubyiruko mu bushomeri

Yanditswe kuya 9-11-2016 saa 12:29' na Jean Pierre Tuyisenge


Ikigo cy’Igihugu gishinzwe guteza imbere Ubuhinzi n’Ubworozi (RAB), kivuga ko kigiye gutangiza umushinga w’ubworozi bw’amatungo magufi ufite agaciro ka miliyari imwe y’amafaranga y’u Rwanda, ugamije gukura mu bushomeri urubyiruko rwibumbiye mu makoperative.

Ni umushinga kandi ugamije kongera umusaruro w’inyama mu rwego rwo kuzamura imirire mu gihugu ukazatangira muri Mutarama umwaka utaha.

Ubwo yaganiraga na The New Times dukesha iyi nkuru, Dr. Christine Kanyandekwe, Umuyobozi ushinzwe iby’amatungo muri RAB, yavuze ko muri uyu mushinga urubyiruko ruzahabwa ingurube 4000, ihene 2000 n’inkoko 32000.

Dr Kanyandekwe yavuze ko uwo mushinga watangiriye mu turere tune turimo Rusizi, Nyamasheke, Nyaruguru, na Bugesera bakaba ngo bashaka kuzawugeza mu gihugu hose.

Yavuze ko igice cya mbere cy’uwo mushinga cyibanze ku guhugura abagenerwabikorwa ku kuntu bazawushyira mu bikorwa. Muri Mutarama urubyiruko rwo mu Turere twa Rusizi na Nyamasheke ruzahabwa inkoko hagamijwe gufata isoko ryo muri Repubulika Iharanira Demokarasi ya Congo.

Urubyiruko mu karere ka Nyaruguru ruzahabwa ingurube, mu gihe abo mu karere ka Bugesera bazahabwa ihene.

Dr Kanyandekwe ati “ Ku nkoko, abagenerwabikorwa ni urubyiruko gusa rwiganjemo abize, ntidufite ubushobozi bwo kubatangirira ubucuruzi kuko nta gishoro bafite. Tuzabafasha kwiteza imbere duhereye ku nkoko n’ibikoresho byo kubaka ibiraro byazo, kuzigenzura byo tuzabikora nyuma.”

RAB itangaza ko inkoko ibasha gutanga umusaruro mu mezi 18 kuva itangiye gutera amagi, ikomeza ivuga ko urubyiruko ruzagura izindi nkoko nyuma yo kugurisha amagi.

Iki kigo kivuga ko mu mibare cyakusanyije mu mwaka wa 2014, cyasanze u Rwanda rwarabonye toni 16,000 z’inyama z’inkoko, na toni 6,973 z’amagi.

Gusa Umuryango Mpuzamahanga wita ku buhinzi FAO, uvuga ko abarya inyama z’inkoko bakiri bake kuko umuntu umwe arya ibiro 10 byonyine ku mwaka, mu gihe ku mugabane wa Afurika umuntu umwe arya ibiro 32 .

Umuhuzabikorwa w’Urubyiruko mu karere ka Rusizi, Amandin Rugira, yavuze ko abona uwo mushinga ugiye gutuma urubyiruko rubona imirimo ishingiye ku buhinzi n’ubworozi.

Yavuze ko amakoperative icyenda yo mu mirenge yo mu Karere ka Nyamasheke, buri yose izafata inkoko 1000, mu gihe indi mirenge itandatu izahabwa ingurube.

Yagize ati “Mu rwego rwo gushyigikira uyu mushinga, turifuza ko bamwe bazajya boroza abandi, bityo tuzaba turi gufasha n’izindi koperative gutera imbere icyarimwe.”

Kubona ibyo kurya biracyagoye

Mu rwego rwo guteza imbere ibiryo by’amatungo, Leta yakuyeho umusoro ku nyongeragaciro (TVA), gusa aborozi ntibahwema kuvuga ko ibiciro byabyo bihenze, kuko ikiro kimwe kigura amafaranga 325. Inkoko 1000 zishobora kurya toni enye mu minsi 50.

Umuyobozi ushinzwe Ubworozi bw’Amatungo magufi muri RAB, Dr Fabrice Ndayisenga, yasabye ko abacuruza bajya bagirana amasezerano n’aborozi bakazajya babishyura nyuma.

RAB itangaza ko mu mwaka wa 2015, habonetse umusaruro ungana na toni 86,000 z’inyama, mu gihe u Rwanda rwahize kuzagera kuri toni 230,000 mu mwaka wa 2018.

Inkoko nazo ziri mu matungo magufi azahabwa urubyiruko rwibumbiye muri koperative

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved