PSF yashyize ibuye ry’ifatizo ahazubakwa inzu zizatuzwamo abarokotse Jenoside i Rubavu

Yanditswe na Mukwaya olivier
Kuya 13 Mata 2018 saa 08:48
Yasuwe :
0 0

Urugaga rw’Abikorera mu Rwanda (PSF) rwatangije ibikorwa byo kubaka inzu 32 mu Mudugudu wa Rugerero mu Karere ka Rubavu ahazatuzwa imiryango itishoboye y’abarokotse Jenoside yakorewe Abatutsi mu 1994.

Umudugudu wa Rugerero uri mu Kagari ka Rugerero mu Murenge wa Rugerero uzaba ugizwe n’inzu 50, zirimo 18 zamaze kubakwa ku bufatanye bw’Akarere ka Rubavu n’Ikigega cya Leta gishinzwe gutera inkunga Abarokotse Jenoside batishoboye (FARG) ndetse n’izindi zatangiye kubakwa na PSF.

Umuhango wo gutangiza ibikorwa byo kubaka ku mugaragaro inzu zizatuzwamo abarokotse Jenoside wabaye kuri uyu wa Kane, tariki ya 12 Mata 2018.

Izi nzu nizuzura zizatuzwamo imiryango y’abarokotse Jenoside yakorewe Abatutsi yari ituye mu zishaje zubatswe mu myaka yo hambere.

Iki gikorwa cyakiriwe neza n’imiryango y’abarokotse Jenoside yakorewe Abatutsi ivuga ko yishimiye ko igiye gutuzwa aheza.

Mutabazi Augustin uri mu baturage bari kubakirwa yagize ati “Inzu tubamo zubatswe Jenoside ikirangira ariko zari zimaze gusaza cyane ku buryo imvura yagwaga ugasanga turi nko hanze. Kuba bagiye kunyubakira inzu igezweho bizamfasha njye n’umuryango wanjye gutera imbere kuko nari narabuze ubushobozi bwo kwisanira.’’

Umunyamabanga Nshingwabikorwa w’Urugaga rw’Abikorera mu Rwanda (PSF), Ruzibiza Steven, yavuze ko nyuma yo gutangiza umushinga wo kubakira abatishoboye i Rubavu, ibi bikorwa bizakomereza ahandi.

Yagize ati “Izi nzu zizaba zubatswe mu buryo bugezweho zijyanye n’umudugudu w’icyitegererezo uri kubakwa. Muri iyi minsi turateganya kubaka 32 kuko FARG yari imaze kubaka 18. Twahisemo kuza kubaka mu Burengerazuba kuko dufite gahunda yo kubaka mu ntara zose ariko twahereye i Rubavu.’’

Guverineri w’Intara y’Uburengerazuba, Munyantwari Alphonse, yashimiye Urugaga rw’Abikorera, anizeza ko hazakurikiranwa uko izi nzu zubakwa.

Yagize ati “Tuzabikurikirana, ahakenerwa umuganda tuzawukora ndetse tunakurikirana ko abazazituzwamo babayeho neza. Turashima PSF kubera uru rukundo n’umutima wo kubaka igihugu yagaragaje. Ubu bufatanye bw’inzego bigaragaza ko igihugu kiyobowe neza ndetse bituma abikorera bitabira ibikorwa bigoboka abarokotse Jenoside.”

PSF kandi muri iki gikorwa yaremeye imiryango 100 itishoboye y’abarokotse Jenoside yakorewe Abatutsi muri Rugerero, iyigenera ibiribwa birimo umuceri n’amavuta y’ubuto bifite agaciro ka miliyoni eshanu z’amafaranga y’u Rwanda.

Inzu 32 zatangiye kubakwa muri Rubavu, imwe ihagaze agaciro ka miliyoni 22 z’amafaranga y’u Rwanda, zizuzura zitwaye akabakaba miliyoni 704 Frw, biteganyijwe ko zizatahwa mu mezi atatu ari imbere.

PSF yegereye abanyenganda barimo abakora amabati, sima, imisumari, inzugi, ibirahuri, amarangi n’ibindi bikenerwa mu bwubatsi, aho buri rwose ruzatanga ikijyanye n’icyo rukora mu gushyigikira umushinga wo kubakira inzu abarokotse Jenoside batishoboye.

Indi nkuru bifitanye isano: PSF yegereye abanyenganda ikusanya ibikoresho byo kubakira inzu abarokotse Jenoside batishoboye

Umunyamabanga Nshingwabikorwa w’Urugaga rw’Abikorera mu Rwanda (PSF), Ruzibiza Steven, ashyira ibuye ry'ifatizo ahazubakwa inzu 32 mu Mudugudu wa Rugerero
Abayobozi bitabiriye uyu muhango bashyira ibuye ry'ifatizo ahazubakwa inzu zizatuzwamo imiryango y'abarokotse Jenoside mu 1994
Umuyobozi w'Akarere ka Rubavu Wungirije ushinzwe Imibereho Myiza y'Abaturage, Uwampayizina Marie Grâce, mu bayobozi bakuru bitabiriye iki gikorwa
Uko izi nzu zizaba zimeze nizuzura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza