Prof. Cotton afite inzozi zo kuzabona kaminuza itanga umuti ku bibazo byananiranye

Yanditswe na Ishimwe Israel
Kuya 4 Ukwakira 2016 saa 11:22
Yasuwe : XX
0

Umuyobozi Mukuru wungirije muri Kaminuza y’u Rwanda, Prof. Philip Cotton yatangaje ko afite inzozi zo kubona Kaminuza isohora abanyeshuri bafite ubushobozi bwo gushakira umuti ibibazo biri muri sosiyete binyuze mu ireme ry’uburezi bahabwa ndetse n’ubushakashatsi bwimbitse bakora butanga icyizere cy’ahazaza.

Ibi yabitangaje kuri uyu wa kabiri tariki ya 4 Ukwakira 2016, ubwo hatangizwaga inama y’iminsi ibiri ihuje abafanyabikorwa batandukanye mu by’ubuvuzi igamije kurebera hamwe inzitizi ziburimo n’uburyo bwo kuzikemura.

Ifite insanganyamatsiko igira iti ‘One Health Breaking Silos between professionals for sustainable health’ bishatse kuvuga gukuraho imbogamizi hagamijwe kubaka ubunyamwuga mu buvuzi burambye.

Iyi nama yahuriranye n’igikorwa cyo kumurika ibyavuye mu bushakashatsi bwakozwe n’abanyeshuri biga mu mashami atandukanye ya Kaminuza y’u Rwanda bibumbiye muri One Health Club Rwanda (OHCR) bugamije kuzana impinduka no gukuraho imbogamizi zikigaragara mu buvuzi muri Sosiyete Nyarwanda.

Ubu bushakashatsi bwakorewe mu bice bitandukanye by’igihugu bwamurikiwe muri Kaminuza y’u Rwanda, Ishami rya Nyarugenge bwatewe inkunga na Kaminuza ndetse n’abafatanyabikorwa barimo Umushinga, One Health Workforce-USAID ukorana n’Umuryango uhuriweho n’ibihugu byo muri Afurika yo hagati n’Iburasirazuba (One Health Central and Eastern Africa -OHCEA).

Muri Kamena uyu mwaka nibwo abanyeshuri bo mu mashami atandukanye muri Koleji y’Ubuhinzi, Ubumenyi n’Ubuvuzi bw’inyamaswa(College of Agriculture, Animal Sciences & Veterinary Medicine,CAVM) n’iy’Ubuvuzi n’Ubumenyamuntu (College of Medicine and Health Sciences) batangiye gukora ubushakashatsi.

Prof. Philip Cotton yatangaje ko yishimiye kubona ibyo OHCR yagezeho ndetse no gukorana nayo kuko nawe ari umuganga.

Yagize ati “Kaminuza ifite gahunda yo gukora ubushakashatsi bwibanda ku ndwara z’ibyorezo zikunze kwibasira abantu, inyamaswa ndetse n’urusobe rw’ibidukikije. Mfite inzozi zo kuzabona Kaminuza itanga abanyeshuri bafite ubushobozi bwo kwicara bagakemura ibibazo biri mu bice bitandukanye by’ubuzima binyuze mu gukorera hamwe nk’ikipe.”

Yakomeje asaba abagize OHCR gufatana urunana bagatera inkunga ibikorwa bishyigikira ubuvuzi mu nzego zose.

Yagize ati “ Ubu bunararibonye buzafasha abanyeshuri kwiyigisha no gusakaza gahunda y’ubuvuzi buhuriweho mu gufasha umuryango kuba mu Isi itarangwamo inzara, indwara, ndetse n’ibindi bibazo by’ubuzima.”

Prof. Philip yibukije ko igikorwa cyakozwe kitagamije gusa kureba ubushakashatsi bwo gutangazwa no kumurikwa mu nama zikomeye ahubwo bugomba gukoreshwa mu kuzana impinduka zigaragara mu buzima.

Ubushakashatsi bwari bwateguwe mu rwego rwo kunoza serivisi zitangwa mu buvuzi no guharanira imibereho myiza y’umuntu, inyamaswa, n’uruhererekane rw’ibinyabuzima ndetse no gukora ubukangurambaga muri sosiyete.

Abanyeshuri barimo abiga ibijyanye no gukurikirana ubuvuzi bw’ibinyabuzima, inyamaswa, ubwo mu mutwe, indwara zisanzwe, kunoza imirire, abakora muri za Laboratwari boherejwe mu bice bitandukanye aho bigishijwe gusesengura ingaruka zishobora guterwa n’indwara z’ibyorezo ndetse n’uburyo zandura.

Aho bagaragarijwe imbogamizi zibaho kugira ngo umuntu, inyamaswa cyangwa ibinyabuzima byononekare.

Aba banyeshuri bagize OHCR imaze imyaka 4 ikorera mu Rwanda, basuye urwuri rw’aborozi bo muri Kageyo mu Karere ka Kayonza, ibitaro bya Rwinkwavu, Umurenge wa Ndego aho bize uko batera inkingo abariwe n’inyamaswa; barebye kandi uburyo bahinga umuceri mu Murenge wa Mbarara, hamwe n’ibindi bice bitandukanye bya Pariki y’Igihugu y’Akagera mu Burasirazuba bw’u Rwanda.

Ibyo bakuye mu biganiro bagiranye n’abaturage n’ibyo bamuritse kuri uyu munsi imbere y’Umuyobozi Mukuru wungirije wa Kaminuza, Prof Phillip Cotton ndetse n’abafatanyabikorwa batandukanye mu by’ubuvuzi barimo Ibitaro bya Rwinkwavu, Ikigo cy’Igihugu cy’Ubuhinzi n’Ubworozi(RAB), Ikigo cy’Igihugu cy’Ubuzima(RBC),n’Ikigega cya Leta Zunze Ubumwe za Amerika gishinzwe iterambere mpuzamahanga (USAID).

Prof. Philip Cotton aganira n'abitabiriye inama
Abanyeshuri bamurikira abayoboiz batandukanye ibyavuye mu bushakashatsi
Iyi nama yasojwe no kuririmba indirimbo zijyanye no kunoza ubuvuzi mu Rwanda
Bafata ifoto rusange

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza