Politiki ya Amerika kuri Afurika ntiyahindutse - Perezida Kagame

Yanditswe na Ferdinand Maniraguha
Kuya 27 Nzeri 2018 saa 06:27
Yasuwe :
0 0

Perezida Paul Kagame yagaragaje ko ari ikibazo kuba nyuma y’irangira ry’intambara y’ubutita, Leta Zunze Ubumwe za Amerika n’umugabane wa Afurika byarahindutse ariko politiki ya Amerika kuri Afurika yo ntihinduke mu buryo bworoshye.

Yabitangarije i New York kuri uyu wa Kane mu kiganiro kivuga kuri Afurika nshya cyiswe ‘New Africa Dialogue’ cyateguwe n’ikigo nyamerika CSIS, gikora ubusesenguzi n’ubujyanama ku migambi na politiki zirimo umutekano, ubwirinzi, ubukungu n’ibindi.

Muri iki kiganiro Perezida Kagame yahuriyemo na Perezida wa Ghana, Nana Akufo Addo ndetse na Dr Henry Kissinger wahoze ari Umunyamabanga wa Amerika ushinzwe ububanyi n’amahanga, yavuze ko Amerika ikwiye guhindura politiki yayo muri Afurika niba yifuza umubano wungukira impande zombi.

Yagize ati “Imirongo migari ya gahunda ya Amerika kuri Afurika ntiyahindutse nyuma y’irangira ry’intambara y’ubutita ariko Afurika yo yarahindutse cyane kandi na Amerika ni uko. Ni umwanya wo kongera gusesengura umubano wa Afurika na Amerika.”

Perezida Kagame yavuze ko politiki ya Amerika muri Afurika yakunze kurangwa na politiki yo gutegeka ibihugu icyo bikora.

Yavuze ko iyo politiki yatumye ibihugu bya Afurika bigira politiki itarambye ndetse binakomeje kuba imbogamizi kuko politiki nyafurika igisesengurwa hashingiwe ku myumvire y’igisobanuro cya demokarasi aho kureba ikibereye abaturage.

Ati “Iyo amahame y’ingenzi ya demokarasi yangijwe, nta n’umwe ubyungukiramo. Gushyira imbere ibitekerezo bya demokarasi nk’aho ari ikintu kigomba kubahirizwa mu bufatanye aho kuba intangiriro y’ibiganiro ntacyo bitanga.”

“Akenshi imikorere ya politiki nyafurika isesengurwa hashingiwe ku bitekerezo nta no kugera aho ibera. Ibi bikorwa nta kureba ku musaruro witezwe cyangwa se ku bitekerezo by’abaturage bireba.”

Kagame yakomeje avuga ko ikizungukira Amerika na Afurika ari umubano ushingiye ku buhahirane n’ubucuruzi.

Ati “Ubucuruzi n’ubuhahirane nibyo umunsi ku munsi bikwiye guteza imbere umubano hagati ya Amerika na Afurika, gusa nanone byaba ari ikosa kutaganira ku ndangagaciro.”

Amerika yumvise nabi umusoro ugamije gutuma Afurika yigira

Mu minsi ishize ibihugu bigize Umuryango wa Afurika Yunze Ubumwe (AU) byemeje umusoro wa 0.2 % ku bicuruzwa biva mu mahanga, buri gihugu kikayatanga buri mwaka kugira ngo hashyigikirwe ibikorwa by’uwo muryango.

Intego ni ukubona nibura miliyari 1.2 z’amadolari azajya afasha ibikorwa bya AU buri mwaka, igasezerera inkunga z’amahanga.

Amerika yahise yamagana uwo musoro, ivuga ko unyuranyije n’amategeko y’umuryango mpuzamahanga urengera ubucuruzi, ko Afurika ishaka kuryamira ibindi bihugu.

Perezida Kagame yavuze ko Amerika yabyumvise nabi, icyakora yemeza ko bigaragaza ko hagikenewe ibiganiro.

Yagize ati “Amerika yatangaje ko izamura ry’imisoro rinyuranyije n’amategeko y’umuryango mpuzamahanga w’ubucuruzi. Ibi si ukuri ahubwo ikibazo ntabwo cyakurikiranywe neza ariko urwo rujijo rugaragaza ko hakenewe ibindi biganiro ku buryo Afurika na Amerika byakorana mu guteza imbere uburumbuke bwa buri umwe.”

Yakomoje kandi ku kamaro k’amasezerano yoroshya ubuhanirane muri Afurika ndetse n’urujya n’uruza yasinyiwe i Kigali muri Werurwe, ashimangira ko ari “igikorwa cy’amateka kizahindura ubuhahirane ku mugabane, bisabe isi gutsura umubano mu by’ubuhahirane n’uyu mugabane uri gutera imbere.”

Nubwo Amerika yamaganye umusoro ibihugu bya Afurika byashyiriyeho ibyinjira kuri uwo mugabane, umusoro nk’uwo niwo umuryango wunze Ubumwe bw’u Burayi wakoresheje wiyubaka nyuma y’intambara ya kabiri y’isi yose.

Perezida Kagame aramutsa Perezida Nana Akufo-Addo wa Ghana
Iyi nama yahuriyemo abayobozi bahagarariye ibihugu batandukanye
Perezida Kagame aganira na Amb. Tibor P. Nagy, Jr, Umunyamabanga wungirije wa Leta Zunze Ubumwe za Amerika Ushinzwe Afurika
Perezida Kagame yavuze ko politiki ya Amerika muri Afurika yakunze kurangwa na politiki yo gutegeka ibihugu icyo bikora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza