Polisi yatangiye urugendo ruzasiga abaturage 3000 bahawe amashanyarazi inubakire abatishoboye (Amafoto)

Yasuwe :
0 0

Polisi y’u Rwanda yatangije ukwezi kwahariwe ibikorwa bya Polisi, kwateganyijwemo ibikorwa birimo gutanga amashanyarazi akomoka ku mirasire y’izuba ku baturage basaga 3000 mu gihugu hose, hubakirwe umuturage umwe utishoboye muri buri Karere ndetse hubakwe ibiro by’Umudugudu utararanzwemo icyaha, muri buri Ntara.

Uretse imirasire y’izuba izatangwa nibura ku miryango 100 muri buri Karere, hateganyijwe ibindi bikorwa birimo ubukangurambaga ku guhashya no gukumira ibiyobyabwenge, kurwanya inda ziterwa abangavu n’ihohotera rishingiye ku gitsina, kubungabunga ibidukikije no kwita kumutekano wo mu muhanda.

Mu Ntara y’Iburasirazuba, Ukwezi kwahariwe ibikorwa bya Polisi kwatangijwe kuri uyu wa Mbere mu Murenge wa Sake mu Karere ka Ngoma, hubakwa ibiro by’umudugudu wa Nyagasozi watoranyijwe nk’utarangwamo icyaha, n’inzu y’umuturage wamugariye ku rugamba rwo kubohora igihugu.

Minisitiri w'abakozi ba leta n'umurimo n'abandi bayobozi bashyira ibuye fatizo ku nzu y'umuturage mu Karere ka Ngoma

Umukuru w’Umudugudu wa Nyagasozi, Habarurema Jean Marie Vianney, yavuze ko ari ibyo kwishimira kubona umudugudu wabo ubonye ibiro.

Ati “Ubusanzwe twahuriraga munsi y’igiti mu kibanza cy’umuturage, iyo izuba cyangwa imvura byabaga byinshi twahitaga dutaha tukazongera gukemura ibibazo cyangwa gukora inama ubutaha. Ariko ubu tugiye kubona ibiro byacu bizadufasha kuganira neza n’abaturage, kudacikiriza ibiganiro mu gihe imvura iguye, ikindi bizadufasha mu gusezeranya imiryango myinshi bitarinze ko bajya ku murenge.”

Yakomeje avuga ko ibanga ryatumye umudugudu wabo utarangwamo ibyaha harimo “gushyira hamwe hagati y’abayobozi n’abaturage, ikindi dufite amasibo atandatu iyo hari icyaha duketse mu Isibo imwe tugerageza gufatanya n’abaturage tukagikumira kitaraba, ba Mutwarasibo nibo babigiramo uruhare.”

Umuyobozi Mukuru Wungirije wa Polisi y’u Rwanda ushinzwe ubuyobozi n’abakozi, DIGP Marizamunda Juvenal, yavuze ko muri uku kwezi hazibandwa cyane ku bibazo byagaragaye nk’ibibangamiye umutekano w’abaturage.

Yasabye abaturage guharanira ko umutekano uhabwa intebe mu ngo zabo, mu baturanyi ndetse no mu mudugudu muri rusange.

IGP Munyuza yaburiye abaturage bagikinisha ‘gutema’

Umuyobozi Mukuru wa Polisi y’u Rwanda, DCGP Dan Munyuza, yavuze ko ibyaha byagabanutse cyane ariko agaragaza ko hari n’ibindi bikomeje guhungabanya umutekano.

Ati “Ibyaha byaragabanutse cyane ariko hari ibigihungabanya umutekano w’abanyarwanda, ndagira ngo mbibabwire mubyirinde munabyigishe n’abandi. Icya mbere hakomeje kugaragara abantu bahungabanya umutekano w’abandi bakoresheje gutema, imihoro, ukumva ngo hari umuturage watemwe cyangwa ukumva ngo hari amatungo yatemwe.”

Umuyobozi Mukuru wa Polisi y’u Rwanda, DCGP Dan Munyuza, yavuze ko ibyaha byagabanutse cyane ariko agaragaza ko hari n’ibindi bikomeje guhungabanya umutekano

Yongeyeho ko uyu mwaka abanyarwanda bakwiye kwamagana ikintu cyitwa gutema hakoreshejwe umuhoro ndetse polisi izajya ibirwanya ikoresheje imbaraga mu gushakisha ababikoze kugira ngo bahanwe.

Yavuze ko muri uku kwezi Polisi y’u Rwanda izakora ibikorwa byinshi byo gufasha abanyarwanda, bizaba bifite agaciro gakabakaba miliyoni 700 Frw.

Minisitiri w’Urubyiruko, Rosemary Mbabazi, ubwo yari ahatangirijwe igikorwa nk’iki mu Murenge wa Mageragere mu Karere ka Nyarugenge mu Mujyi wa Kigali, yasabye urubyiruko kurwanya ikoreshwa ry’ibiyobyabwenge bivuye inyuma kuko bisenya ubukungu bw’igihugu.

Umuyobozi w’Umujyi wa Kigali Rwakazina Marie Chantal, yashimye Polisi y’u Rwanda kubera ibikorwa yateganyije muri uku kwezi birimo ubukangurambaga bwo kubungabunga umutekano n’ibindi bizamura imibereho y’abaturage.

Ingo 140 zacaniwe i Nyaruguru

Mu Ntara y’Amajyepfo iki gikorwa cyatangiriye mu Murenge wa Ngera mu Karere ka Nyaruguru, aho ingo zigera ku 140 zigize Umudugudu wa Bitare zose zahawe ayo mashanyarazi urugo ku rundi.

Guverineri w’iyi Ntara, CG Gasana Emmanuel, yabwiye abaturage bo ko ibikorwa byiza Polisi y’Igihugu ibagezaho ari igihango bagiranye nayo, bityo bakwiye kubisigasira birinda ibyaha.

Umupolisi ashyira itara mu nzu y'umuturage i Nyaruguru
Uyu mukecuru yahawe ingufu zimufasha no gushyira umuriro muri telefoni ye

Komiseri wa Polisi Dr Nyamwasa Daniel, yavuze ko muri uko kwezi bazakora ibikorwa bigamije guteza imbere imibereho myiza y’abaturage.

Ati “Umudugudu umwe muri buri Karere uzahabwa nibura imirasire 100; hano mu Majyepfo tuzacanira imiryango 800. Muri buri Karere tuzubakira umuntu umwe utishoboye; ikindi ni uko tuzubakira ibiro umudugudu utagira icyaha muri buri Ntara.”

CP Basabose yasabye abaturage gufata neza ibikorwa remezo bahawe

Mu ntara y’Amajyaruguru iki gikorwa cyatangiye hubakirwa umuryango w’abantu umunani ugizwe n’abasigajwe inyuma n’amateka, babaga muri nyakatsi bo mu Karere ka Burera.

Ni igikorwa cyabimburiwe no kumena ibiyobyabwenge bigizwe n’inzoga zitemewe n’urumogi, byose byari bifite agaciro ka miliyoni zisaga icyenda z’amafaranga y’u Rwanda.

Nyiramugisha Annonciata wubakiwe inzu na Polisi y’u Rwanda, yavugije impundu kubera ibyo yagejejweho n’ubuyobozi bwiza.

Yakomeje ati “Nshimye cyane Perezida Paul Kagame ko angejeje kuri byinshi birimo na Girinka yampaye, ndashima cyane polisi yanyubakiye iyi nzu, nararaga mu mbeho nkagira ngo ibisimba bizaza bintwarane n’abana, habagamo umukungugu wari waranteye imbaragasa none nabonye inzu isobanutse y’itafari rihiye, mbese ndabona ibintu ari paradizo. Ni igitangaza gikomeye kubona mbonye inzu mpawe na polisi, byose ni imiyoborere myiza.”

Komiseri wa Polisi Dennis Basabose avuga ko ibikorwa byo guteza umuturage imbere biri mu nshingano zabo, anabasaba kubisigasira ngo bitazangirika.

Ati “Iyo twakoze ibikorwa nk’ibi mu cyumweru cyahariwe polisi, dukorana n’inzego z’ibanze zikaduha abaturage bafite imibereho iri hasi cyane tukabafasha. Icyo dusaba uyu muryango urimo kubakirwa iyi nzu ni ukuyifata neza, kandi bakaba baturage beza bafatanya n’inzego zibanze mu kurwanya no gukumira ibyaha.”

Umunyamabanga wa Leta muri Minisiteri y’ubuzima ushinzwe ubuvuzi bw’ibanze, Dr. Ndimubanzi Patrick, yasabye abaturage kubungabunga ibikorwa bagezwaho na polisi no kurwanya ibiyobyabwenge bivuye inyuma.

Guverineri Gatabazi ari kumwe n'Umunyamabanga wa leta muri Minisiteri y'Ubuzima, Dr Ndimubanzi batanga umusanzu mu kubaka inzu izahabwa umuryango w'abasigajwe inyuma n'amateka

Iki gikorwa kandi cyakozwe mu Ntara y’Iburengerazuba, aho Umuyobozi w’agateganyo wa Polisi mu Karere ka Rubavu, CIP Mazimpaka Jean Claude, yabwiye abaturage ko nta mutekano umuntu yagira mu gihe atagira aho kurara, ari yo mpamvu Polisi yiyemeje guhangana n’ibibazo bibugarije.

Umuyobozi Wungirije w’Akarere ka Rubavu ushinzwe iterambere ry’ubukungu, Murenzi Janvier, yashimiye polisi ubufatanye ikomeje kugaragaza, asaba abaturage gukomeza ubufatanye n’inzego z’umutekano.

Umudugudu wa Nyagasozi wubakiwe ibiro bigezweho
Minisitiri w'Urubyiruko Rosemary Mbabazi yasabye urubyiruko kwirinda ibiyobyabwenge kuko byangiza ubukungu bw'igihugu
Umuyobozi w’Umujyi wa Kigali Rwakazina Marie Chantal, yashimye Polisi y’u Rwanda kubera ibikorwa yateganyije muri uku kwezi
Umuyobozi w'Ishuri rya Polisi rya Gishari CP Nshimiyimana Vianney na Colonel Mukasa uhagarariye Inkeragutabara, bashyira ibuye ry'ifatizo ku nzu y'umuturage
DIGP Marizamunda yavuze ko muri uku kwezi bazibanda cyane ku kureba ku bibazo bibangamiye umutekano w'abaturage, asaba abaturage kubigiramo uruhare
Abapolisi basangiye ibyishimo n'abaturage i Nyaruguru
Abapolisi bakuru bitegereza uko imirasire y'Izuba ishyirwa ku nzu z'abaturage
CG Gasana na CP Nyamwasa bifatanyije n'abaturage mu byishimo
Abaturage nibura 100 muri buri Karere bazahabwa Ingufu zikomoka ku mirasire y'Izuba mu kwezi kwahariwe ibikorwa bya polisi
Polisi yahaye imiryango 140 yo muri Nyaruguru amashanyarazi akomoka ku zuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza