Polisi yagize icyo ivuga ku mpanuka ebyiri zabaye ku munsi zigahitana abarimo abanyeshuri

Yanditswe na IGIHE
Kuya 20 Mata 2017 saa 07:45
Yasuwe :
0 0

Polisi yihanangirije abatwara ibinyabiziga kwirinda uburangare, aho ivuga ko abakora ayo makosa bazajya bakurikiranwa bagahanwa ndetse bakamburwa n’impushya zabo zo gutwara ibinyabiziga.

Ibi bije bikurikira impanuka ebyiri zabaye ku italiki ya 18 Mata zigahitana ubuzima bw’abantu batanu.

Impanuka imwe yabereye mu Murenge wa Nduba mu Karere ka Gasabo ihitana ubuzima bw’abantu bane barimo n’umushoferi ubwo ikamyo yari atwaye yaburaga feri maze igonga abana batatu bavaga ku ishuri.

Umuvugizi wa Polisi ishami rishinzwe umutekano wo mu muhanda, CIP Emmanuel Kabanda, akaba avuga ko impanuka nyinshi ziterwa n’uburangare bw’abashoferi aho yihanangiriza abica amategeko agenga umuhanda.

CIP Kabanda ati “Twabwiye kenshi abakoresha umuhanda, cyane abatwara imodoka n’abamotari kubahiriza amategeko y’umuhanda n’imikoreshereze yawo, kwirinda kuvugira kuri telefoni batwaye , kutihuta bageze mu makorosi, kwirinda umuvuduko ukabije n’uburangare bundi.”

Yakomeje agira ati “Biri mu nyungu z’utwaye ikinyabiziga kuba yakubahiriza ibisabwa kuko uretse abo batwaye, nabo baba bashyira ubuzima bwabo mu kaga ndetse n’ibinyabiziga byabo; utwaye rero ajye ashyira ubuzima imbere.”

Polisi igira inama kandi ba nyir’ibinyabiziga kujya bitwararika ku buziranenge bwabyo no kujya bakoresha igenzura mu gihe kiba kigenwe kugira ngo birinde impanuka zabyo.

Iteka rya Perezida no.85/01 ryo kuwa 02 Nzeri 2002, rivuga ku mategeko y’umuhanda n’imikoreshereze yawo, rivuga ko imodoka itujuje ubuziranenge busabwa, idahabwa icyangombwa kiyemerera kugenda mu mu muhanda; uyikoresha idafite icyo cyangombwa acibwa ihazabu y’amafaranga 25,000 Frw.

Iriya kamyo ni iy’ikigo cy’ubwubatsi niyo yagonze inzu yari yegereye umuhanda mu murenge wa Nduba nyuma yo kugonga abana batatu, ariko nta muntu yasanze muri iyo nzu.

CIP Kabanda yasabye abakoresha umuhanda kwitonda bakubahiriza amategeko y’umuhanda kuko impanuka zishobora kwirindwa.

Ati “ Impanuka nyinshi zishobora kwirindwa kuko akenshi ziterwa no kugenda nabi mu muhanda ndetse n’uburangare, hakaniyongeraho no gutwara ibinyabiziga bitameze neza bitanakorewe isuzumwa ry’imiterere yabyo. Hari kandi n’ubwo abanyamaguru nabo bateza impanuka mu gihe bambuka umuhanda uko biboneye batashishoje”.

Polisi y’u Rwanda yasabye abashoferi bafite ibinyabiziga bitwara abagenzi ko mu modoka zabo hashyirwamo utugabanyamuvuduko dutuma imodoka itarenza umuvuduko wa kilometero 60 mu isaha.

Kuri uwo munsi na none, indi mpanuka yabereye mu Murenge wa Kageyo mu Karere ka Gicumbi; aho imodoka itwara abagenzi yo mu bwoko bwa Coaster ifite icyapa kiyiranga yagonze uwitwa Ganishyaka Aloys ahita yitaba Imana. Polisi ikaba yaravuze ko byatewe n’uburangare bw’umushoferi.

Impanuka y’ikamyo yatundaga ibitaka yahitanye abana batatu b’abanyeshuri n’umushoferi wari uyitwaye
Iyi mpanuka yanasenye inzu y'umuturage iri hafi y'umuhanda
Amapine y'imodoka yakoze impanuka yavuyemo atakara mu muhanda

Amafoto: Ishimwe Sam Kozeperi Gakire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza