Kwamamaza

Polisi ya Malawi irashinjwa gukingira ikibaba Vincent Murekezi ushinjwa Jenoside

Yanditswe kuya 18-11-2016 saa 08:20' na Rabbi Malo Umucunguzi


Polisi mu gace ka Mponela muri Malawi, irashinjwa kuba inyuma y’ifungurwa ry’Umunyarwanda, Vincent Murekezi wari watawe muri yombi, ubu wahawe imbunda na pasiporo nshya muri Malawi kandi ushinjwa ibyaha bya Jenoside yakorewe abatutsi mu 1994.

Vincent Murekezi ari ku rutonde rw’abashakishwa n’ubutabera bw’u Rwanda kubera uruhare akekwaho muri Jenoside, ndetse ashakishwa na Polisi Mpuzamahanga.

Ikinyamakuru Nyasa Times cyatangaje ko Murekezi yidegembya muri Malawi kubera amafaranga menshi atunze, akaba ayifashisha mu gutanga ruswa ku bayobozi bamukingira ikibaba. Amakuru avuga ko uyu mugabo yabaga muri Zimbabwe ariko nyuma aza kwerekeza muri Malawi.

Murekezi yahawe pasiporo ya Malawi ifite numero MA078171 mu buriganya kuko bivugwa ko yatanze ruswa mu nzego z’abinjira n’abasohoka mu 2011, ayihabwa ku izina rya Vincent Banda ukomoka mu gace ka Mbeya muri Tanzania.

Gusa Nyasa Times yaje kubona kopi ya pasiporo yakoreshaga mu Rwanda, ifite numero PC 939663 wavukiye i Ngoma mu karere ka Huye, binahuza n’imyirondoro guverinoma y’u Rwanda yatanze imuranga nk’umuntu ushakishwa kubera ibyaha bya Jenoside yakorewe abatutsi mu 1994.

Uyu mugabo w’umucuruzi ukomeye muri Malawi, yaherukaga gukurikiranwaho ibyaha bitandukanye, harimo n’ibibazo yari afitanye n’amabanki, atangira gushakishwa n’igipolisi ahita ahungira muri Afurika y’Epfo aho yamaze imyaka hagati y’ibiri n’itatu.

Nyuma yagarutse muri Malawi, ariko nyuma y’iminsi ibiri aza gufatirwa mu nzu y’undi Munyarwanda witwa Hirwa, ahaberaga ibirori byo kwita umwana izina.

Amakuru avuga ko Murekezi yafashwe akajyanwa kuri sitasiyo ya Polisi ya Mponela, hibazwa impamvu yagiye gufungirwa kure y’aho yafatiwe, aho guhita ajyanwa kuri sitasiyo ya polisi ya Lilongwe mu Murwa Mukuru.

Umwe mu batanze amakuru yagize ati “Yaje kurekurwa nyuma y’iminsi itatu nyuma y’uko yahaye umupolisi miliyoni eshatu z’ama-Kwaca yo muri Malawi,’’

Senior Assistant Commissioner of Police Emmanuel Soko, ukuriye iyo sitasiyo yasabwe n’itangazamakuru kugira icyo abivugaho, asubiza ko agomba kwitabira imirimo y’igipolisi agatanga amakuru nyuma y’iminota 20, ariko azimya telefoni kugeza ubwo inkuru yasohokeye.

Uwatanze amakuru kandi avuga ko Murekezi yaherukaga kwaka uburenganzira bwo gutunga imbunda mu buryo bwemewe n’amategeko ariko ntiyabuhabwa, ariko ubu atunze imbunda ndetse n’uburenganzira yarabubonye nubwo hatazwi inzira byanyuzemo.

Murekezi kandi ngo ubu afite imibanire ikomeye n’abayobozi muri guverinoma ya Malawi byose yifashishije ruswa atanga, akagira n’imikoranire n’umuherwe ukomeye muri Lilongwe witwa Abraham Simama.

Ati “Igitangaje ni uko Murekezi azwi nk’umuntu ukekwaho ibyaha bya jenoside ugomba koherezwa mu gihugu cye kugira ngo yisobanure ku byo aregwa kubera ko Malawi yasinye ku masezerano mpuzamahanga yemera guta muri yombi abantu nk’abo.’’

Uyu mugabo w’umucuruzi kandi ngo ibikorwa bye biteye inkeke abandi bacuruzi b’Abanyarwanda bakora ubucuruzi bwemewe, ndetse akaba akorana n’abandi baherwe bakomeye muri Malawi.

Polisi ya Malawi iravugwaho gukingira ikibaba Umunyarwanda ukekwaho Jenoside

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved