Kwamamaza

Polisi y’u Rwanda yungutse inzira ebyiri z’ikoranabuhanga muri Controle Technique

Yanditswe kuya 5-10-2016 saa 19:36' na Niyonsenga Schadrack


Polisi y’u Rwanda yerekanye inzira nshya ebyiri z’ikoranabuhanga zije kunganira izari zisanzwe zikoreshwa mu gusuzuma ibinyabiziga (Controle technique).

Ubugenzuzi bw’ibinyabiziga (Controle technique) mu Rwanda ni kimwe mu bikorwa leta yifuza gushyiramo imbaraga bitewe n’uko kuri ubu mu gihugu hamaze kugera ibinyabiziga byinshi kandi byose bigomba gusuzumwa kugira ngo ababigendamo babe bizeye umutekano wabo mu bijyanye n’ubwirinzi bw’impanuka.

Izi nzira nshya zikoresha ikoranabuhanga rigezweho, imodoka ipimwa itunga itara ryaka mu cyuma gipima maze ibisubizo byayo byose bikiyandika ku rundi ruhande rw’icyo cyuma, bitandukanye n’ibisanzwe kuko ubundi byasabaga ko Polisi ubwayo yandukura ibisubizo.

Umunyamabanga Uhoraho muri Minisiteri y’Ibikorwaremezo, Rwakunda Christian, yavuze ko izo nzira zongerewe kugira ngo serivise z’ubugenzuzi bw’ibinyabiziga zijye zihuta kugera ku baturage.

Yagize ati “Iki ni igikorwa twishimira cyane nka Minisiteri y’ibikorwa remezo kubera ko twazanye contole technique kugira ngo bidufashe kumenya uko imodoka zigendera mu mihanda yose y’u Rwanda zihagaze, twifuzako twagira imodoka hose mu Rwanda zimeze neza kandi zitateza impanuka. Turateganya gushyira izi serivise hose mu gihugu kugira ngo tworohereze abafite ibinyabiziga.”

Akomeza agira ati “Impanuka nyinshi tubona mu muhanda tuzi ko ziterwa n’uko imodoka itameze neza cyangwa n’uburangare bw’abashoferi.”

Rwakunda yatangaje ko hari uburyo bushya buri kunozwa ku buryo abashaka gukoresha controle technique bazajya babisabira ku rubuga rwa internet (Irembo) bibereye iwabo bahabwe igihe bazazira, ibintu biri mu rwego rwo kubarinda kuba batakariza umwanya munini ku cyicaro cya controle technique bategereje gusuzumirwa ibinyabiziga.

Ubusanzwe uko ubugenzuzi bw’ibinyabiziga bukorwa, imodoka irezwe ikosa iri n’iri, nyirayo asabwa kurikosora kugeza ubwo iryo kosa rivuyemo ryose. Icyakora bamwe mu bashoferi bavuga ko ibi bibagora, bagasaba Polisi y’u Rwanda ko yabihindura.

Nzeyimana Emmanuel, umushoferi ukorera mu Ntara y’u Burasirazuba yagize ati “Twifuza ko polisi yazashyiraho igaraje ryayo kuko nta bantu bazi gukora imodoka zacu neza, uraza bakakurega ukajya gukoresha ariko kuko nta bantu babizi neza, ugera mu Gatsata bakakubeshya wagaruka hano icyuma kikongera kikakurega. Nk’ubu naje mu gitondo ariko bandeze feri ariko maze kuyikoresha gatatu kose bambeshya.”

Polisi y’u Rwanda yari isanganywe inzira eshanu zikoreshwa mu gupima ibinyabiziga, zirimo eshatu zari ziri i Kigali, indi imwe y’imodoka izenguruka mu Ntara(Motor Vehicle Mobile Test Lane) n’indi ikorera mu ishuri rya Polisi riri i Gishari mu Ntara y’u Burasirazuba ikorera imodoka nto.

Mbere y’uko izi nzira nshya z’ikoranabuhanga zishyirwaho, Polisi y’u Rwanda yifashishije inzira zari zisanzwe, yashoboraga gusuzuma imodoka ziri hagati ya 400 na 500 ku munsi, muri icyo gihe umuturage uje gupimisha ikinyabiziga yategerezaga igihe kiri hagati y’isaha n’isaha n’igice.

Kuri ubu nyuma y’uko Polisi yungutse izindi nzira ebyiri ngo biratuma serivisi zirushaho kwihuta.

Umuvugizi wa Polisi y’u Rwanda ishami rishinzwe umutekano wo mu muhanda, CIP Emmanuel Kabanda yagize ati “Iyi mirongo ije kugabanya umubare munini w’abantu batindaga ahangaha bafite imodoka nto n’iziciriritse;turategenya ko haziyongeraho imodoka zigera kuri 200 ku munsi bityo tukazaba dufite ubushobozi bwo gupima imodoka ziri hagati ya 600 na 700.”

Mu gihe izi nzira nshya zizaba ziri gukoreshwa, Polisi y’u Rwanda irateganya ko nta muntu uzongera gutinda muri controle technique kuko bizajya bitwara iminota 45 kugira ngo ibisubizo by’ikinyabiziga bibe bibonetse.

Imodoka iyo igeze imbere y'iki cyuma icana itara bakareba ibibazo ifite
Iyo imodoka igeze aho isuzumirwa babanza kwandika muri iki cyuma ikizamini bagiye kuyikorera
Ibisubizo bivuye mu isuzuma bigaragarira muri iyi mashini
Imodoka nto n'iziciriritse nizo zemerewe guca kuri izi nzira nshya
Abashoferi bifuza ko polisi yashyiraho igaraje rizajya ribakorera ibinyabiziga baba bazanye muri controle
Rwakunda Christian avuga ko izi nzira zashyizweho mu rwego rwo koroshya no kwihutisha serivise zo gusuzuma imodoka
CIP Emmanuel Kabanda avuga ko bakoresheje izi nzira hazajya hasuzumwa imodoka 700 ku munsi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved