Kwamamaza

Abari abazunguzayi bijejwe inkunga nibibumbira mu makoperative

Yanditswe kuya 6-09-2016 saa 20:40' na Emma-Marie Umurerwa


Abahoze bacururiza mu muhanda hirya no hino mu mujyi wa Kigali,bijejwe na Polisi y’u Rwanda ko baramutse bibumbiye mu makoperative yabatera inkunga.

Ubwo hatahwaga amasoko yubakiwe abahoze bakora ubucuruzi bwo mu muhanda mu Mujyi wa Kigali, tariki ya 3 Nzeri 2016, ni bwo Umuyobozi wa Polisi y’u Rwanda, IGP Emmanuel Gasana, yabibijeje.

Yagize ati“Bashoboye kujya mu makoperative natwe Polisi y’Igihugu twatanga inkunga yacu tukareba icyo dushyira mu kigega.Icyo gihe bizagabanya ingufu dukoresha hanze mu kajagari tuzishyire hamwe. N’iyo nkunga yaboneka kugira ngo icyo kigega tugifatanye ngo giteze imbere abacuruzi bari hano.”

Yakomeje abasaba kubahiriza amategeko y’igihugu no gutangira amakuru ku gihe kugira ngo abakekwaho ibyaha n’abakurura akajagari bakumirwe.

Ati "Twasinyanye amasezerano n’Umujyi wa Kigali, ku isuku, isukura n’umutekano; ubwo rero biri mu nshingano zacu ngo dufatanye muri iyi nzira.Mu minsi ishize twaravugaga ngo abantu bave mu muhanda, umuntu akagarama hasi induru zikavuga ngo uburenganzira bwacu, ngo kabaye, ariko ubu ngubu ntacyo kwitwaza gihari kandi bizafasha abavuye mu muhanda bakajya mu masoko kugira abakiriya babayoboka.”

IGP Emmanuel Gasana yakomeje yibutsa icyemezo giherutse gufatwa n’Umujyi wa Kigali cy’uko n’abagurira abazunguzayi na bo bagiye kujya babihanirwa.

Ati “Twari twavuze tuti ’ukoma urusyo ukome n’ingasire, ari ugura n’ugurisha bose bajyane’. Tugiye kubikurikiza rero turebe uko byagenda. Ntawe ukwiye gutambamira iki gikorwa cyangwa se ngo agikinishe atubuze uburenganzira bwacu, uwo nta gaciro azagira. Polisi y’u Rwanda n’izindi nzego z’umutekano turaza gufatanya muri ino nzira yo gukumira ibyaha.”

Yanibukije ko iyo Polisi ibuza abantu gucururiza mu muhanda iba yubahiriza amategeko, aboneraho gusaba abahoze ari abazunguzayi gukangurira abagikora ubwo bucuruzi butemewe n’amategeko kubureka.

Mu bihe bitandukanye, hirya no hino mu mujyi wa Kigali, hagiye hubakwa amasoko yo kwimuriramo aba bazunguzayi gusa ntibamaragamo kabiri kuko bahitaga biviramo bavuga ko babuze abaguzi kandi ngo abari mu muhanda bari kubabona.

Indi nkuru wasoma Kigali: Abazunguzayi bashimiye Perezida Kagame wabahaye umutsima, bamusaba n’imboga

IGP Emmanuel Gasana yabwiye aba bacuruzi ko Polisi yabaha inkunga mu gihe baba bishyize hamwe
Akanyamuneza kari kose nyuma yo guhabwa isoko bazajya bacururizamo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved