00:00:00 IGIHE NETWORK KN KINYARWANDA EN ENGLISH FR FRANCAIS

Polisi y’u Rwanda yafashe barindwi bakekwaho kwiba sima yubakishwa umuhanda Huye- Kibeho

Yanditswe na Prudence Kwizera
Kuya 2 Nzeri 2021 saa 01:31
Yasuwe :
0 0

Polisi y’u Rwanda ikorera mu Karere ka Huye yafashe abantu barindwi bakekwaho ubufatanye mu kwiba sima yubakishwa umuhanda wa kaburimbo Huye-Kibeho.

Bafatiwe mu Mudugudu wa Nyarwamba mu Kagari ka Muyogoro mu Murenge wa Huye mu Karere ka Huye mu ijoro ryo ku wa 31 Kanama 2021.

Habanje gufatwa abagabo bane n’umukobwa umwe bafatanwa imifuka 62 ya sima. Nyuma hafashwe abandi basore babiri bakoraga akazi k’ubuyede mu kubaka uwo muhanda kuko ari bo bakekwaho kugurisha iyo sima.

Umuvugizi wa Polisi mu Ntara y’Amajyepfo, SP Theobald Kanamugire, yavuze ko ubwo Polisi yari mu kazi mu masaha y’ijoro yabanje gufata abagabo babiri bikoreye imifuka ya sima. Bamaze gufatwa ni bwo bavugishije ukuri.

Ati “Abapolisi bari mu kazi k’umutekano nijoro saa cyenda bahura n’abagabo babiri bahetse imifuka ya sima ku igare. Bagize amakenga barabahagarika babaza aho bavanye izo sima mu gicuku ni bwo bavugishije ukuri. Umwe muri bo yavuze ko amaze igihe agura sima n’abayede bubaka umuhanda Huye- Kibeho, iyo amaze kugura izo sima ajya kuzigurisha abandi bacuruzi.”

Yakomeje avuga ko bose bafatanywe imifuka 62, uwayiguraga n’abayede avuga ko umwe bawumuheraga ku bihumbi 6 Frw na we akawugurisha mu bacuruzi ku bihumbi 8 Frw.

Yavuze ko hagikomeza iperereza kugira ngo hamenyekane abandi baba bihishe inyuma y’ubwo bujura harimo n’ushinzwe abakozi.

SP Kanamugire yavuze ko abayobozi ba Kompanyi yubaka uriya muhanda bari bamaze igihe bataka ko bibwa isima n’ibindi bikoresho ariko hakabura ibimenyetso.

Ati “Abayobozi ba kompanyi yubaka umuhanda bari baherutse kutegezaho ikibazo cyo kuba bibwa bimwe mu bikoresha ariko nta bimenyetso bifatika bafite. Twatangiye kubigenzura nibwo hafashwe umwe avuga abayedi bamugurishaga sima ndetse anavuga abacuruzi yazigurishaga, harakomeza iperereza kugira ngo hamenyekane n’abandi baba bihishe inyuma y’ubu bujura.”

SP Kanamugire yagaragaje ko bigayitse kuba abari barahawe akazi ko kubaka umuhanda kugira ngo ukomere ufashe abaturarwanda aribo bacaga inyuma bakiba ibikoresho.

Yagaye abacuruzi baguraga ziriya sima, akangurira abaturage kujya bihutira gutanga amakuru igihe babonye abantu bakora bene ibyo bikorwa by’ubujura.

Hodali Marcel ashinzwe umutekano mu ikompanyi yubaka umuhanda Huye-Kibeho yashimiye Polisi kuba yaragejejweho ikibazo cy’uko bibabwa ntibyicarane ahubwo igatangira iperereza bityo bamwe bakaba bafashwe.

Abafashwe bashyikirijwe Urwego rw’Igihugu rushinzwe ubugenzacyaha, RIB, mu Karere ka Huye kugira ngo hatangire iperereza bakorerwe dosiye ishyikirizwe ubushinjacyaha.

Ingingo ya 166 ivuga ko umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe ariko kitarenze imyaka ibiri, ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri, imirimo y’inyungu rusange mu gihe cy’amezi atandatu cyangwa kimwe gusa muri ibyo bihano.

Polisi y’u Rwanda yafashe barindwi bakekwaho kwiba sima yubakishwa umuhanda Huye- Kibeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .