Perezida Macron yakiriye Perezida Kagame muri Élysée (Amafoto)

Yanditswe na Mathias Hitimana
Kuya 23 Gicurasi 2018 saa 02:28
Yasuwe :
2 0

Perezida Kagame yakiriwe na Perezida w’u Bufaransa, Emmanuel Macron, kuri uyu wa 23 Gicurasi 2018.

Umukuru w’Igihugu ari mu ruzinduko rw’iminsi ibiri mu Bufaransa ku butumire bwa Perezida wabwo, Emmanuel Macron.

Perezidansi y’u Rwanda yanyujije kuri Twitter ubutumwa bugaragaza ko Perezida Macron yakiriye Perezida Kagame mu Ngoro ya Élysée, aho bagomba kugirana ibiganiro ku mubano w’ibihugu byombi, bakanahura n’abayobozi 60 b’ibigo by’ikoranabuhanga bikomeye.

Perezida Kagame aragirana ibiganiro na mugenzi we w’u Bufaransa ku birebana n’ubucuruzi, ishoramari, ikoranabuhanga, ubuzima, n’umubano hagati y’ibihugu byombi.

Uku guhura kwa Perezida Kagame n’uw’u Bufaransa, Emmanuel Macron, kuje gukurikira uguhura kwabo muri Nzeri 2017 ubwo bari bitabiriye Inama y’Umuryango w’Abibumbye.

Perezida Macron w’imyaka 40 y’amavuko, ni we muyobozi wa mbere uyoboye u Bufaransa utari muri politiki ubwo Jenoside yakorerwaga Abatutsi yabaga.

Muri uru ruzinduko rw’iminsi ibiri, Perezida w’u Rwanda azitabira ‘Viva Technology’, inama ihuje ibigo bigitangira ishoramari mu ikoranabuhanga n’abayobozi baturutse mu mpande zose z’Isi. Uyu mwaka, ibigo by’ishoramari mu ikoranabuhanga bigera kuri 50 byo muri Afurika – harimo n’ibyo mu Rwanda – biramurika ibyo bimaze kugeraho ndetse binafashwe gukorana n’abateza imbere imishinga ijyanye n’ikoranabuhanga.

Uretse iby’umubano w’ibihugu byombi, uru ruzinduko rwa Perezida Kagame mu Bufaransa ruje mu gihe hariho dosiye yo kuba Minisitiri w’Ububanyi n’Amahanga w’u Rwanda, Louise Mushikiwabo, yazasimbura Michaëlle Jean ku buyobozi bw’Umuryango Mpuzamahanga uhuriwemo n’ibihugu bivuga Igifaransa.

Perezida Kagame yakiriwe mu cyubahiro gikwiye Umukuru w'Igihugu ubwo yageraga mu Bufaransa
Perezida Emmanuel Macron ategereje kwakira Perezida Kagame mu Ngoro ya Élysée
Perezida Kagame asuhuzanya na Emmanuel Macron
Perezida Kagame yagiriye uruzinduko rwa mbere mu Bufaransa kuva mu 2015
Perezida Macron yakiriye Perezida Kagame muri Élysée
Perezida Kagame yaherukaga mu Bufaransa tariki ya 27 Gashyantare 2015 ubwo yari yitabiriye Inama y’Ishami ry’Umuryango w’Abibumbye ryita ku Bumenyi n’Umuco (UNESCO) yigaga ku ikoranabuhanga
Perezida Kagame yitabiriye Inama Mpuzamahanga yiga ku Ikoranabuhanga by’umwihariko ku Iterambere ry’Ibigo bito izwi nka VivaTech
Abakuru b'ibihugu byombi banagiranye ikiganiro n'itangazamakuru

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza