Perezida Kenyatta yarahiriye kuyobora Kenya mu muhango witabiriwe na Kagame

Yanditswe na IGIHE
Kuya 28 Ugushyingo 2017 saa 12:25
Yasuwe :
0 0

Ahagana saa sita n’igice ku isaha yo muri Kenya (saa tanu n’igice mu Rwanda) nibwo Perezida Uhuru Kenyatta na Visi Perezida we William Samoei Ruto, barahiriye kuyobora Kenya muri manda ya nyuma izarangira mu 2022.

Umuhango w’irahira rya Kenyatta witabiriwe n’abanyacyubahiro batandukanye barimo na Perezida Kagame wakirijwe amashyi menshi cyane ubwo yageraga i Karasani kuri Stade ya Moi International Sports Centre.

Ibi birori kandi byanasusurukijwe n’Itorero ry’Igihugu ‘Urukerereza’ ryashimishije abanya-Kenya mu mbyino za Kinyarwanda zirimo gushayaya n’umuhamirizo w’intore.

Perezida Kagame ni umwe mu bakuru b’ibihugu barenga 10 bitabiriye uyu muhango barimo Yoweri Museveni wa Uganda, Ian Khama wa Botswana, Edgar Lungu wa Zambia, Ismaïl Omar Guelleh wa Djibouti, Hage Geingob wa Namibia, Faure Gnassingbé wa Togo, Mohamed Farmajo wa Somalia, na Minisitiri w’Intebe wa Ethiopia Hailemariam Desalegn.

Perezida Kagame yabwiye abaturage bari bitabiriye uyu muhango ko u Rwanda rwifuriza ishya n’ihirwe igihugu cyabo. Ati “Banya-Kenya naje kubashimira. Mwarakoze cyane. Abanyarwanda barabatashya cyane ndetse banabifuriza ihirwe ku ntsinzi ikwiye mwabonye mu matora.”

Mu ijambo rye, Perezida Uhuru Kenyatta yashimiye abaturage bamutoye abizeza ko iyi manda ye ya nyuma ari igihe cyo kuzamura ubukungu bihereye mu gushyira imbaraga mu nganda zizafasha mu guhanga imirimo. Yavuze ko abarwayi bazajya bishingirwa na leta ku kigero cya 100%, hakubakwa inzu zirenga ibihumbi 500 zizafasha mu gutuma abaturage babona amacumbi kandi ahendutse.

Yasabye abanya-Kenya kurangwa n’urukundo, bakabana nk’abavandimwe bakareka amacakubiri n’inzangano ahubwo bakarangwa n’icyizere no mu bihe bikeneye.

Perezida Kenyatta kandi yatangaje ko guhera umwaka utaha, abanyafurika bose bazajya bifuza gusura Kenya, bemerewe kwinjira mu gihugu bagahabwa viza bageze ku cyambu aho binjirira mu gihugu.

Ku baturage ba Afurika y’Uburasirazuba, Kenyatta yashimangiye ko bo ari abavandimwe, bazajya binjira bakoresheje indangamuntu zabo kandi bafite uburenganzira busesuye bwo kuba bakorera muri Kenya, ubwo kuba bahagira amasambu, bakahakorera nk’abaturage b’igihugu ndetse ababyifuza bagashyingiranwa n’abanya-Kenya.

Itegeko Nshinga rya Kenya riteganya ko ku munsi wo kurahira, Perezida watowe agomba kurahirira kuyobora igihugu ku masaha atari mbere ya saa yine z’igitondo kandi atarenze saa munani z’amanywa. Kuri uyu munsi byakozwe saa sita n’iminota 25 ku isaha yo muri Kenya (iri imbere ho isaha imwe ku masaha yo mu Rwanda).

Perezida wa Kenya akora indahiro ebyiri zirimo imwe yo gushimangira ko azubaha Itegeko Nshinga rya Repubulika ya Kenya n’indi ivuga ko azubahiriza inshingano ze nka Perezida wa Repubulika w’iki gihugu cyo mu Burasirazuba bwa Afurika.

Indahiro ya mbere yo kurinda no kubaha Itegeko Nshinga igizwe n’amagambo 77 naho iyo avuga yemera kuzubahiriza inshingano ze nka Perezida wa Repubulika igizwe n’amagambo 79.

Kuri Visi Perezida wa Kenya nawe akora indahiro ebyiri zimeze nk’iyo Perezida wa Repubulika aba yakoze. Gusa itandukaniro riza ku ndahiro yo kwemera kuzubahiriza inshingano ze nka Visi Perezida wa Kenya kuko yo yiyongeramo amagambo 42 ugereranyije n’iya Perezida ikagira 121.

Ayo magambo 42 yiyongeramo,Visi Perezida aba arahira ko atazigera amena ibanga na rimwe, ko azaha ubujyana bukwiye Perezida wa Repubulika yungirije.

Bibiliya yakoreshejwe mu kurahiza Perezida Uhuru Kenyatta kuri uyu wa Kabiri tariki ya 28 Ugushyingo 2017, ni nayo yakoreshejwe na se Jomo Kenyatta mu 1961 arahira kuba Perezida wa Kenya ubwo iki gihugu cyabonaga ubwigenge cyigobotoye Abongereza.

Itegeko Nshinga ryakuwemo indahiro aba bayobozi bombi bakoze uyu munsi ni iryatowe ku wa 27 Kanama 2017.

Muri uyu muhango wari witabiriwe n’ibihumbi by’abanya-Kenya baturutse impande n’impande, wanarasiwemo imizinga 21 yo guha ikaze Perezida Uhuru Kenyatta nyuma y’irahira rye.

Hagati aho, Polisi ya Kenya yamishije imyuka iryana mu maso mu baturage bashaka kwinjira muri stade yabereyemo ibi birori bavundana, ndetse no mu bice bitandukanye by’igihugu, abashyigikiye Raila Odinga watsinzwe nabo bashatse guteza akavuyo bakumirwa na polisi dore ko umutekano wari wakajijwe mu bice byose by’igihugu.

Perezida Uhuru Kenyatta ubwo yageraga kuri Moi International Sports Centre
Abaturage bari benshi bitabiriye uyu muhango mu byishimo byo ku rwego rwo hejuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza