Perezida Kagame yitabiriye irahira rya Uhuru Kenyatta

Yanditswe na IGIHE
Kuya 28 Ugushyingo 2017 saa 06:59
Yasuwe :
2 0

Perezida Kagame ari muri Kenya aho agomba kwitabira umuhango w’irahira rya mugenzi we w’iki gihugu, Uhuru Kenyatta na Visi Perezida we, William Ruto.

Guverinoma ya Kenya iherutse gutangaza ko abakuru b’ibihugu 11 aribo baza kwitabira umuhango w’irahira rya Perezida Kenyatta utegerejwe kuri uyu wa Kabiri.

Minisiteri y’Ububanyi n’Amahanga muri Kenya yatangaje ko abandi 13 baraza kohereza yaba Visi Perezida, intumwa yihariye cyangwa se umuminisitiri.

Ku bari bwitabiriye uyu muhango w’irahira rya Kenyatta, usibye Perezida Kagame, ku rutonde hariho na Minisitiri w’Intebe wa Israel, Benjamin Netanyahu aho ibinyamakuru byo mu gihugu cye byatangaje ko ari bugere i Nairobi mu gitondo cyo kuri uyu wa Kabiri.

Abandi barimo Yoweri Museveni wa Uganda, Ian Khama wa Botswana, John Pombe Magufuli wa Tanzania, Edgar Lungu wa Zambia, Ismaïl Omar Guelleh wa Djibouti, Hage Geingob wa Namibia, Faure Gnassingbé wa Togo, Mohamed Farmajo wa Somalia, na Minisitiri w’Intebe wa Ethiopia Hailemariam Desalegn.

Ibihugu biza kohereza ba Visi Perezida cyangwa ba Minisitiri b’Intebe muri uyu muhango ni Nigeria, Guinea, Angola, Repubulika Iharanira Demokarasi ya Congo, u Burundi na Yemen.

Senegal, u Bushinwa n’u Buyapani byo biraza kohereza Intumwa zihariye, mu gihe Afurika y’Epfo, u Bwongereza, Ukraine n’u Buhinde byohereza ba Minisitiri.

Perezida Uhuru Kenyatta na Visi Perezida we William Ruto baraza kuba barahirira manda ya kabiri nyuma yaho Urukiko rw’Ikirenga rwemeje intsinzi yabo mu matora yari asubiwemo ku wa 26 Ukwakira 2017.

Mu 2013 ubwo yarahiriraga kuyobora Kenya muri manda ye ya mbere, abakuru b’ibihugu 12 nibo bari bitabiriye uyu muhango wabereye kuri Moi International Sports Centre.

Kenyatta yaherukaga mu irahira rya Kagame

Perezida wa Kenya, Uhuru Kenyatta, asuhuza abari bateraniye kuri Stade Amahoro tariki ya 18 Kanama 2017
Perezida Kagame asezera Margaret Gakuo Kenyatta
Perezida Kagame n’umuryango we basezera Perezida Uhuru Kenyatta n’umugore we Margaret Gakuo Kenyatta witabiriye umuhango w'irahira rye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza