Perezida Kagame yitabiriye irahira rya Emmerson Mnangagwa wa Zimbabwe

Yanditswe na Ferdinand Maniraguha
Kuya 26 Kanama 2018 saa 02:21
Yasuwe :
0 0

Perezida w’u Rwanda, Paul Kagame, akaba n’Umuyobozi wa Afurika Yunze Ubumwe, ni umwe mu banyacyubahiro bitabiriye irahira rya Perezida wa Zimbabwe, Emmerson Mnangagwa.

Mnangagwa yatorewe kuyobora Zimbabwe mu matora yabaye tariki 30 Nyakanga 2018, atsinze Nelson Chamisa ku majwi 50.8 %.

Perezida Kagame yageze i Harare ahagana saa yine za mu gitondo kuri iki Cymweru nkuko Televiziyo ya Zimbabwe, ZBC yabitangaje.

Umuhango wo kurahiza Mnangagwa wanitabiriwe na Perezida wa Zambia, Edgar Lungu; Perezida wa Afurika y’Epfo, Cyril Ramaphosa; Perezida wa Repubulika Iharanira Demokarasi ya Congo, Joseph Kabila na Jakaya Kikwete wahoze ayobora Tanzania.

Witabiriwe kandi na Minisitiri w’Intebe wa Lesotho, Thomas Thabane; uwahoze ayobora Mozambique, Joachim Chissano na Perezida wa Botswana, Mokgweetsi Mosisi.

Bona Mugabe, Umukobwa wa Robert Mugabe wahoze ayobora Zimbabwe n’umugabo we nabo bitabiriye uyu muhango.

Chamisa n’ishyaka rye MDC Alliance bari baregeye urukiko rurinda Itegeko Nshinga bavuga ko bibwe amajwi mu matora ariko kuri uyu wa Gatanu urukiko rwatesheje agaciro icyo kirego, ruvuga ko nta bimenyetso byagaragajwe.

Mnangagwa yavuze ko atatunguwe n’uwo mwanzuro, asaba Chamisa gushyira imbere ubwiyunge.

Yagize ati “Nelson Chamisa, umuryango wanjye urafunguye, amaboko yanjye ararambuye. Turi igihugu kimwe, nicyo tugomba gushyira imbere. Reka ibidutandukanya tubisige inyuma, ni igihe cyo kujya mbere dufatanyije.”

Mnangagwa abaye Perezida wa kabiri wa Zimbabwe utowe nyuma y’uko icyo gihugu kibonye ubwigenge mu 1980.

Yasimbuye Robert Mugabe wari umaze ku butegetsi imyaka 37 akabukurwaho n’igisirikare mu Ugushyingo 2017.

Perezida Kagame ubwo yari ageze muri Zimbabwe
Perezida Ramaphosa, Kagame na Mnangagwa baganira
Minisitiri w’Intebe wa Lesotho, Thomas Thabane yitabiriye uyu muhango
Bona Mugabe (hagati), umukobwa wa Robert Mugabe yitabiriye irahira rya Mnangagwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza