Perezida Kagame yitabiriye inama itegurwa n’umuherwe Tony Elumelu muri Nigeria (Amafoto)

Yanditswe na Habimana James
Kuya 27 Nyakanga 2019 saa 09:20
Yasuwe :
0 0

Perezida Paul Kagame ari muri Nigeria, aho yitabiriye inama ya rwiyemezamirimo, Tony Elumelu, y’iminsi ibiri yahuje ba rwiyemezamirimo barenga 5000 baturutse ku mugabane wa Afurika.

Perezida Kagame ari mu bakuru b’ibihugu batanga ibiganiro muri iyi nama aho ari kumwe na Perezida wa Senegal, Macky Sall, uwa Repubulika Iharanira Demokarasi ya Congo, Félix Tshisekedi, Visi Perezida wa Nigeria Yemi Osinbajo na Minisitiri w’Intebe wa Uganda, Ruhakana Rugunda.

Iki kiganiro gitangwa n’aba bakuru b’ibihugu kigamije gutuma ba rwiyemezamirimo bari muri iyi nama bagirana ubusabane kugira ngo batange ubuhamya bw’uburyo leta yatanga umusanzu watuma ubucuruzi kuri uyu mugabane butera imbere.

Iyi nama kandi ijyanye no gusoza amahugurwa yari ahuje urubyiruko rw’Abanyafurika 3000 batoranyijwe mu bandi ibihumbi 200, bafashwaga n’ikigega cyashinzwe n’uyu muherwe.

Muri aba bantu bahawe aya mahugurwa harimo abanyarwanda 25, aba barimo ba rwiyemezamirimo bakora mu by’ubuhinzi, ubukerarugendo iby’ingendo, inganda, ubuzima n’uburezi.

Iyi nama iba umwanya uha amahirwe abakiri bato baturutse mu bihugu bitandukanye kuri uyu mugabane aho bahura, bakiga kandi bakaganira n’abandi ba rwiyemezamirimo.

Aya kandi aba amahirwe ku banyapolitike bavuye kuri uyu mugabane n’abandi bafata ibyemezo, kuganira n’abandi bacuruzi bakiri bato barimo gushaka uko bakomeza guteza imbere icyerekezo cy’ubukungu bwa Afurika.

Kuri uyu wa Gatanu kandi Perezida Kagame ari kumwe na Perezida Félix Tshisekedi na Minisitiri w’intebe wa Uganda Ruhakana Rugunda, bagize isangira bakiriwemo na Tony Elumelu.

Tony Onyemaechi Elumelu w’imyaka 56 ni umwe mu bafite agatubutse muri Afurika, umutungo we ubarirwa muri miliyari y’amadorali.

Binyuze mu muryango Tony Elumelu Foundation, TEF, yashinze mu 2010, Uyu muherwe wigeze kuza ku rutonde rw’abantu 20 bavuga rikijyana muri Afurika, kuva mu 2014 atera inkunga ba rwiyemezamirimo baturutse mu bihugu bitandukanye.

Perezida Kagame yitabiriye inama itegurwa n'umuherwe Tony Elumelu muri Nigeria
Iyi nama kandi ijyanye no gusoza amahugurwa yari ahuje urubyiruko rw’Abanyafurika 3000
Perezida Tshisekedi wa RDC ari mu bitabiriye iyi nama y'iminsi ibiri
Perezida Kagame ari mu bakuru b’ibihugu batanga ibiganiro muri iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza