Perezida Kagame yavuze ku musimbura we, AU na ICC

Yanditswe na Cyprien Niyomwungeri
Kuya 28 Mata 2018 saa 09:04
Yasuwe :
0 0

Perezida Kagame yavuze ko mu gihe azaba atakiyobora igihugu azagerageza gutanga imbaraga ze zose, agafasha uzamusimbura guteza imbere u Rwanda kugira ngo izina rumaze kubaka mu ruhando mpuzamahanga ridasibangana.

Ibi Umukuru w’Igihugu yabigarutseho mu kiganiro ku mikorere y’inzego za Leta muri Afurika yo mu kinyejana turimo cya 21 yagiranye na Mo Ibrahim, ku munsi wa kabiri w’Inama yiswe ‘Ibrahim Governance Weekend’ ibera i Kigali.

Ni ikiganiro cyibanze ku ngingo nyinshi zirimo amavugurura arimo gukorwa mu Muryango wa Afurika Yunze Ubumwe (AU), imikorere y’Urukiko Mpuzamahanga Mpanabyaha (ICC), icyo Perezida Kagame atekereza ku muntu uzamusimbura n’ibindi.

Perezida Kagame wayoboye amavugurura ya AU ndetse akaba anayoboye uyu muryango muri manda izarangira muri Mutarama umwaka utaha, yasobanuye ko agamije guhindura imyumvire no kuzana imikorere mishya itanga umusaruro no gutera inkunga ibikorwa by’umuryango.

Yatangaje ko kugeza ubu ibihugu 25 bimaze gutangira gahunda yo gutanga 0.2% by’imisoro y’ibyinjira mu gihugu, hagamijwe ko AU isezera ku muco wo gutungwa n’inkunga z’amahanga.

Yagize ati “Hari n’ibindi bihugu byinshi bibishaka, n’aho abantu batarabyumva neza, dufite ikipe ijya mu bihugu igasobanura, bakareba ayo bishyuraga, ayo batanga muri ubu buryo, mbese bakaganira.”

Yakomeje avuga ko afite icyizere ko amasezerano ku Isoko Rusange rya Afurika, azagera ku ntego zayo kuko kugeza ubu ibihugu 44 byayasinye.

Umusimbura

Umwe mu bitabiriye ikiganiro yabajije Perezida Kagame icyo atekereza ku musimbura we, niba hari icyo azamufasha kugira ngo u Rwanda rukomeze kugira isura nziza nk’iyo rufite uyu munsi ku ruhando mpuzamahanga.

Umukuru w’Igihugu yavuze ko ataba nk’abantu badatanga umusaruro ariko bagakomeza kwizirika ku butegetsi bikarangira bagiye ntacyo basize. Yavuze ko amahitamo yo gusimburwa atari aye kuko yayagize ariko ibyifuzo by’abamushakaga bikayaganza.

Yagize ati “Gahunda yo kunsimbura ntabwo ari iyanjye, iyo iza kuba iyanjye si mba ndi hano kuko nibyo nashakaga. Nashakaga kuyobora manda ebyiri nari nemerewe nkagenda, nicyo nifuzaga kuko mu mutima wanjye ndanyuzwe.”

Perezida Kagame yavuze ko mu gihe azaba atakiyobora igihugu azagerageza gutanga imbaraga ze zose mu gufasha uzamusimbura guteza imbere u Rwanda

Yongeyeho ko Abanyarwanda bamusabye igihe kinini ko akomeza kubayobora bimusaba igihe kinini cyo kubitekerezaho, hanyuma abyemera ashingiye ku mateka yanyuzemo n’icyatumye ajya ku rugamba rwo kubohora igihugu no guharanira uburenganzira bwe.

Ati “Nagiye mu gisirikare mpera mu cya Uganda, ubundi mu cy’u Rwanda. Sinigeze nkora ibyo ngo nzabe Perezida, sinigeze nanabirota kugeza ubwo bibayeho. Igihe nari mfite amahirwe yo kuba Perezida nahisemo kutamuba.”

Yakomeje agira ati “Mu 1994 ishyaka ryanjye ryarantoranyije ngo mube ndababwira ngo ‘simbyiteguye, ntibyari no mu byo narwaniraga. Niyo mpamvu batoranyije undi nkaba Visi Perezida na Minisitiri w’Ingabo.”

Perezida Kagame yavuze ko gufata icyemezo cyo kugenda bitagorana kuko n’iyo abanyarwanda baza kumusaba gukomeza kubayobora bamwizeyemo ubushobozi bwo kubakorera byinshi ariko we yumva ntabwo agifite yari kubahakanira.

Nyuma yo kuva ku buyobozi, Perezida Kagame, yavuze ko afite byinshi byo gukora, ariko azagerageza gufasha uzamusimbura kugira ngo azageze igihugu kuri byinshi.

Ati “ Nzakomeza kumuha ubufasha bwose nzaba mfite.”

ICC

Bamwe mu bayobozi ba Afurika bumvikana kenshi bagaragaza ko batishimye imikorere y’urukiko mpuzamahanga mpanabyaha (ICC) ndetse ntibahweme no gutanga ibitekerezo bikubiyemo ibyifuzo byo gusesa amasezerano arushyiraho.

Perezida Kagame yavuze ko uru rukiko rwagiyeho rushyiriweho Isi yose ariko byarangiye rubaye urwa Afurika gusa, aho usanga Abanyafurika baburanishwa narwo akenshi ibyaha baba barabikoranye n’abandi b’ahandi ariko bo ntibagire icyo babazwa.

Yagize ati “Ubwo bashyiragaho ruriya rukiko iyo bavuga ko ari urwo gucira imanza abanyafurika. Ntabwo mvuga ko uwakoze ibyaha adawiye kubibazwa, ariko se bikorwa mu buhe buryo, umuntu akibaza, ni ubuhe butabera butangwa.”

Ibihugu 34 bya Afurika byasinye amasezerano ashyiraho uru rukiko, gusa byo bikavuga ko rurengaho rukabyibasira ku buryo bibona ko rwamaze kuba igikoresho cy’ibihugu bikomeye mu gukandamiza Afurika.

Ubusanzwe ingingo ya 127 y’amasezerano ya Roma, yemerera igihugu kinyamuryango kwivana muri ayo masezerano ku mpamvu zacyo bwite, kandi uko kwivanamo ntikubangamire ubundi bufatanye bushobora gukenerwa n’urukiko kuri icyo gihugu.

Igihugu cyemererwa kuva mu banyamuryango nyuma y’umwaka umwe kigejeje ku Munyamabanga Mukuru wa Loni ubusabe bwo kuvamo.

Iki kiganiro cyibanze ku mikorere y'inzego za Leta muri Afurika mu kinyejana cya 21
Perezida Kagame yagarutse ku mavugurura ari gukorwa mu Muryango wa Afurika Yunze Ubumwe (AU), imikorere y’Urukiko Mpuzamahanga Mpanabyaha (ICC), icyo atekereza ku muntu uzamusimbura n’ibindi
Perezida Kagame na Mo Ibrahim
Perezida Kagame yagiranye ikiganiro na Mo Ibrahim mu Nama yiswe ‘Ibrahim Governance Weekend’
Mo Ibrahim yatangarije France 24 ko u Rwanda ruri ku isonga mu bihugu biyobowe neza muri Afurika
Dr Mohammed Ibrahim, Umunya-Sudani uzwi cyane mu gucuruza telefoni akagira na Sosiyete y’Itumanaho ya Celtel
Inama ya "Ibrahim Governance Weekend’ ni kimwe mu bikorwa bikomeye by’umuryango uzwi nka Mo Ibrahim Foundation

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza